Wednesday, December 11, 2013

"ಲ್ಯಾರಿ ಅಜ್ಜ" ಅನ್ನೋ ನೆನಪು...



        ಬೆಳಿಗ್ಗೆ ಬೆಳಿಗ್ಗೆ ಅಮ್ಮ ’ಲ್ಯಾರಿ ಅಜ್ಜ ಕೊಟ್ಟ ಆ ಟೆಲಿಸ್ಕೋಪ್ ನಾ ಗುಜರಿಯವನಿಗೆ ಕೊಡ್ಲಾ ’ ಅಂತ ಕೇಳಿದಾಗ ರೇಗಿ ಫೋನಿಟ್ಟ ಮೇಲೆ ಈ ಲ್ಯಾರಿ ಅಜ್ಜ ಯಾಕೋ ತುಂಬಾ ನೆನಪಾದ್ರು ..
ಹೌದಲ್ವಾ ತಿಂಗಳೆರಡಾಯ್ತು ಇವರಿಂದ ನಂಗೆ ಮೇಲ್ ಬಂದು ಅಂತ ಯೋಚಿಸ್ತಾನೆ ಮತ್ತೆ ಮೇಲ್ ಚೆಕ್ ಮಾಡಬಂದೆ .ಇರಲಿಲ್ಲ ಅವರಿಂದ್ಯಾವುದೇ ಮೇಲ್.ಅಣುಕಿಸುತ್ತಿದ್ದವು ಅಲ್ಲೊಂದಿಷ್ಟು ಗೂಗಲ್ ಪ್ಲಸ್,ಲಿಂಕರ್ ಮೇಲ್ ಗಳು ನನ್ನ.
ಅವರ ಜೊತೆಗಿನ ಹಳೆ ಮೇಲ್ ಗಳನ್ನ ಓದ್ತಾ ಜಾರಿದ್ದೆ ಅದೇ ದಿನಗಳಿಗೆ...

ಆ ಲ್ಯಾರಿ ಅಜ್ಜಾ-

  ನನಗಿನ್ನೂ ಐದರ ವಯಸ್ಸು ಆಗ.ಏನೋ ರಿಸರ್ಚ್ ಗೆ (ಯಾವುದದು ಅನ್ನೋ ತಿಳಿಯೋ ವಯಸ್ಸಾಗಿರಲಿಲ್ಲ ನಂಗೆ) ಅದ್ಯಾವುದೋ  ದೂರದ ದೇಶದಿಂದ  ನನ್ನೂರಿಗೆ ಬಂದಿದ್ದ ಬಿಳಿಯ ಕೂದಲಿನ ಅಷ್ಟೇ ಬಿಳಿಯ ಮುಖದ ಅಜ್ಜ ಅವರು.
ಸರಿ ಸುಮಾರು ನನ್ನಜ್ಜನ ವಯಸ್ಸಿನವರು.ನಾಲ್ಕು ತಿಂಗಳು ನಮ್ಮನೆಯಲ್ಲೇ ಉಳಿದುಕೊಂಡು ಬೆಳಿಗ್ಗೆಯಿಂದ ಸಂಜೆಯ ತನಕ ಕಾಡು ಅಲೀತಾ ರಾತ್ರಿ ಪೂರ್ತಿ ಮೆತ್ತು(ಅಟ್ಟ) ಹತ್ತಿ ಅದೇನೇನೋ ಬರೀತಾ ಕೂರೋ ಈ ಅಜ್ಜ ಅಂದ್ರೆ ಒಂದಿಷ್ಟು ಕುತೂಹಲ.
’ಲ್ಯಾರಿ’ಅನ್ನೋ ಅವರ ಹೆಸರನ್ನೂ ಹೇಳೋಕೆ ಬರದ ನಾ ಅವರ ಬೆನ್ನು ಹಿಂದೆ ಬಿದ್ದ ಬೇತಾಳದ ತರಹ ಅವರ ಜೊತೆಯೆ ಅಲೆಯುತ್ತಿದ್ದೆ.ಅಪ್ಪ ,ಅಮ್ಮ,ಕೊನೆಗೆ ನನ್ನಜ್ಜ ಗದರಿದರೂ ಕೇಳದೆ ಅವರ ಜೊತೆ ನಾನೂ ಕಾಡು  ಅಲೆಯೋಕೆ ಹೋಗ್ತಿದ್ದೆ ಆಗ.(ಯಾಕಂದ್ರೆ ಶಾಲೆ ನೋಡಿದ್ದೆ ಆರು ವರ್ಷಕ್ಕೆ.ಮನೆಯಲ್ಲಿ ಮಾಡೋ ಕಿಲಾಡಿಗಳಿಗೆ ರೇಗುತ್ತಿದ್ದ ಎಲ್ಲರಿಗಿಂತ ಈ ತಾತನಲ್ಲೇನೋ ವಿಶೇಷತೆ ಇದೆ ಅನ್ನಿಸಿಬಿಡ್ತಿತ್ತು.ಅಥವಾ ಅವರು ಕೊಡೋ ಬಣ್ಣ ಬಣ್ಣ ಚಾಕಲೇಟುಗಳಿಗಾಗಿಯೋ ಗೊತ್ತಿಲ್ಲ ನಂಗಿನ್ನೂ).
ಅವರೂ ಅಷ್ಟೇ ಹೆಗಲ ಮೇಲೆ ಕೂರಿಸಿಕೊಂಡು ಕಾಡಲ್ಲಿ ಕಾಲು ಕಾಲಿಗೂ ಸಿಗೋ ಎಲ್ಲದರ ವೈವಿಧ್ಯತೆಗಳ ಅವರದೇ ಮಾತುಗಳಲ್ಲಿ ಹೇಳ್ತಾ ಹೋಗ್ತಿದ್ರು.
ಗದರದೇ ನಾ ಕೇಳೋ ಎಲ್ಲಾ ಪ್ರಶ್ನೆಗಳಿಗೂ ಪ್ರೀತಿಯಿಂದ ಉತ್ತರಿಸೋ ಈ ಅಜ್ಜ ಕೊನೆಗೂ ನಂಗೆ ಪ್ರೀತಿಯ ಲ್ಯಾರಿ ಅಜ್ಜ ಆಗಿದ್ರು!
 
ಅವರ ಹಾಸಿಗೆಯಿಂದ ಹಿಡಿದು ಎಲ್ಲದರಲ್ಲೂ ಏನೋ ಹೊಸದು ನೋಡೋ ಖುಷಿ ನಮ್ಮಗಳಿಗೆ.ಟೆಲಿಸ್ಕೋಪ್ ಹಿಡಿದು  ಕಾಡಿನಿಂದ ಹಿಡಿದು ತಂದ ಚಿಕ್ಕ ಚಿಕ್ಕ ಹುಳಗಳನ್ನ ಇಂಚಿಂಚೂ ಬಿಡದೇ  ಅವರು ನೋಡ್ತಿದ್ರೆ ಆಮೇಲೆ ನಂಗೂ ನೋಡೋ ಧಾವಂತ .ಏನೋ ದೊಡ್ಡದಾಗಿ ಅರ್ಥವಾಗೋ ತರಹ ನೋಡ್ತಿದ್ದೆ ನಾನೂನೂ!ಅಪ್ಪ ಅಮ್ಮ ಎಷ್ಟೇ ಗದರಿದ್ರೂ ನಾ ಲ್ಯಾರಿ ಅಜ್ಜನ ಬಿಟ್ಟು ಎದ್ದು ಹೋಗ್ತಿರಲಿಲ್ಲ .ಅವರೂ ನನ್ನ ಬಿಟ್ಟುಕೊಡ್ತಿರಲಿಲ್ಲ.
ಎಲ್ಲವನ್ನೂ ಬೆರಗುಗಣ್ಣಿನಿಂದಲೇ ನೋಡೋ ಈ ಪೋರಿ ಅದೆಷ್ಟು ಪ್ರಶ್ನೆ ಕೇಳ್ತಾಳೆ ಅಂತ ಪ್ರೀತಿಯಿಂದ ನನ್ನ ಅಜ್ಜನಲ್ಲಿ ಆಪಾದನೆ ಮಾಡೋ ಲ್ಯಾರಿ ಅಜ್ಜ ನನಗೊಂದು ಕೌತುಕ ಪ್ರಪಂಚ ಆಗ.
ನಾಲ್ಕು ತಿಂಗಳು ಜೊತೆಯಿದ್ದ ಅಜ್ಜ ಹೊರಟಾಗ ತೀರಾ ಅನ್ನೋ ಅಷ್ಟು ಅತ್ತಿದ್ದೆನಂತೆ ನಾ(ಅತ್ತಿದ್ದನ್ನ ಯಾವಾಗ್ಲೂ ಮರೆತುಬಿಡ್ತೀನಿ). ಅವರೂ ಕಣ್ಣಲ್ಲಿ ನೀರಿಟ್ಟುಕೊಂಡೆ ಹೋಗಿದ್ರಂತೆ ಮತ್ತೆ ಬರ್ತೀನಿ ಪುಟ್ಟಿ ಆ ನಿನ್ನ ಶಕ್ತಿಮಾನ್ ನೋಡೋಕೆ ಅಂತಂದು.ಆಗ ನ್ಯಾಷನಲ್ ನಲ್ಲಿ ಬರುತ್ತಿದ್ದ ಶಕ್ತಿಮಾನ್ ಬೇಕಂತ ನಾ ಹಟ ಮಾಡಿದ್ರೆ ಮನೆಯವರೆಲ್ಲ ಸಿಕ್ತಾನೆ ಅವ ನಿನ್ನ ಗಂಡನಾಗಿ ಅಂತ ಸಮಾಧಾನ ಮಾಡ್ತಿದ್ರಂತೆ!(ಈಗಲೂ ನಗ್ತಾರೆ ಎಲ್ರೂ ಶಕ್ತಿಮಾನ್ ಬಗೆಗೆಗಿನ ನನ್ನ ಹಟಕ್ಕೆ).
ಹೊರಟಿದ್ರೂ ಕೊನೆಗೂ ಇಡೀ ಮನೆ ಮಂದಿಗೆ ಕೃತಜ್ನತೆಯ ಕೈ ಮುಗಿದು  ತನ್ನೂರ ಕಡೆಗೆ!

ಹೀಗೇ ಹೊರಟ ಲ್ಯಾರಿ ಅಜ್ಜ ಮತ್ತೆ ನನ್ನೂರಿಗೆ ಬಂದಿದ್ದು ಕಳೆದ ವರುಷ ಭಾರತಕ್ಕೆ ಬಂದಾಗ.ಅಕ್ಷರಶಃ ಮರೆತೇ ಹೋಗಿದ್ದ ಇವರನ್ನ ಮತ್ತೆ ಮನೆಯಲ್ಲಿ ನೋಡ್ತೀವಿ ಅನ್ನೋ ಕನಸು ಕೂಡಾ ಕಂಡಿರಲಿಲ್ಲ ನಾವು.ನೋಡಿದ ತಕ್ಷಣವೇ ನನ್ನೊಟ್ಟಿಗೆ ಕಾಡು ಅಲೆಯೋಕೆ ಬರ್ತಿದ್ದ ಪುಟ್ಟಿ ಇವಳೇನಾ ಗುರುತು ಸಿಗೋಕಾಗದಷ್ಟು ಬೆಳೆದು ನಿಂತಿದ್ದಾಳೆ ಅಂತ ಆಶ್ಚರ್ಯದಿಂದ ಕೇಳೋವಾಗ ಏನೋ ಖುಷಿ ನಂಗೆ. ನಂಗಂತಾ ಮತ್ತೆ ತಂದಿರೋ ಚಾಕಲೇಟ್ ಜೊತೆಗೆ ಒಂದು ಪುಟ್ಟ ಕವರ್ ತೆರೆದು ನೋಡಿದ್ರೆ ಒಂದಿಷ್ಟು ಚಂದದ ಶಕ್ತಿಮಾನ್ ಚಿತ್ರಗಳು!! ನಾ ಮರೆತ ಶಕ್ತಿಮಾನ್ ನಾ ಈ ತಾತ ನೆನಪಿಟ್ಟುಕೊಂಡಿದ್ದ ನೋಡಿ ನಂಗೂ ಆಶ್ಚರ್ಯವಾಗದಿರಲಿಲ್ಲ!.
ಜೊತೆಗೆ ಅವತ್ತು ಅಲೆದಾಡಿದ್ದ ಅದೇ ಕಾಡ ಒಳಹೊಕ್ಕರೆ ಅದೊಂದು ಬಯಲ ತರ ಅನ್ನಿಸಿಬಿಡ್ತು ಪುಟ್ಟಿ ..ಬಾ ಮತ್ತೆ ಒಂದು ಸಲ ಆ ಕಾಲು ಹಾದಿಯಲ್ಲಿ ಹೋಗಿ ಬರೋಣ ಆದರೆ ಅವತ್ತಿನ ತರಹ ನಿನ್ನ ಕೂಸುಮರಿ ಮಾಡೋಕೆ ನಂಗಾಗಲ್ಲ ಇವತ್ತು ಅಂತ ಮುಖ ಬಾಡಿಸಿದ್ದ ಅಜ್ಜಂಗೆ ನಾನಂದಿದ್ದೆ ಇದಾನಲ್ಲ ಶಕ್ತಿಮಾನ್ ಅಂತ ಕಣ್ಣು ಮಿಟುಕಿಸಿ. ಒಂದೀಡಿ ದಿನದ ಮಾತುಕತೆಗಳು ಮುಗಿದಾದ ಮೇಲೆ ನಾವಿಬ್ರೂ ಆ ರಾತ್ರಿಯ ಅದೇ ಮೆತ್ತಿನ ಅವರ ರೂಮಲ್ಲಿ ಕೂತು ಏನೇನೋ ಮಾತಾಡಿದ್ವಿ(ಆ ರೂಮಿಗೆ ಈಗಲೂ ಲ್ಯಾರಿ ಅಜ್ಜನ ರೂಮು ಅಂತೀವಿ ನಾವು)ಹೋದ ವರ್ಷವೇ ತಿಳಿದಿದ್ದು ಅವರು ಮಂಗನ ಖಾಯಿಲೆಗೆ ಏನೋ ಔಷದಿ ಹುಡುಕೋಕೆ ಬಂದಿದ್ದಂತ.ಬಿಡದೇ ಕೇಳಿದ್ದೆ ಎರಡು ಗಂಟೆ ಪ್ರಶ್ನೆಯ ಮೇಲೆ ಪ್ರಶ್ನೆಗಳ.ಎಲ್ಲಕ್ಕೂ ಉತ್ತರಿಸಿ ಅವರ ಮನೆ,ಮಗನ ಬಗೆಗೆ ಮಾತು ತಿರುಗಿಸಿದ್ದ ತಾತನ ಕಂಗಳಲ್ಲಿ ಏನೋ ಅಳಲು,ನೋವ ಭಾವ ಸ್ಪಷ್ಟವಾಗಿ ಕಂಡಿತ್ತು ನಂಗೆ.
ಆಮೇಲೆ ತಲೆ ಸವರಿ ಹೊರಡ್ತೀನಿ ಪುಟ್ಟಿ ನಾಳೆ ನಾ ಈ ಬಾರಿ ಕಣ್ಣೀರ ಜೊತೆ ಬೀಳ್ಕೊಡೋ ಹಾಗಿಲ್ಲ ನೀ ಅಂದಾಗ ಒತ್ತಾಯ ಮಾಡಿದ್ದೆ ಮತ್ತೆ ಯಾವಾಗ ಬರ್ತೀರ ಅಂತ ಹೇಳಲೇಬೇಕಂತ.
ಕಣ್ಣು ಮಿಟುಕಿಸಿ ನಿನ್ನ ಶಕ್ತಿಮಾನ್ ಜೊತೆ ಮಾತಾಡೋಕೆ ಬರ್ತೀನಿ ಮತ್ತೆ ಅಂದಿದ್ರು.

ಆಮೇಲೆ ಅವರಿಂದ ಪಡೆದುಕೊಂಡ ಮೇಲ್ ಐಡಿ ಹಿಡಿದು ನಾ ಅವರನ್ನ ಮತ್ತೆ ಮಾತಾಡಿಸಿದ್ದೆ.ಒಂದು ವರ್ಷದಲ್ಲಿ ನಾನವರಿಗೆ ಮಾಡಿದ್ದು ನಾಲ್ಕು ಮೇಲ್! ಅವರು ನಂಗೆ ಮಾಡಿದ್ದು ಹನ್ನೆರಡು ಮೇಲ್!!

Dear Putti  ಅಂತ ಮಾತು ಶುರುವಿಡೋ ತಾತ ಕೂತು ಆ ದಿನಗಳ ಬಗೆಗೆ,ಅವರ ರಿಸರ್ಚ್ ಬಗೆಗೆ,ಅಲ್ಲಿಯ ಸಂಭಂದ,ಮನೆ,ಮನಸ್ಸುಗಳ ಭಾವಗಳೇ ಇಲ್ಲದ ಮನುಶ್ಯ ಬಂಧಗಳ ಬಗೆಗೆ ಅವರು ಒಂದೊಂದು ತೀರಾ ಭಾವೂಕ ಮೇಲ್ ಮಾಡ್ತಿದ್ದಾಗ ಉತ್ತರಿಸೋಕಾಗದೇ ನಾ ಮೌನಿ.
ಈ ಪುಟ್ಟಿಯ ತರಹದ್ದೇ ಮೊಮ್ಮಗಳು ನಂಗೂ ಬೇಕಿತ್ತು ಅಂತಿದ್ದ ಮೇಲ್ ಒಂದಕ್ಕೆ ನಾನಂದಿದ್ದೆ-ಬಂದುಬಿಡಿ ಭಾರತಕ್ಕೆ ನಿಮ್ಮೊಟ್ಟಿಗೆ ಇದ್ದುಬಿಡ್ತೀನಿ ಮೊಮ್ಮಗಳಾಗಿ ಅಂತ.ಈ ಮಾತ ಕೇಳಿ ಇನ್ನೊಂದಿಷ್ಟು ವರುಷ ಜಾಸ್ತಿ ಬದುಕಿಯೇನು ಪುಟ್ಟಿ ಅಂತ ತಕ್ಷಣಕ್ಕೊಂದು ರಿಪ್ಲೈ ಬಂದಿತ್ತು.

ನಿನ್ನೂರಲ್ಲಿ ಸಿಕ್ಕ ಆ ಆತ್ಮೀಯತೆಗೆ,ಚಂದದ ಗೆಳೆಯನಾದ ನಿನ್ನಜ್ಜಂಗೆ,ನನ್ನದೇ ಮಕ್ಕಳಾಗಿ ಹೋದ ನಿನ್ನಪ್ಪ ದೊಡ್ಡಪ್ಪಂಗೆ,ಮುದ್ದು ಮೊಮ್ಮಗಳಾಗಿ ದಿನ ಪೂರ್ತಿ ಮಾತಾಡ್ತಿದ್ದ ನಿಂಗೆ ಕೃತಜ್ನತೆ ಹೇಳೋದ ಬಿಟ್ಟು ಇನ್ನೇನೂ ಗೊತ್ತಿಲ್ಲ ಪುಟ್ಟಿ.ಬಹುಶಃ ಭಾರತದಲ್ಲಿ ಮಾತ್ರ ಈ ಪ್ರೀತಿ ದಕ್ಕುತ್ತೇನೋ ಅಂದಾಗ ಹೆಮ್ಮೆ ಅನಿಸಿತ್ತು ನಂಗೆ.ಯಾವಾಗ್ಲೂ ಪುಟ್ಟಿ ಅಂತ ಪ್ರೀತಿಸೋ ,ಹೆಗಲ ಮೇಲೆ ಕೂರಿಸಿಕೊಂಡು ಹೊರಡೋ ಈ ತಾತ ಅದ್ಯಾಕೇ ಭಾರತಕ್ಕೆ ಬಂದ್ರೋ ಗೊತ್ತಿಲ್ಲ .ನನ್ನ ಕೇಳಿದ್ರೆ ನಂಗಿನ್ನೊಬ್ಬ ತಾತನ ಕೊಟ್ಟು ಹೋಗೋಕೆ ಬಂದ್ರೇನೋ ಅಂತೀನಿ...ಅಪ್ಪನೂ ಅದನ್ನೆ ಅಂತಾರೆ "ಎಲ್ಲೋ ಆರು ತಿಂಗಳಿಗೊಮ್ಮೆ ಫೋನ್ ಮಾಡೋ ಲ್ಯಾರಿ ಅಜ್ಜಂಗೆ ಪುಟ್ಟಿ ಬಿಟ್ರೆ ಬೇರೆ ಯಾರೂ ನೆನಪಿಗೆ ಬರಲ್ಲ ಮಾತಾಡೋ ಅರ್ಧಗಂಟೆಯಲ್ಲಿ ಇಪ್ಪತ್ತು ನಿಮಿಷ ಪುಟ್ಟಿ ಇರ್ತಾಳೆ ಆಮೇಲೆ ಹತ್ತು ನಿಮಿಷ ಅವಳಜ್ಜ ಇರ್ತಾರೆ .ಒಟ್ಟಿನಲ್ಲಿ ಲ್ಯಾರಿ ಅಜ್ಜನ ಭಾರತದ ಪ್ರಪಂಚದಲ್ಲಿರೋದು ಇವರಿಬ್ಬರೇ ಏನೋ" ಅಂತ.ಮಾತಿಗೆ ಶುರುವಿಟ್ರೆ ಎಲ್ಲರನ್ನೂಮೋಡಿ ಮಾಡೋ ತೀರಾ ಚಂದದ ಇವರ ಮಾತುಗಳ ಕೇಳೋಕೆ ಆ ದಿನಗಳನ್ನೇ ಕಾಯ್ತಿರ್ತೀನಿ ನಾನು.

ನಿನ್ನೊಟ್ಟಿಗೆ ಇಲ್ಲಿಂದ ಮಾತಾಡೋವಾಗ ನಂಗೇನೋ ಖುಷಿ.ಬಹುಶಃ ಕೆಲಸವಿಲ್ಲದೇ ಮಗನ ಮನೆಯಲ್ಲಿರೋ ಬೇಸರಕ್ಕೋ ಅಥವ ನಿಮ್ಮಗಳ ಆ ಬಂಧಗಳಿಗೋ ಗೊತ್ತಿಲ್ಲ ಸಮಾಧಾನವಂತೂ ದಕ್ಕಿದೆ ತುಂಬಾ ದಿನಗಳ ನಂತರ.ನಿಮ್ಮ ಮನೆಯ ಅನ್ನದ ಋಣವಿದೆ ಅಂತೆಲ್ಲಾ ಮಾತಾಡೋ ಈ ತಾತ ಹದಿಮೂರು ವರ್ಷದ ನಂತರ ಮತ್ತೆ ಬಂದುಬಿಟ್ಟಿದ್ರು ನನ್ನ ಬದುಕಲ್ಲಿ.

ಬಹುಶಃ ಇದೆ ಮೂಲವಿದ್ದೀತು ನಂಗೆ ಕಾಡಲ್ಲಿ ಅಲೆಯೋ ಹುಚ್ಚು ಜಾಸ್ತಿಯಾಗೋಕೆ.ಒಬ್ಬಳೇ ಈ ನೆನಪುಗಳ ಜಾಡು ಹಿಡಿದು ಕಾಡಿನಲ್ಲಿ ಇಡೋ  ಪ್ರತಿ ಹೆಜ್ಜೆಯೂ ಒಂದು ಹೊಸ ಹುರುಪಿನ ಹೆಜ್ಜೆಯಾಗೋದರ ಅರಿವು ಸಿಕ್ಕಾಗಲೆಲ್ಲಾ ಲ್ಯಾರಿ ಅಜ್ಜ ನೆನಪಾಗ್ತಾರೆ ನಂಗೆ.ಮನೆಯಲ್ಲಿ ಕಾಲು ನಿಲ್ಲೋದು ಕಮ್ಮೀ. ಒಬ್ಬೊಬ್ಬಳೇ ಅಲೆಯೋ ಖುಷಿ ಸಿಕ್ಕಾಗಿನಿಂದ ಅಜ್ಜ ಹದಿಮೂರು ವರ್ಷದ ಹಿಂದೆ ಕೊಟ್ಟಿದ್ದ ಆ ಟೆಲಿಸ್ಕೋಪ್ ಹಿಡಿದು ಹೊರಟ್ರೆ ಮನೆಯಲ್ಲಿ ಅಮ್ಮ ದೊಡ್ಡಮ್ಮನ ಬೈಗುಳ ಶುರುವಾಗಿರುತ್ತೆ ಲ್ಯಾರಿ ಅಜ್ಜನ ಮೊಮ್ಮಗಳೇ ಇವಳು ಅಂತ!.
 ನೆನಪಾದಾಗಲೆಲ್ಲಾ ಈ ಲ್ಯಾರಿ ಅಜ್ಜಂಗೆ ಕಾಡು ಸುತ್ತೋ ಖುಷಿಯ ಕಲಿಸಿದ್ದಕ್ಕಾಗಿ ಒಂದು ಧನ್ಯವಾದವ ಹೇಳ್ತಿದ್ದೆ ನಾ..ಬದುಕಲ್ಲಿಷ್ಟು ಸಾಹಸಗಳ ಮಾಡಿದಾಗಲೇ ಕಣೋ ಬದುಕ ಬಗೆಗೆ,ನಮ್ಮ ಬಗೆಗೆ ಪ್ರೀತಿಯಾಗೋದು,ಸಾಧಿಸೋ ಧೈರ್ಯ ಸಿಗೋದು ಅಂತಿದ್ದ ತಾತನ ಮಾತುಗಳು ಪೂರ್ತಿಯಾಗಿ ಅರ್ಥವಾಗದಿದ್ರೂ ಮೋಡಿ ಮಾಡಿದ್ದಂತೂ ಹೌದು.

ಆದರೆ ಈಗೊಂದೆರಡು ತಿಂಗಳ ಹಿಂದೆ  ನಾನೂ ಅವರಿಗೆ ಮೇಲ್ ಮಾಡಿರಲಿಲ್ಲ ಅವರಿಂದಲೂ ಮೇಲ್ ಬಂದಿರಲಿಲ್ಲ..ಬೆಳಿಗ್ಗೆಯಿಂದ ನೆನಪಾಗ್ತಿದ್ದ ತಾತನನ್ನು ಮಾತಾಡಿಸಬೇಕಂತ  ಇಷ್ಟುದ್ದದ ದೀರ್ಘ ಭಾವಗಳ ಬರೆದಿದ್ದೆ.
ಆಗೊಂದು ಮೇಲ್ ರಿಸೀವ್ ಆಗಿತ್ತು "Dear Putti" ಅನ್ನೋ ಅದೇ ಆತ್ಮೀಯತೆಯಲ್ಲಿ.
ಆದರೆ ಬರೆದಿದ್ದು ಲ್ಯಾರಿ ಅಜ್ಜನಲ್ಲ :(
ಅವರದ್ದೆ ಪಡಿಯಚ್ಚು ಅವರ ಮಗ..
"ಅಪ್ಪ ಹೋಗಿ ತಿಂಗಳೊಂದಾಯ್ತು .ಈ ಪುಟ್ಟಿಯ ಬಗ್ಗೆ,ಈ ಪುಟ್ಟಿಯ ಚಂದದ ಮನೆಯ ಬಗ್ಗೆ,ಮನೆಯವವರ ಮನಸ್ಸುಗಳ ಬಗ್ಗೆ ಇಡೀ ದಿನ ಮಾತಾಡ್ತಿದ್ದ ಅಪ್ಪ ನಂಗೂ ನಿಮ್ಮನ್ನೆಲ್ಲಾ ಒಮ್ಮೆಯಾದರೂ ನೋಡೋ ತರಹದ ಭಾವವೊಂದ ಕೊಟ್ಟು ಹೋದ್ರು ನಿನ್ನ ಮೇಲ್ ಐಡಿಯ ಜೊತೆಗೆ.
ನಿನ್ನೂರನ್ನ ನೋಡೋಕೆ,ನಿನ್ನ ಜೊತೆಯಿಷ್ಟು ಮಾತಾಡೋಕೆ ಬರ್ತೀನಿ ಸಧ್ಯದಲ್ಲೇ .
ನಿನ್ನಿಷ್ಟದ ಚಾಕಲೇಟ್ ಬಾಕ್ಸ್ ನಾ ಆಗಲೇ ತೆಗೆದುಕೊಂಡಾಗಿದೆ.
ಸಿಕ್ತೀಯ ಅಲ್ವಾ?"

ಲ್ಯಾರಿ ಅಜ್ಜನ ನೆನಪು ಶಾಶ್ವತ ನೆನಪಾಗಿಯೇ ಉಳಿದ ಬೇಸರಕ್ಕೆ ಕಣ್ಣಂಚು ಮಾತಾಡ್ತು. ಇನ್ನೂ ಸೆಂಡ್ ಒತ್ತಿರದ ಲ್ಯಾರಿ ಅಜ್ಜನಿಗೆ ಮಾಡೋ ಮೇಲ್ ನಾ ಡಿಲೀಟ್ ಮಾಡಿಬಿಟ್ಟೆ .
ಆದರೊಂದು ಅವ್ಯಕ್ತ ಭಾವ ಮನ ತಾಕಿ ಹೋಯ್ತು.ಮುಖ ನೋಡಿರದ ಲ್ಯಾರಿ ಅಜ್ಜನ ಮಗ ನಮ್ಮಗಳ ಮೇಲೆ ಇಷ್ಟು ಪ್ರೀತಿಯ ಭಾವವ ಇಟ್ಟುಕೊಂಡಿದ್ದಾರಲ್ಲ ಅಂತಾ.
ಅವರ ಬರುವಿಕೆಯ ನಿರೀಕ್ಷೆಯಲ್ಲಿ .....ನಾ....
"ಲ್ಯಾರಿ ಅಜ್ಜನ ಮೊಮ್ಮಗಳಾಗಿ ಕಾಯ್ತಿರ್ತೀನಿ ನನ್ನಜ್ಜನ ಜೊತೆಗಿಲ್ಲಿ ...ಪ್ರೀತಿಯಿಂದ " ಅಂತ ಸೆಂಡ್ ಬಟನ್ ಒತ್ತಿದ್ದೆ ಟು ದ ಸನ್ ಆಫ್ ಲ್ಯಾರಿ ಅಜ್ಜ

Tuesday, December 3, 2013

ಆ ಗಿಟಾರು ಹುಡುಗ ...

ತುಂಬಾ ದಿನಗಳ ನಂತರ ಅದೊಂದು ಭಾನುವಾರದ ಮಧ್ಯಾಹ್ನ ಮಲಗಿದ್ದೆ ಸರಿಯಾಗಿ ಐದಕ್ಕೆ ಅಲಾರಾಂ ಇಟ್ಟು!ಜನ ಜಂಗುಳಿಯ ಮಧ್ಯ ನನ್ನ ನಾ ಒಂಟಿಯಾಗಿಸಿಕೊಳ್ಳೋ ಖುಷಿ ಸಿಕ್ಕ ದಿನದಿಂದ ಬದುಕಿಗೊಂದು ಪ್ರಬುದ್ಧತೆ ಬಂದಿತ್ತು.ಆದರವತ್ಯಾಕೋ ಜನರ ಮಧ್ಯ ಕಳೆದು ಹೋಗಬೇಕನ್ನಿಸಿದ ಭಾವವ ಬದಿಗೊತ್ತಿ,ಯೋಚನೆಗೂ ಜಾಗ ಬಿಡದೆ ನಿದ್ದೆ ಹತ್ತಿತ್ತು ನಂಗೆ.ಏಳೋ ಹೊತ್ತಿಗೆ ಮೊಬೈಲ್ ಗೆ ಸರಿಯಾಗಿ ಐವತ್ತು ಮಿಸ್ ಕಾಲ್ ಗಳಿದ್ದವು.ಗಾಬರಿ ಬಿದ್ದು ತಿರುಗಿ ಫೋನಾಯಿಸಿದ್ರೆ "ಗೂಬೆ ,ದೊಡ್ಡವಳಾಗಿಬಿಟ್ಟಿದ್ದೀಯ.ಕೈಗೆ ಸಿಗೋದು ಬಿಡು ಫೋನಲ್ಲಿ ಮಾತಿಗೂ ಸಿಗಲ್ಲ ನೀನು" ಅಂತ ಮುಗಿಯದ ದೊಡ್ಡ ಧ್ವನಿಯಲ್ಲಿ ಸಿಟ್ಟು ಮಾಡಿದ್ದ ಗೆಳೆಯ.

ಮೊದಲಿನಿಂದಲೂ ಅಷ್ಟೇ .ಒಂದಿಬ್ಬರು ಆತ್ಮೀಯ ಗೆಳತಿಯರನ್ನ ಬಿಟ್ರೆ ಹೆಚ್ಚಾಗಿ ನಾನಿರೋದು(ನಂಗಿರೋದು) ಗೆಳೆಯರ ಗುಂಪಲ್ಲೆ.ಬ್ಯೂಟಿ ಟಿಪ್ಸ್,ಡ್ರೆಸ್, ಗಾಸಿಪ್ಸ್, ಜಲಸ್ ಅಂತಿಪ್ಪ ಹುಡುಗಿಯರಿಗಿಂತ ನಂಗೆ ಯಾವಾಗ್ಲೂ VIP ಬ್ರಾಂಡ್ ತೋರ್ಸೋ ,ಜಾಸ್ತಿ ತಲೆ ಹರಟೆ ಮಾಡೋ ,ಯಾವಾಗ್ಲೂ ಎಲ್ಲದಕ್ಕೂ ನಗೋ, ನಾವೂ ಹೊಟ್ಟೆ ಹಿಡಿದು ನಗೋ ತರ ಮಾಡೋ ಹುಡುಗರೇ ಜಾಸ್ತಿ ಇಷ್ಟ ಆಗೋದು ..ಇಲ್ಲಿ ದಕ್ಕಿದ್ದೂ ಅಂತಹುದೇ ಪಕ್ಕಾ ಕ್ರೇಜಿ ಹುಡುಗರ ಚಂದದ ಸ್ನೇಹ ಬಳಗ.

ಕಾಲೇಜಿನ ಮೊದಲ ದಿನ ಮಾಡಿದ್ದ rag ನಿಂದ ಶುರುವಾದ ಸ್ನೇಹ ಇವತ್ತಿಲ್ಲಿ ಅವರೆಲ್ಲರ ಬಳಿ ಹೊಡೆದಾಡಿ ಮುಖ ಊದಿಸೋ ಅಷ್ಟರ ಮಟ್ಟಿಗೆ ಬೆಳೆದು ನಿಂತಿದೆ. ನನ್ನೂರ ಇವರುಗಳ ಜೊತೆಗೊಂದಿಷ್ಟು ಮಾತಾಡಿದ್ದು ,ಕೂತು ತಲೆಹರಟೆ ಮಾಡಿದ್ದು ಲೆಕ್ಕವಿಲ್ಲದಷ್ಟು ,,ಸೀನಿಯರ್ಸ್ ಅಂತಾ ತುಂಬಾ ಕೊಬ್ಬು ಮಾಡ್ತಿದ್ದ ಇವರುಗಳ ಕೊಬ್ಬಿಳಿಸಿ ಗೆಳೆಯರನ್ನಾಗಿ ಮಾಡಿಕೊಳ್ಳೋಕೆ ನಾ ತೆಗೆದುಕೊಂಡಿದ್ದು ಸರಿ ಸುಮಾರು ನಾಲ್ಕಾರು ತಿಂಗಳು!..

ಆಮೇಲಾಮೇಲೆ ಗೆಳೆತನದ ಪ್ರತಿ ಸಲುಗೆಯ ಭೇಟಿಯಲ್ಲೂ ಪ್ರತಿ ಗೆಳೆಯರ ಜನುಮ ದಿನಕ್ಕೂ ಒಂದೊಂದು ಫಂಕಿ ಗಿಫ಼್ಟ್ ಹಿಡಿದು ಅಲ್ಲೊಂದಿಷ್ಟು ನಕ್ಕು ಬರೋದರ ಅಭ್ಯಾಸವಾಗಿ ಹೋಗಿದ್ದು ತುಂಬಾ ದಿನಗಳಾಯ್ತು.

ಅಲ್ಲಿ ಪ್ರತಿ ಗೆಳೆಯನ ಬರ್ತ್ ಡೇ ಕೇಕ್ ನಲ್ಲಿ ನಂಗೇ ಸಿಗೋ ಫಸ್ಟ್ ಬೈಟ್ ಗೆ ಉಳಿದವರೆಲ್ಲಾ ಮುಖ ಊದಿಸಿ ಕೂರೋವಾಗ ಏನೋ ಒಂದು ಚಂದದ ಖುಷಿ ನನ್ನೊಳಗೆ ನಂಗೆ . ಅವತ್ತು ನಾನವರ ಹುಡುಗಿಯಾಗಿ ಬಿಡ್ತಿದ್ದೆ ಅಕ್ಷರಶಃ ! ಎಲ್ಲರೂ ಇವತ್ತೂ ಆಡಿಕೊಳ್ತಾರೆ ನಿಂಗೆ ಇದಾರು ಹುಡುಗರಿದ್ದಾರಲ್ಲೆ ,ಯಾರನ್ನ ಸೆಲೆಕ್ಟ್ ಮಾಡ್ತೀಯ ನಮ್ಮೈವರಲ್ಲಿ ಅಂದುಕೊಂಡು.ಸುಮ್ಮನೆ ಅವರುಗಳ ತಲೆಹರಟೆಗೆ ನಕ್ಕು ನಾನೂ ಅಲ್ಲೊಂದಿಷ್ಟು ತರ್ಲೆ ಮಾಡೋವಾಗ ಎಲ್ಲರಿಗೂ ನಗೋದು ಮಾತ್ರ ಗೊತ್ತೆನೋ ಅನಿಸಿಬಿಡುತ್ತಿತ್ತು.

ಆದರೆ ಅವತ್ಯಾಕೋ ಆತ್ಮೀಯತೆಯ ಸಲುಗೆ ತೀರಾ ಅನ್ನಿಸಿ ನಾನಲ್ಲೊಬ್ಬ ಗೆಳೆಯಂಗೆ "ಅಪ್ಪ ಅಮ್ಮನ ದುಡ್ಡಲ್ಲಿ ಹೇಗ್ ಹೇಗೋ ಬದುಕೋ ಹುಡುಗ ಇಷ್ಟ ಆಗಲ್ಲ ನಂಗೆ" ಅಂದಿದ್ದೆ ಅವನ ಬದುಕ ಬಗ್ಗೆ!..ಅನಿಸಿತ್ತು ಆಮೇಲೆ ನಾನ್ಯಾರು ಅವನ ಬದುಕ ಬಗೆಗೆ ಪ್ರಶ್ನಿಸೋಕೆ ಅಂತ.ಆದರೆ ಆಡಿದ್ದ ಮಾತಿಗೆ ಅವ ನನ್ನ ಪೂರ್ತಿಯಾಗಿ ಬೈದು "ನನ್ನಪ್ಪ ಅಮ್ಮನೂ ಹೇಳದ ಈ ಭಾವವ ನೀ ಹೇಳಿದ್ದು ನಂಗಿಷ್ಟವಾಗಿಲ್ಲ" ಅಂತಂದು ಎದ್ದು ಹೋಗಿದ್ದ ಗೆಳೆತನದ ಸಲುಗೆಯ ಸರಿಸಿ.

ಬೇಸರವಾಯ್ತಂತಲ್ಲ ..ಆದರೂ ತುಸು ಬೇಸರಿಸಿದ್ದೆ ನಾನಲ್ಲಿ.ಆದರೆ ತಪ್ಪು ನನ್ನದೇ ಇದ್ದಾಗ್ಲೂ ಅದ ಒಪ್ಪಿಕೊಳ್ಳದ ನಾ, ಎದುರುಗಡೆಯ ವ್ಯಕ್ತಿಯೇ ಸಾರಿ ಕೇಳಬೇಕಂತ ಹಠ ಹಿಡಿಯೋ ತೀರಾ ಹಮ್ಮಿನ ಹುಡುಗಿ ಅವನಿಗೆ ಸಾರಿ ಅಂತಂದು ಸುಮ್ಮನಾಗಿಬಿಟ್ಟಿದ್ದೆ!

ಅವತ್ತಿನಿಂದ ನಂಗೀ ಇಷ್ಟದ ಗೆಳೆಯರ ಗುಂಪಲ್ಲಿ ಹೆಚ್ಚಾಗಿ ಸೇರೋಕೆ ಕಷ್ಟ ಆಗೋದು.ತೀರಾ ಅನ್ನೋ ಅಷ್ಟು ಕಂದಕವ ತಂದು ಬಿಟ್ಟಿದ್ದ ಅವ ಅಲ್ಲಿ.ಉಸಿರುಗಟ್ಟೋ ಸ್ನೇಹದಲ್ಲಿ ಯಾವತ್ತೂ ಉಳಿಯೋಕೆ ಇಷ್ಟ ಪಡದ ನಾ ಆಮೇಲವರ ಬರ್ತ್ ಡೈ ಪಾರ್ಟಿ,ಸುಮ್ಮನೊಂದು ಹ್ಯಾಂಗ್ ಔಟ್ ಏನೋ ಇಲ್ಲದ ಕಾರಣಗಳ ಹೇಳಿ ನಿಲ್ಲಿಸಿಬಿಟ್ಟಿದ್ದೆ...ಹತ್ತು ಬಾರಿ ಕರೆದಾಗ್ಲೂ ಒಮ್ಮೆಯೂ ಹೋಗದ ನನ್ನ ಅವರುಗಳು ಕರೆಯೋದೂ ಬಿಟ್ಟು ಬಿಟ್ಟಿದ್ರು ಕಾರಣವನ್ನೂ ಕೇಳದೇ!. ಅಲ್ಲಿಯೂ ಅವರುಗಳು ನನ್ನ ಕರೆಯೋದು ಪುಟ್ಟಿ ಅಂತಾನೇ..ಎಲ್ಲೋ ವಾರಕ್ಕೊಂದು ಮಿಸ್ ಯು ಮೇಸೆಜ್ ಮಾಡಿ,ತಿಂಗಳಿಗೊಮ್ಮೆ ಬದ್ಕಿದೀಯೇನೇ ಕೋತಿ ಅಂತ ಮಾತಾಡಿಸೋ ಇವರುಗಳ ಕಾಳಜಿಯ ಕಾಲೆಳೆಯೋ ಮಾತುಗಳಿಗೆ ಭಯ ಬೀಳ್ತಿದ್ದೆ ಪ್ರತಿ ಬಾರಿ ..ಎಲ್ಲಿ ಅವನ ತರಹವೇ ಇವರುಗಳಿಗೂ ಏನೋ ಹೇಳೋಕೆ ಹೋಗಿ ಎಲ್ಲಿ ಕಳೆದು ಹೋಗ್ತಾರೋ ಅನ್ನೋ ಭಯ.ಆದರೂ ಅನಿಸಿದ್ದನ್ನ ನೇರಾ ನೇರಾ ಮುಲಾಜಿಲ್ಲದೇ ಹೇಳೋ ಹುಡುಗಿಗೆ ಯಾರಿದ್ರೂ ಯಾರು ಎದ್ದು ಹೋದ್ರೂ ಅಷ್ಟೊಂದೇನೂ ಬೇಸರವಾಗ್ತಿರ್ಲಿಲ್ವೇನೋ.ಆದರೆ ಎಲ್ಲರಿಗಿಂತ ಆತ್ಮೀಯ ಅನ್ನಿಸಿ,ಅದೆಷ್ಟೋ ಭಾವಗಳ ,ಚಿಲ್ಲು ಚಿಲ್ಲು ಕನಸುಗಳ ಕೆದಕಿ ಕೇಳಿದ್ದ ಹುಡುಗ ಸಾರಿ ಅಂದ ನಂತರವೂ ಎದ್ದು ಹೋದ ಅನ್ನೋದೊಂದೆ ಬೇಸರ.

ಏನೋ ಒಂದಿಷ್ಟು ಒಂಟಿತನ ಅನಿಸಿತ್ತು ಒಂದಷ್ಟು ದಿನಗಳು ..ಒಂಟಿತನದ ಏಕಾಂತದ ಖುಷಿ ಸಿಕ್ಕ ದಿನದಿಂದ ನೆಮ್ಮದಿಯ ನಗು ಮೂಡಿತ್ತು.

ಬದುಕ ಬಗೆಗೆ ಒಂದಿಷ್ಟು ಬೇರೆಯದೇ ಭಾವಗಳಿರೋ ಹುಡುಗಿ ನಾ.ಎಲ್ಲರಲ್ಲೂ ಚಿಲ್ಲು ಚಿಲ್ಲು ಮಾತಾಡಿ ಒಂದಿಷ್ಟು ಫನ್ ಗಳ ನಂತರವೂ ಬದುಕಿನ್ನೇನೋ ಬೇರೆಯದೇ ಇದೆ ಅನ್ನೋದ ಅರಿತಿದ್ದೆ ಅಲ್ಲಿ.ಆದರೆ ಅಲ್ಯಾರಿಗೂ ಹೇಳಹೊರಡಲ್ಲ ಸಾಮಾನ್ಯದಿ .ಆದರೆ ಈ ಗೆಳೆಯ ಮಾತ್ರ ನನ್ನೆಲ್ಲ ಚೌಕಟ್ಟುಗಳ ಮೀರಿ ನನ್ನಲ್ಲಿ ಬಂದುಬಿಟ್ಟಿದ್ದ ..ಬ್ರಾಂಡೆಡ್ ಮಾತುಗಳಲ್ಲಿ ಗೊತ್ತಿರೋ ಎಲ್ಲಾ ಬ್ರಾಂಡ್ ಗಳ ಹೇಳೋದ ಬಿಟ್ರೆ ಅವುಗಳನ್ಯಾವುದನ್ನೂ ನಾ ಹಾಕಿರಲಿಲ್ಲ .ಅವನಿಗೆ ಹೇಳಿದಂತೆಯೇ ಅಪ್ಪ ಅಮ್ಮನ ದುಡ್ಡಲ್ಲಿ ತೀರಾ ಅನ್ನೋ ಅಷ್ಟು ಆಡೋದು ಸರಿ ಬೀಳ್ತಿರಲಿಲ್ಲ ನಂಗೆ.ನಾನವನಿಗೆ ಹೇಳಿದ್ದು ಅದನ್ನೆ ಅವತ್ತು.ಆದರವನಿಗೆ ಅದು ತುಂಬಾ ಹರ್ಟ್ ಆಗಿದೆಯಂತ ಗೊತ್ತಾಗಿದ್ದು ಅವ ನನ್ನ ಬಿಟ್ಟು ಹೋದ ಮೇಲೆ.ಆಮೇಲೆಲ್ಲೋ ವಾಪಸ್ಸಾದ ಗೆಳೆಯನಾಗಿ ..ಆದರೆ ಅವ ವಾಪಸ್ಸಾಗೊ ಹೊತ್ತಿಗೆ ಅಲ್ಲೊಂದು ಮುಚ್ಚಲಾಗದ ,ಸರಿಸೋಕಾಗದ ಕಂದಕವೊಂದು ಬಂದುಬಿಟ್ಟಿತ್ತು!!

ಆ ಹಳೆಯ ದಿನಗಳ ನೆನಪಿಸಿಕೊಂಡು ಸುಮ್ಮನೇ ಕೂತಿದ್ದಾಗ ಅದ್ಯಾಕೋ ಮತ್ತೆ ಇವರುಗಳನ್ನೊಮ್ಮೆ ಮಾತಾಡಿಸಿ ಬರಬೇಕನಿಸಿಬಿಟ್ಟಿತ್ತು.
ಗೊಂದಲದಲ್ಲಿ ಆ ಖುಷಿಯಲ್ಲಿ ಪಾಲುದಾರಳಾಗೋಕೆ..ಗೊತ್ತಿತ್ತು ದೊಡ್ಡ ಪಾಲು ಸಿಗೋದು ನಂಗೆ ಅಂತಂದು!

ಆದರೂ ಒಂದು ಅವ್ಯಕ್ತ ಭಾವ ಅದು.
 ಅಗೈನ್ ಮತ್ತೆ ಸಿಕ್ಕಿತ್ತು ಕೇಕ್ ನ ಮೊದಲ ಬೈಟ್...!!
ಅದೇ ಹಳೆಯ ಪ್ರೀತಿಯಿಂದ ಮಾತಾಡಿಸೋ ,ಅಷ್ಟೇ ತರಲೆ ಮಾಡೋ ಅವರುಗಳನ್ನ ಇಷ್ಟು ದಿನ ಯಾಕೆ ಮಿಸ್ ಮಾಡ್ಕೊಂಡೆ ನಾ ಅನ್ನಿಸಿಬಿಡ್ತು ಅವತ್ತಲ್ಲಿ!.ಮೂರು ತಾಸು ಕಾಫೀ ಡೇ ನಲ್ಲಿ ಮಾಡಿದ ತರಲೆ,ಮಸ್ತಿ,ಮಾತು ನಗುವಿನಿಂದಾಚೆಗೂ ನನ್ನಲ್ಲೇನೋ ಹುಡುಕಾಟ....

ನಾನವರಿಗೆ ನನ್ನೆಲ್ಲ ತರ್ಲೆಗಳ ಸಹಿಸಿಕೊಳ್ಳೋ,ತೀರಾ ಸೈಲೆಂಟ್ ಆಗಿರೋ ,ಅವನ ಮನೆಯಲ್ಲಿ ನಂಗೆ ಮನೆ ಮಗಳ ಸ್ಥಾನ ಕೊಡಿಸಿರೋ ,ಅಮ್ಮ ನೆನಪಾದಾಗಲೆಲ್ಲಾ ಮನೆಗೆ ಕರೆದು ಗಂಟೆಗಟ್ಟಲೇ ಅವನಮ್ಮನನ್ನ ನನ್ನ ಅಮ್ಮನನ್ನಾಗಿ ಮಾಡಿಬಿಡೋ ಈ ಊರ ನನ್ನ ಗೆಳೆಯನನ್ನ ಪರಿಚಯಿಸಿದಾಗ ಕಣ್ಣು ಮಿಟುಕಿಸಿ ನಂಗೆ ಮಾತ್ರ ಕೇಳೋ ತರ "ನಮ್ಮಷ್ಟು ಚೆನಾಗಿಲ್ಲ ಹುಡುಗ" ಅಂದಿದ್ರು! ನಾನೂ ಕಣ್ಣು ಮಿಟುಕಿಸಿ "ಅವ ಚೆನಾಗಿರೋಕೆ ಅವನೇನು ನನ್ನ ಹುಡುಗನಲ್ಲ " ಅಂದುಬಿಟ್ಟಿದ್ದೆ :ಫ್

ಇನ್ನು ಹುಡುಕಾಟದ ಕಾತರತೆಗೊಂದು ಕಾರಣವಿತ್ತು .ನಾ ಬೇಸರ ಮಾಡಿದ್ದ,ದೊಡ್ಡದಾಗಿ ಬದುಕ ಬಗ್ಗೆ ಹೇಳ ಹೊರಟಿದ್ದ ಆ ಗೆಳೆಯ ಕಾಣಿಸಿರಲಿಲ್ಲ ನಂಗಲ್ಲಿ.ಅವ ನನ್ನ ನೋಡಿದಾಗಲೆಲ್ಲಾ ಮುಖ ತಿರುಗಿಸಿಕೊಂಡು ಹೋಗೋವಾಗ ನೋವಿಗಿಂತ ಬೇಸರ ಕಾಡೋದು ನನ್ನ.ಅವನಿಗೆ ಬೇಸರವಾಗದಿರಲಿ ಅನ್ನೋ ಕಾರಣಕ್ಕೆ ಮಾತ್ರ ನಾನಾ ಚಂದದ ಸ್ನೇಹಿತರ ಸ್ವಲ್ಪ ಮಟ್ಟಿಗೆ ದೂರ ಮಾಡಿಕೊಂಡಿದ್ದು.

ಅವನಿಗೊಂದಿಷ್ಟು ಜಾಸ್ತಿ ಅನ್ನೋವಷ್ಟು ಬೈದಿದ್ದೆ ನಾನು .ಅವ ಹುಚ್ಚು ಹುಚ್ಚಾಗಿ ಪ್ರೀತಿಯ ಹೇಳಿಕೊಂಡಾಗ .ಸ್ನೇಹದಲ್ಲಿ ಪ್ರೀತಿ -ಪ್ರೇಮದ ಭಾವವ್ಯಾಕೋ ನಂಗೆ ಸಹ್ಯವಾಗ್ತಿರಲೇ ಇಲ್ಲ.
ತುಂಬಾ ಅನ್ನೋವಷ್ಟು ಈಗೋ, attitude ಇರೋ ಆ ಹುಡುಗ ನನ್ನ ಪೂರ್ತಿಯಾಗಿ ನಿರ್ಲಕ್ಷಿಸಿ ಗೆಳೆತನದ ಬಂಧವನ್ನೂ ಕಳಚಿಕೊಂಡು ಹೋಗಿದ್ದ .
After all, that was a stupid CRUSH ಅಂದುಕೊಂಡು ಸುಮ್ಮನಾಗಿದ್ದೆ ನಾನೂನೂ.

ಮತ್ತೆ ಆ ಮುದ್ದು ಗೆಳೆಯ ಬೇಸರಿಸ್ತಾನೇನೋ ನನ್ನ ನೋಡಿ ಅಂದುಕೊಂಡ್ರೆ ಅವನವತ್ತಲ್ಲಿ ಬಂದಿರಲೇ ಇಲ್ಲ !!

ನನ್ನದೇ ಮನವನ್ನ ಓದಿದೋರ ತರಹ ಅಲ್ಲೊಬ್ಬ ಗೆಳೆಯ ,ಆ ಹುಡುಗನೂ ನಿನ್ನ ತರಹವೇ ಕೈಗೆ ಸಿಕ್ತಿಲ್ಲ.ಹಾಸ್ಟೆಲ್ ನಲ್ಲೂ ತಾನಾಯ್ತು ತನ್ನ ರೂಮಾಯ್ತು ಅನ್ನೋ ತರಹ ತೀರಾ ಬ್ಯುಸಿ ಆಗಿ ಇದ್ದು ಬಿಡ್ತಾನೆ.ಇಡೀ ದಿನ ಪಟ ಪಟ ಮಾತಾಡ್ತಾ ಜಾಸ್ತಿ ತರ್ಲೆ ಮಾಡ್ತಿದ್ದ ಅವನೆಲ್ಲಿ ಕಳೆದು ಹೋದ ಅನ್ನೋದ ಹುಡುಕಿ ಹುಡುಕಿ ಸುಸ್ತಾಯ್ತು ಕಣೇ ..ನೀ ನಮ್ಮಗಳಿಗಿಂತ ಜಾಸ್ತಿಯಾಗಿ ಅವನ ಜೊತೆ ಮಾತಾಡಬಲ್ಲೆ ಕೇಳಿಬಿಡೇ ಅವನಿಗೇನಾಯ್ತೆಂದು ಅಂದಾಗ ಹುಬ್ಬೇರಿಸಿದ್ದೆ ನಾ.
ಅಂದರೆ ಅವ ನನ್ನ ಅವನ ಜಗಳ ,ಮನಸ್ತಾಪಗಳ ಯಾರೆದುರೂ ಹರವಿಲ್ಲ ಅನ್ನೋದರ ಅರಿವು ಸಿಕ್ಕಿ ನನ್ನಲ್ಲೇನೋ ಒಂದು ತರಹದ ಮುಜುಗರ.ನಂಗೊತ್ತು ಅವನ ಅತೀ ಆತ್ಮೀಯರು ಈ ಸ್ನೇಹಿತರೇ ಅನ್ನೋದು.ಆದರೆ ನಾ ಈ ಜಗಳಗಳ,ಅವನ ಪ್ರೀತಿಯ ನಿವೇದನೆಯ ಭಾವಗಳ ಎಲ್ಲಾ ಭಾವಗಳನ್ನೂ ಹಂಚಿಕೊಳ್ಳೋ ಗೆಳೆಯನಲ್ಲಿ ಹೇಳಿದ್ದೆ.ಇಲ್ಲಿ ನಂಗೀ ಗೆಳೆಯ ತೀರಾ ಭಿನ್ನವಾಗಿ ಕಂಡುಬಿಟ್ಟ.

ಯಾರ್ಯಾರದೋ ಎದುರು ನಾ ಸಣ್ಣವನಾಗೋಕೂ ಇಷ್ಟವಾಗಲ್ಲ...ಬೇರೆಯವರನ್ನ ಸಣ್ಣವರನ್ನಾಗಿ ಮಾಡೋಕೂ ಇಷ್ಟವಾಗಲ್ಲ ಅಂತ ಅವತ್ಯಾವತ್ತೋ ಆಡಿದ್ದ ಅವನದೇ ಮಾತುಗಳು ಮನ ಸವರಿ ಎದ್ದು ಹೋಯ್ತು ಕ್ಷಣಕ್ಕೆ!
ಹಾರಿಕೆಗೆ ಸರಿ ಕಣ್ರೋ ವಿಚಾರಿಸ್ತೀನಿ ನಾನು ಅಂತಂದ್ರೂ ನಂಗವನ ಮನದ ಅರಿವು ಸಿಕ್ಕಿ ಬಿಟ್ಟಿತ್ತಲ್ಲಿ!

ಮನದಲ್ಲಾಗುತ್ತಿದ್ದ ಗೊಂದಲಗಳ ಅರಿವು ಸಿಕ್ಕಿರೋ ತರಹ ಕೈ ಹಿಡಿದು ಕಣ್ಣಲ್ಲೇ ಸಮಾಧಾನಿಸಿದ್ದ ನನ್ನೀ ಗೆಳೆಯ.ಅಷ್ಟಾಗಿ ಕನ್ನಡ ಅರ್ಥವಾಗದಿದ್ದರೂ ಅವರುಗಳ ಪ್ರತಿ ಮಾತಿಗೂ ನನ್ನಲ್ಲಾಗುತ್ತಿದ್ದ ಭಾವಗಳ ಸಂಜೆ ಮನೆಗೆ ಬಂದು ಎದುರು ತೆರೆದಿಟ್ಟಿದ್ದ ಇವನ ನೋಡಿ ಆಶ್ಚರ್ಯವಾದುದ್ದಂತೂ ಸುಳ್ಳಲ್ಲ! ಕ್ಷಣವೊಂದಕ್ಕೆ ನಡುಗಿ ಹೋಗಿದ್ದೆ ಇವನೆಲ್ಲಿ ಇಂಚಿಂಚೂ ಬಿಡದೇ ನನ್ನ ಮನಸ್ಸ ಓದಿ ಬಿಡ್ತಾನೋ ಅಂತ.

ಆ ದಿನದ ಪಾರ್ಟಿ ಮುಗಿಸಿ ಒಂದಿಷ್ಟು ಖುಷಿಸಿ,ವರ್ಷಕ್ಕಾಗೋವಷ್ಟು ನಗುವ ತುಂಬಿಕೊಂಡು ,ಮತ್ತೆ ಅವರುಗಳಿಗೆ ಮಿಸ್ ಯು ಅಂದು ಬರೋವಾಗ ಮತ್ತೆ ಕಾಡಿದ್ದ ಬಿಟ್ಟು ಹೋದ (ಎದ್ದು ಹೋದ) ಆ ಗೆಳೆಯ.

ಬರೋವಾಗ ಅವರಂದಿದ್ದ " ಆ ಬ್ಯುಸಿ ಗೆಳೆಯ ಅದೇನೋ ಗಿಟಾರು ಕ್ಲಾಸ್ ಗೆ ಹೋಗ್ತಿದಾನೆ ಕಣೇ ..ನಿಂಗೂ ಗೊತ್ತೆನೋ ..ಸಧ್ಯದಲ್ಲೆ ಅವನಿಂದೊಂದು ಗಿಟಾರು ಪ್ರೋಗ್ರಾಮ್ ಮಾಡಿಸೋಣ " ಅಂತ ಆಗದ ಪ್ರೋಗ್ರಾಮ್ ಒಂದನ್ನ ತುಂಬಾ ಕಾನ್ಫಿಡೆಂಟ್ ಆಗಿ ಹೇಳಿ ತಲೆ ಸವರಿ ,ಕೆನ್ನೆ ಹಿಂಡಿ ಹೊರಟು ಹೋದ ಈ ಗೆಳೆಯ ಹೋದ ದಿಕ್ಕನ್ನೇ ನೋಡೋದ ಬಿಟ್ಟು ನಂಗೇನೂ ಉಳಿದಿರಲಿಲ್ಲ ಮತ್ತೆ ಅಲ್ಲಿ !!!!

ಆ ಗಿಟಾರು ಹುಡುಗ ...

ಮನದ ಅಲೆಯಲ್ಲಿ ಕೊಚ್ಚಿಹೋದ ಕಣ್ಣಂಚ ಹನಿಗಳು ನೆಲ ತಾಕೋಕೂ ಮುಂಚೆ ನನ್ನೀ ಗೆಳೆಯ ಕೈ ಹಿಡಿದು ಕರೆದುಕೊಂಡು ಹೊರಟಿದ್ದ ಅವನ ಮನೆಗೆ.
ಅಮ್ಮನ ಮಡಿಲಲ್ಲಿ ಒಂದು ಕ್ಷಣ ಬಿಕ್ಕ ಬೇಕನಿಸಿ ಕೂತಾಗ ಮತ್ತೆ ನೆನಪಾಗಿದ್ದು..

ಅದೇ ಗಿಟಾರು ಹುಡುಗ.... ಹೌದು ಅವನೇ...

Friday, November 22, 2013

ಸುಮ್ ಸುಮ್ನೆ

ಏನೋ ಕಳಕೊಂಡ ಭಾವದಲ್ಲಿತ್ತು ನಿನ್ನೆಯ ಇಳಿ ಸಂಜೆ.ಸುಮ್ಮನೆ ಟೆರೇಸ್ ನಲ್ಲಿ ಒಂದರ್ಧ ಗಂಟೆ ಕೂರೋಣ ಅಂತ ಹೋದ್ರೆ ಎದುರು ಮನೆಯ ಟೆರೇಸ್ನಲ್ಲಿ ನಿಂತಿದ್ದ ಕೆಂಪಂಗಿಯ ಹುಡುಗ ದುರುಗುಟ್ಟಿಕೊಂಡು ನೋಡುತ್ತಿದ್ದ. ಸಿಗರೇಟು ಸುಡೋಕೆ ಟೆರೇಸೇ ಬೇಕಿತ್ತಾ ಇವನಿಗೆ ಅಂತ ಗೊಣಗಿಕೊಂಡು ಕೆಳಗಿಳಿದು ಬಂದಿದ್ದೆ.ಎಲ್ಲಿಯೂ ಸಮಯ ಸರಿಯದೇ ಕ್ರಿಕೆಟ್ ಆದ್ರೂ ನೋಡೋಣ ಅಂತ ಹೋದ್ರೆ ಸರಿಯಾಗಿ ಅಲ್ಲಿಗೆ ಬ್ರೇಕ್ ಇತ್ತು! ಮತ್ತೆ ಪುಸ್ತಕವ ಹಿಡಿಯೋ ಮನಸ್ಸಾಗದೇ ಆ ಕಡೆ ಈ ಕಡೆ ಓಡಾಡುತ್ತಿದ್ದಾಗ ನೆನಪಾಗಿದ್ದು ಗೋಲ್ ಗಪ್ಪಾ ಅಂಕಲ್.ಅವಾಗ್ಲೇ ನೆನಪಾಗಿದ್ದು ನಾ ನನ್ನ ಹಳೆ ಹುಡುಗನನ್ನ ಮರೆತು ತುಂಬಾ ದಿನಗಳಾದ್ವಲ್ವಾ ಅಂತ!

ನನ್ನ ಇಂತಹುದೇ ಅದೆಷ್ಟೋ ಸಂಜೆಗಳ ಜೊತೆಯಾಗೋದು ಇದೆ ಗೋಲ್ ಗಪ್ಪಾ.ಮಾರು ಮಾರಿಗೊಂದು ಇದ್ರೂ ನಂಗೆನೋ ಈ ಗೋಲ್ಗಪ್ಪಾ ಅಂದ್ರೆ ಲವ್.(ಫಾರ್ ಯುವರ್ ಕೈಂಡ್ ಇನ್ಫೋ: ಗೋಲ್ಗಪ್ಪಾ ಮಾಡಿಕೊಡೋದು ಅಂಕಲ್).ಒಬ್ಬಳೇ ಹೋಗಿ ತಿಂದುಕೊಂಡು ಆ ಅಂಕಲ್ ಜೊತೆ ಮಾತಾಡಿಕೊಂಡು ಅವರನ್ನಷ್ಟು ನಗಿಸಿ ಬರೋದ್ರಲ್ಲೇನೋ ಚಂದದ ತೃಪ್ತ ಖುಷಿ ನಂಗೆ. ಮುಂದೆ ಯೋಚಿಸದೇ ಆ ಕಡೆ ಹೊರಟೆ.ದೂರದಿಂದಲೇ ಮುಗುಳ್ನಕ್ಕ ಅಂಕಲ್ "ಯಾಕೇ ಪುಟ್ಟಿ ತುಂಬಾ ದಿನ ಆಗಿತ್ತು ಈ ಕಡೆ ಬರದೆ "ಅಂತ ಕೇಳಿದಾಗ ಸಲಿಸಾಗಿ ಬಾಯಿಗೆ ಬಂದ "ಪರೀಕ್ಷೆಗಳಿದ್ವು ಅಂಕಲ್ ..ಬರೋಕಾಗಿರ್ಲಿಲ್ಲ" ಅಂತಂದಿದ್ದೆ ಹೌದು.ಆದರೆ ಅತೀ ಇಷ್ಟದ ಇದನ್ಯಾಕೆ ಇಷ್ಟು ದಿನ ಮರೆತು ಬಿಟ್ಟಿದ್ದೆ ಅಂತ ಯೋಚನೆಗೆ ಬಿದ್ದಿದ್ದೆ ನಾ.ಅದೂ ಊಟ ಬಿಟ್ರೂ ಇದನ್ನ ಬಿಡದಿದ್ದ ನಾನು!

ಮತ್ತೆ ರಾತ್ರಿ ಅಪ್ಪ ಅಮ್ಮಂಗೆ ಒಂದಿಡೀ ದಿನದ ನನ್ನನ್ನ ಒಪ್ಪಿಸೋವಾಗ ಹೇಳಿದ್ದೆ "ಅಮ್ಮಾ ಇವತ್ಯಾಕೋ ತುಂಬಾ ದಿನ ಆದ್ಮೇಲೆ ತಿಂದೆ ನೋಡು ..ಮತ್ತೂ ಖುಷಿ ಸಿಕ್ತು ".ಅದಕ್ಕೆ ಅಪ್ಪ ಕಾಲೆಳೆದಿದ್ರು ಇಷ್ಟು ದಿನ ಪಾಪ ಅವರ ಊಟಕ್ಕೆ ಕಡಿಮೆ ಆಯ್ತೇನೋ .ಇವತ್ತು ಅವರಿಗೂ ಒಳ್ಳೆಯ ವ್ಯಾಪಾರ ಬಿಡು ಅಂತೆಲ್ಲಾ. ಅಮ್ಮ ಮುಂದುವರೆಸಿ ಎಷ್ಟು ತಿಂದೆ ಅಂತ ಕೇಳಲ್ಲ ,ಆದರೆ ಪುಟ್ಟಿ ಸ್ವಲ್ಪ ದಿನಕ್ಕೆ ಪರೀಕ್ಷೆಗಳು ನಿಂಗೆ ಹುಷಾರು ನೆಗಡಿಯಾಗುತ್ತೆ ಅಂತೀನ್ನೆನೇನೋ ಮುಗಿಯದ ಅದೇ ಅತೀ ಕಾಳಜಿ.

ಇರಿ ಮಾರಾಯ್ರೇ ..ಹೇಳಹೊರಟಿರೋದು ಗೋಲ್ಗಪ್ಪಾ ಪುರಾಣ ಅಲ್ಲ. ಆಗಲೇ conclusion ಗೆ ಬರಬೇಡಿ.

ಯಾಕೆ ನನ್ನ ಸಂಜೆಗಳು ಕಾಣದೇ ನಾಪತ್ತೆಯಾಗಿದ್ವು ಇಷ್ಟು ದಿನಗಳು ಅಂತ ಏನೋ ದೊಡ್ಡದಾಗಿ ಯೋಚನೆಗೆ ಬಿದ್ದೋರ ತರಹ ಫೋಸ್ ಕೊಟ್ಕೊಂಡು ಅದೇ ಬಾಲ್ಕನಿಯಲ್ಲಿ ಕೂತಿದ್ದಾಗ ಮೊಬೈಲ್ ಬೀಪ್ ಆಗಿತ್ತು ಉತ್ತರ ಸಿಕ್ಕಂತೆ.

ಎಲ್ಲೇ ಹೋದೆ ಕೋತಿ ನಿನ್ನನ್ನೆಷ್ಟು ಕರೆಯೋದು ವಾಟ್ಸ್ಅಪ್(whatsapp)ಗೆ ಅಂತ ಮುಖ ಕೆಂಪಗೆ ಮಾಡಿಕೊಂಡು ಮೆಸೇಜ್ ಮಾಡಿದ್ದ ಗೆಳತಿ.ಅಂದುಕೊಂಡೆ ಹೌದಲ್ವಾ ನಾನಿಷ್ಟು ದಿನ ಕಳೆದುಹೋಗಿದ್ದು ಇಲ್ಲಿಯೇ ಇದ್ದೀತು ಅಂತ.

ರಾತ್ರಿಯಾದ್ರೆ ಸಾಕು ನಿಧಿ ಸಿಕ್ಕೋ ತರಹ whatsappನಲ್ಲಿ ಬಿದ್ದುಕೊಳ್ಳೋ ಸ್ನೇಹಿತರಿಗೆ,ಅಣ್ಣಂದಿರಿಗೆ,ಅಕ್ಕಂಗೆ ಕಾಲೆಳೆಯೋಕೆ ಸಿಗೋದು ನಾ ಮಾತ್ರವೇನೋ ಅಂತ ಅನ್ನೋದೆ ನನ್ನ ದೊಡ್ಡ ಅನುಮಾನ! ತಾ ಮುಂದು ನಾ ಮುಂದು ಅಂತ ಕಿತ್ತಾಡ್ತಾ ಕಾಲೆಳೆಯೋ ಇವರುಗಳನ್ನೆಲ್ಲಾ ಇಷ್ಟು ದಿನಗಳ ಕಾಲ ಸಹಿಸಿಕೊಂಡಿರೋ ನಂಗೆ ನೀವು ಶಹಬ್ಬಾಶ್ ಅನ್ನಲೇ ಬೇಕು.ಹೇಳಿಲ್ಲ ಅಂದ್ರೆ ನಾನೇ ಹೇಳ್ಸ್ಕೊಂತೀನಿ :ಫ್

ಹೀಗೊಬ್ಬ ಚಂದದ ಗೆಳೆಯ ನನ್ನ ಕಾಡಬಂದು ತುಂಬಾ ದಿನಗಳಾದ್ವು ನೋಡಿ.ಟೈಪ್ ಮಾಡೋಕೆ ಬೇಜಾರು (ಅರ್ಧ ಒಪ್ಪಿಕೊಳ್ತೀನಿ ಸ್ವಲ್ಪ ಜಾಸ್ತಿ ಸೊಂಬೇರಿ ನಾ ಅಂತ)ಅನ್ನೋ ನಾನು ರಾತ್ರಿ ೧೦ಕ್ಕೆ ಮಾತು ಶುರು ಮಾಡಿ ೧:೩೦ಗೆ ಮಾತು ನಿಲ್ಲಿಸ್ತಿದ್ದೆ ಅಂತದ್ರೆ ನಿಮ್ಗೂ ಅರ್ಥ ಆದೀತು.

ಅವತ್ತಿವರೆ ನಂಗೆ "ಯಾಕೆ ದಿನಕ್ಕೆ ೪ forward ಮೆಸೇಜ್ ಮಾಡ್ತೀಯ..ಯಾವುದಾದ್ರೂ ಹುಡುಗನ್ನ ಹುಡ್ಕೋ ಮೆಸೇಜ್ ಖಾಲಿ ಮಾಡೋಕೆ"ಅಂತ ಕಾಲೆಳೆದಿದ್ರು.ಆದರೆ ಇವತ್ತು "ರಾತ್ರಿ ಒಂದಾದ್ರೂ whatsapp ನಲ್ಲೇ ಬಿದ್ದಿರ್ತೀಯ ..ಹುಡ್ಗಿ ಹಾಳಾದಂಗಿದೆ" ಅಂತಾ ಇನ್ನೇನೋ ಕಾಲೆಳೆಯ ಬರುತ್ತಾರೆ.ಮಾತಾಡ್ತಾ ಇರೋದು,ಏನೋ ಗಹನ ಚರ್ಚೆಯಲ್ಲಿ ತೊಡಗಿರೋದು ಇವರುಗಳ ಜೊತೆಯೇ ಆಗಿದ್ರೂ ತಲೆಗೊಂದೊಂದು ಕಾಮೆಂಟ್ ಗಳು ಬೀಳ್ತಿರುತ್ತೆ ಸುಮ್ ಸುಮ್ನೆ.

ಮೊದಲೇ ತುಂಬಾ ಅನ್ನೋ ಅಷ್ಟು ಉರಿಯೋ ನಂಗೆ ಇವರುಗಳ ಇಲ್ಲದ ಕಾಮಿಡಿಗಳಿಗೆ ಮೈ ಪರಚಿಕೊಳ್ಳೋ ಅಷ್ಟು ಸಿಟ್ಟು ಬರೋದು.ಎಲ್ಲರಿಗೂ ಒಂದು ಸೈಲೆಂಟ್ ಬಾಯ್ ಅಂದು ಮುದ್ದು ಗೆಳೆಯನನ್ನ ಮೊಬೈಲ್ ನಿಂದ ತೆಗೆದು ೪ ದಿನಗಳಾದ್ವು!!

ಇವತ್ತೂ ಮತ್ತವ ಗೋಲ್ಗಪ್ಪಾ ತಿನ್ನೋಕೆ ಅಂತಾ ಬಿಡುವು ಕೊಡೋದರ ಮೂಲಕ ನೆನಪಾದ.ದಿನವೂ ಹಾಗೆ ಒಂದಲ್ಲ ಒಂದು ಕೆಲಸದಲ್ಲಿ ನೆನಪಾಗ್ತಾನೆ ಪಕ್ಕಾ ಹಳೆಯ ಹುಡುಗನ ತರಾನೆ!

ಎಲ್ಲವೂ ಇದೆ ಇಲ್ಲಿ.ಎಲ್ಲರೂ ಇದ್ದಾರೆ.ಅನ್ ಲಿಮಿಟೆಡ್ ಟಾಕ್ಸ್, ಅನ್ ಲಿಮಿಟೆಡ್ ನಗು..ಒಂದಿಷ್ಟು ಕ್ರೇಜಿ ಗೆಳೆಯರ ಗುಂಪಿದ್ರೆ ಸಾಕು ಲೈಫ್ ಬರ್ಬಾದ್ ಆದಂಗೇ.

LKG ಕ್ರಶ್ ಇಂದ ಶುರುವಾಗೋ ಕಾಲೆಳೆಯೋ ಕೆಲಸ ಬಂದು ನಿಲ್ಲೋದು ಬೆಳಿಗ್ಗೆ ಕ್ಯಾಂಪಸ್ ನಲ್ಲಿ ಸ್ಮೈಲ್ ಮಾಡಿದ್ದ ಸೀನಿಯರ್ ಹುಡುಗನ ತನಕ!ಇನ್ನು ಕ್ಲಾಸಿನಲ್ಲಿರೋ ಒಂದು ತರಲೆ whatsapp ಗೆಳೆಯರ ಗುಂಪಲ್ಲಿ ಖಾಯಂ ಸದಸ್ಯತ್ವ ಸಿಕ್ಕಿದ್ರೆ ಕಥೆ ಮುಗಿದಂತೆ!.ಏನಾಗುತ್ತಿದೆ ಅಂತ ನೋಡೋಕೆ ಹೋಗಿದ್ರೂ ಅವತ್ತಿಡಿ ಅವರ ಬಗೆಗೆ ಮಾತಾಡೋ,ಅವರನ್ನ ತೀರಾ ಅನ್ನೋ ಅಷ್ಟು ಗೋಳು ಹೊಯ್ಯೋ ಈ ಕ್ಲಾಸಿನ ಗುಂಪಿಂದ ತಪ್ಪಿಸಿಕೊಂಡು ಬಂದ್ರೆ ಏನೋ ಸಾಧಿಸಿದ ಖುಷಿ.

ಸುಮ್ಮನೆ ಕಾಲೆಳೀತಾ ಕೂರೋದು ನಂಗಿಷ್ಟ ಆಗಲ್ಲ.ಒಮ್ಮೊಮ್ಮೆ ಉಸಿರುಗಟ್ಟಿಸಿ ಬಿಡೋ ಇವರುಗಳಿಂದ ನೆಮ್ಮದಿ ಸಿಕ್ಕಿ ಒಂದೆರಡು ತಿಂಗಳುಗಳಾದ್ವೇನೋ.

ಇಡಿಯ ಕ್ಲಾಸಿನ ಯುನಿಟಿಯ ಅರಿವು ಸಿಗೋದು ಇಲ್ಲಿಯೇ. ದಿನಕ್ಕೊಬ್ಬರಂತೆ ಟಾರ್ಗೆಟ್ ಮಾಡಿಕೊಳ್ಳೋ ಇವರುಗಳು ಕಾಲೆಳೆಯೋವಾಗ ಮಾತ್ರ ಎಲ್ಲರೂ ಒಂದೇ.ಎಲ್ಲಾ ಸೀಕ್ರೆಟ್ ಗಳು ಬಯಲಾಗೋದು ಇಲ್ಲಿಯೇ.ಏನೋ ತಮಾಷೆಗೆ ಶುರುವಾದ ವಿಷಯ ಚೌಕಟ್ಟಿನಿಂದ ಹೊರ ಬಂದು ಆಮೇಲಲ್ಲಿ ಸರಿಯಾಗಿ ಬೈದ ಮೇಲೆ ಎಲ್ಲಾ ತಣ್ಣಗಾಗಿ ಮಲಗೋದು.

ಇನ್ನಿಲ್ಲಿ ಎಲ್ಲಾ ಲೆಕ್ಚರರ್ಸ್ ಗೂ ಒಂದೊಂದು ಇಡೀ ದಿನದ ಕಾಮೆಂಟ್ ಕಾರ್ಯ ಸಾಗ್ತಿರುತ್ತೆ.ಅಲ್ಲೆಲ್ಲಾ ಸುಮ್ಮನೆ ಏನೇನೋ ಫನ್ನಿ ಫನ್ನಿ ಕಾಮೆಂಟ್ ಮಾಡೋದು ,ಮಾಡೋ ಕಾಮೆಂಟ್ ಗಳಿಗೆ ಎಲ್ಲರೂ ಲೈಕ್ ಕೊಡೋದು...ಹೀಗೆ ಏನೇನೂ ಕಾಂಪಿಟೇಶನ್ ಮೇಲೆ ಮಾಡ್ತಿರ್ತೀವಿ.

ಎಲ್ಲಾ ಭಾವಕ್ಕೂ ಒಂದೊಂದು ಚಂದದ smily ಗಳು ಇರುತ್ತೆ ಇಲ್ಲಿ.ಮೊದಲ ವ್ಯಾಮೋಹಕ್ಕೆ ಕಾರಣ ಈ smily ಗಳೇ ಏನೋ. ತೀರಾ ಕಾಲೆಳೆಯೋ ಗೆಳೆಯಂಗೆ ಕೊಲೆಯಾಗುತ್ತೆ ಅಂತ ಚಾಕು ತೋರಿಸಬಹುದು,ಇಷ್ಟವಾಗದ್ದನ್ನ ಶೂಟ್ ಮಾಡಬಹುದು(ನಂಗೆಲ್ರೂ ಬದನೆಕಾಯಿ ಶೂಟರ್ ಅಂತಾರೆ ಇಲ್ಲಿ).ಅಲ್ಲೊಬ್ಬ ಗೆಳತಿ ಪಂಚ್ ಮಾಡಿದ್ರೆ ಪಂಚ್ ಬ್ಯಾಕ್ ಮಾಡೋಕೆ ಆಗೋದು ಇಲ್ಲಿ ಮಾತ್ರವೇನೋ.ಇನ್ನೊಂದಿಷ್ಟು ಮಹಾನುಭಾವರು ಚಂದಿರನನ್ನೂ ಜೊತೆ ಕಳಿಸಿ ಶುಭ ರಾತ್ರಿ ಹೇಳಿದ್ರೆ ಮತ್ತೊಂದಿಷ್ಟು ಜನ ಕಾಫಿಯ ಜೊತೆ ಮುಂಜಾನೆಯ ಸ್ವಾಗತಿಸೋಕೆ ರೆಡಿ ಇರ್ತಾರೆ.ರಾತ್ರಿ ಬೆಳಗನ್ನದೇ ಇಡೀ ದಿನದ ಎಲ್ಲಾ ಭಾವಕ್ಕೂ ಇಲ್ಲೊಂದಿಷ್ಟು ಸ್ಮೈಲ್ಸ್.ಕತ್ತೆ ,ನಾಯಿ ಅಂತ ಪ್ರೀತಿಯಿಂದ ಬೈಯೋಕೂ ಇಲ್ಲಿ ಸಿಂಬಲ್ಸ್ ಇದೆ!

ಪ್ರೀತಿ,ನಗು,ಮುದ್ದು,ಹಗ್,ಸಿಟ್ಟು,ಕಾಯೋ ಬೇಸರ ಎಲ್ಲಕ್ಕೂ ಒಂದೊಂದು ಸ್ಮೈಲಿ ಗಳು ಸಿದ್ಧವಾಗಿ ನಿಂತಿವೆ.ನಕ್ಕು ನಕ್ಕು ಕಣ್ಣಲ್ಲಿ ನೀರು ಬರುತ್ತೆ ಅಂತಾದಾಗ್ಲೂ ಅದು ಅಭಿವ್ಯಕ್ತವಾಗೋದು ಸಿಂಬಲ್ ಇಂದಾನೆ.

ವಾಯ್ಸ್ ಮೇಸೇಜ್ ಅನ್ನೋ ಇಷ್ಟದ ಆಪ್ಷನ್ ಒಂದು ಮಾತ್ರ ನಾ ದಿನಕ್ಕೆ ೫೦ ಮಾಡ್ತೀನಿ ನೀಟ್ ಆಗಿ.ಅಲ್ಲೆಲ್ಲೋ ದೂರವಿರೋ ಅಕ್ಕ ದಿನಕ್ಕೆರಡು ಮುದ್ದು ಮಾತು,ದಿನಕ್ಕೆರಡು ಪೆದ್ದು ಮಾತಲ್ಲಿ ಮೆಸೇಜ್ ಹಾಕೋವಾಗ ನಾ whatsapp ಯೂಸ್ ಮಾಡ್ತಿರೋದೂ ಸಾರ್ಥಕ ಅನ್ನೋ ಭಾವ.ಮನೆಗೆ ಹೋದಾಗ ಅಪ್ಪಂಗೂ ಹೇಳಿಕೊಟ್ಟು ಅವರ ಮೊಬೈಲ್ ಗೂ ಇನ್ಸ್ಟಾಲ್ ಮಾಡಿ ಬಂದಿದ್ದೆ.ದಿನಕ್ಕೆ ನಾಲ್ಕು ಕಾಲ್ ಮಾಡಿ ಊಟ ಆಯ್ತ,ತಿಂಡಿ ಆಯ್ತ ,ಕ್ಲಾಸ್ ಹೆಂಗಿತ್ತು ...ಅಂತೆಲ್ಲಾ ವಿಚಾರಿಸೋ ಅಪ್ಪ ಅಮ್ಮಂಗೆ ಹೀಗೊಂದು ಹೇಳಿದ್ದರ ಹಿಂದಿನ ಕಾರಣ ಪೀಜಿಯಲ್ಲೆಲ್ಲಾ ನಂಗೆ ಪಾಪು ಪಾಪು ಅಂತ ಆಡಿಕೊಳ್ಳೋದು.ಅಪ್ಪ ಬಿಡದೆ ದಿನಕ್ಕೆ ನಾಲ್ಕು ಬಾರಿ ವಿಚಾರಿಸಿಕೊಳ್ಳೋವಾಗ್ ಖುಷಿ ನಂದಾಗಿದ್ರೂ ಇವರುಗಳ ನಾನ್ ಸ್ಟಾಪ್ ಕಾಮೆಂಟ್ ಗೆ ಹೆದರಿದ್ದೆ ನಾ.ಈಗ ಅಪ್ಪನೂ ಖುಷಿಯಾಗಿ ವಾಯ್ಸ್ ಮೆಸೇಜ್ ಮಾಡೋವಾಗ ನಂಗೆನೋ ಖುಷಿ.

ಇದಷ್ಟು ಮೇಸೇಜ್ ಕಾಲಾಹರಣವಾದ್ರೆ ಇಲ್ಲೊಂದಿಷ್ಟು ತರಲೆ ಗೆಳೆಯ ಗೆಳತಿಯರಿದ್ದಾರೆ. ಅವರುಗಳ ಬಗೆಗೆ ಹೇಳದಿದ್ದೆ ಪೂರ್ತಿಯಾಗದ ಭಾವ .whatsapp dare ಅನ್ನೋ ಡಬ್ಬಾ ಗೇಮ್ ನಲ್ಲಿ ಮೊದಲು ಬಲಿಯಾಗೊದೇ ನಾನು.(ಪಾಪ ನಾನು)ಅಲ್ಲೇನೋ ಕಾಮೆಂಟ್ ಮಾಡಿ ಆಮೇಲವರ ಟ್ರಿಕ್ ಅರಿವಾಗ ಅವರುಗಳು ಹೇಳೋ ಸ್ಟೇಟಸ್ ಹಾಕೋ ಅನಿವಾರ್ಯತೆಗೆ ಸಿಕ್ಕಿಬಿಡ್ತೀನಿ.ಮೊನ್ನೆ ಮೊನ್ನೆ ಗೆಳತಿಯೊಬ್ಬಳ ಸ್ಟೇಟಸ್ ಗೆ ಕಾಮೆಂಟ್ ಹಾಕಿದ ತಪ್ಪಿಗೆ ನನ್ನ ಸ್ಟೇಟಸ್"I still love my ex" ಅಂತ ಹಾಕಬೇಕಿತ್ತು .ಯಾವತ್ತೂ ಮಾತಾಡಿಸಿರದ ಯಾರ್ಯಾರೋ ಬಂದು ಯಾರದು ಹುಡುಗ ಅಂತೆಲ್ಲಾ ಕೇಳೋವಾಗ ಬಿದ್ದು ಬಿದ್ದು ನಕ್ಕಿದ್ದೆ.ನನ್ನ ತರಹವೇ ಬಕ್ರಾ ಆಗಿದ್ದ ಗೆಳೆಯನೊಬ್ಬನ ಸ್ಟೇಟಸ್"I still hate my ex" ಅಂತ ಬಂದಿತ್ತು..ಎಲ್ಲರೂ ನೋಡಿ ಇಬ್ಬರಿಗೂ ಎರಡು ದಿನ ನೀಟ್ ಆಗಿ ಕಾಲೆಳೆದಾದ ಮೇಲೆ ಇಬ್ಬರೂ ಸೇರಿ ಆ ಗೆಳತಿಗೆ ಹೊಗೆ ಹಾಕಿದ್ದಾಯ್ತು! ಹೀಗೇ ಏನೇನೋ ಒಂದಿಷ್ಟು ಇಲ್ಲದ ಹುಡುಗರ ಹೆಸರು ಹೇಳಿ ಕಾಲೆಳೆಯೋ ನಮ್ಮಗಳ ಪರಂಪರೆ ಇಲ್ಲಿಯೂ ಮುಂದುವರೆದಿದ್ದು ವಿಶೇಷ ಅಷ್ಟೇ.!

ಹೇಳೋಕೊದ್ರೆ ಮುಗಿಯದಷ್ಟು ಕಥೆಗಳಿವೆ ಇಲ್ಲಿ ..

ಯಾವಾಗ್ಲೂ ಇಲ್ಲಿಯೇ ಬಿದ್ದುಕೊಂಡಿರೋ ಹುಡುಗಂಗೆ "ಬದುಕಿದೆಯೇನೋ ನಿಂಗೆ ಅಂದ್ರೆ "nope dude ..I have whatsapp" ಅಂತ ತಮಾಷೆ ಮಾಡಿ ಎಲ್ಲರೂ ನಗೋ ತರ ಮಾಡ್ತಾನೆ.ಅಲ್ಲಿನ್ನೊಬ್ಬ ಗೆಳೆಯ ಬ್ರೋಕನ್ ಹಾರ್ಟ್ ಬಗ್ಗೆ ಹಾರ್ಟ್ ಟಚಿಂಗ್ ಪಂಚ್ ಕೊಡ್ತಾನೆ.ಇನ್ನು ನನ್ನ ಬಳಿ ಇರದ ಒಂದಿಷ್ಟು ಕಾಂಟಾಕ್ಟ್ ಗಳು ಅಲ್ಲೆಲ್ಲಿಂದಲೋ ಬಂದು ಹಾಯ್ ಅಂದು ತಲೆ ಕೆರೆದುಕೊಳ್ಳೋ ತರಹ ಮಾಡ್ತಾರೆ ಯಾರಿರಬಹುದು ಅಂತ.

whatsappನಲ್ಲಿ P.hD ಮಾಡ್ತಿರೋ ಹುಡುಗ್ರಾ ಮುಂದಿನ ಅಡ್ವಾನ್ಸ್ಡ್ Appನಲ್ಲಿ ನಮ್ಮ ಬಳಿ ಇರದ ಕಾಂಟಾಕ್ಟ್ ಗಳನ್ನ allow ಮಾಡದ ತರಹ ಮಾಡಿಬಿಡ್ರಪ್ಪ ಪುಣ್ಯ ಬರುತ್ತೆ ನಿಮ್ಮಗಳಿಗೆ :)

ಬಿಡದೇ ಕಾಡ್ತಿರೋ ಈ ಗೀಳಿಂದ ನಾನಂತೂ ಎದ್ದು ಬಂದೆ .ಇನ್ನು ನೀವುಗಳು ಏನೇ ಅಂದ್ರೂ ನಾನಲ್ಲಿ ಬರಲ್ಲ ..ಕಾಲೆಳೆಯೋಕೆ ಬೇರೆಯರವರನ್ನ ಹುಡುಕೋ ನಿಮ್ಮಗಳ ಕೆಲಸಕ್ಕೊಂದು ದೊಡ್ಡ ನಮನ ಹೇಳಿ ,ನಿಮ್ಮಗಳಿಗೆ ಹೇಳದೆಯೇ ಅಲ್ಲಿಂದ ಹೊರಬಿದ್ದೆ.ಮತ್ತೆ ಅಲ್ಲಿ ಬಾ ಅಂದ್ರೆ ನೀವ್ಯಾರು ಅಂತೀನಿ ಅಷ್ಟೇ :ಫ್ ಮಿಸ್ ಮಾಡಿಕೊಳ್ಳೋ ಫನ್ ಗಳ ನಂತರವೂ ನಂಗೊಂದು ಲೈಫ್ ಇದೆ(ಹೆವೀ ಡೈಲಾಗ್ ಅಂತ ಗೊತ್ತು ನಂಗೂನೂ) .

ಅದೆಷ್ಟೋ ಹುಡುಗರ ಲೈಫ್,ಟೈಮ್ ನನ್ನಾ ಉಳಿಸಿದ ಕೀರ್ತಿಯಾದ್ರೂ ಸಿಗ್ಲಿ ನಂಗೆ ..ಮತ್ತೆ ಈ ಹಳೆ ಹುಡುಗ ತೀರಾ ಕಾಡಿದ ದಿನ ವಾಪಸ್ಸಾಗ್ತೀನಿ(ಒಂದೆರಡು ತಿಂಗಳ ನಂತರ).ಅಲ್ಲಿಯ ತನಕ ಕೆಲಸವಿಲ್ಲದ ಒಂದಿಷ್ಟು ಗ್ರುಪ್ ಗಳಿಗೆ,ಒಂದಿಷ್ಟು ನಾನ್ ಸ್ಟಾಪ್ ಸುದ್ದಿಗಳಿಗೆ ಬದುಕು ತುಂಬುತ್ತಿರೋ ಮಚ್ಚಾಸ್ ಅಂಡ್ ಮಚ್ಚಿಸ್  ..ಮಿಸ್ ಮಾಡ್ಕೊಳಿ ನನ್ನನ್ನ :ಫ್ ಅದ್ಯಾವುದೋ ಕಿತ್ತೊಗಿರೋ ಸಾಂಗ್ ಜೊತೆಗೆ .

 

 

Wednesday, November 13, 2013

ಮನಸ್ವೀ...,


ಕಳೆದು ಹೋಯ್ತಲ್ಲೋ ನಾಲ್ಕು ವಸಂತಗಳು ...

ಅವತ್ತು ಮನೆಯಲ್ಲಿ ಮೊದಲ ಮೊಮ್ಮಗಳ ಮದುವೆ ಸಂಭ್ರಮ!ಮನೆಯೂ ಮದುಮಗಳಂತೆ ಸಿಂಗಾರವಾಗಿತ್ತು.ಎಲ್ಲರಿಗೂ ಸಡಗರ...
ಪ್ರೀತಿಯ ಮನೆಯ ದೊಡ್ಡಕ್ಕ ನಿನ್ನರಸಿಯಾಗೋ ಖುಷಿ ನಿಂದಾಗಿದ್ರೆ ಅವಳಿಗಿನ್ನು ಪ್ರತಿ ದಿನ ಕಾಟ ಕೊಡೋಕೆ ,ಮಾತಾಡೋಕೆ,ಜಗಳವಾಡೋಕೆ ಆಗಲ್ವಲ್ಲಾ ಅನ್ನೋ ಬೇಜಾರು ನಮ್ಮಗಳಿಗೆ.ಆದರೂ ಏನೋ ಒಂದಿಷ್ಟು ಖುಷಿಗಳು ...ಅಕ್ಕನ ಜೊತೆ ನೀನೂ ಸಿಕ್ತೀಯ ತರಲೆ ಮಾಡೋಕೆ,ಕಾಟ ಕೊಡೋಕೆ ಅಂತೆಲ್ಲಾ ಏನೇನೋ ...ಆದರೂ ಮನದಲ್ಲೊಂದು ಅಳುಕು ..ಅಕ್ಕನೊಟ್ಟಿಗೆ ಏನೋ ಸ್ವಂತ ಅಕ್ಕನಂತೆಯೇ ಇರೋ ಸಲಿಗೆ,ಮಾತು,ಮಸ್ತಿ ಎಲ್ಲವೂ..ಆದರೆ ನೀ ಹೇಗಿರ್ತೀಯೋ ಏನೋ ಅನ್ನೋ ತರಹದ್ದು ಒಂದಿಷ್ಟು ಭಾವಗಳು ...ಏನೇ ಆದ್ರೂ ಅವತ್ತಲ್ಲಿ ಮುದ್ದು ಅಕ್ಕನ ಮದುವೆ ಸಂಭ್ರಮ .

ಮದುವೆಗೆ ಜೊತೆಯಾಗಿದ್ದ ೧೦ನೇ ಕ್ಲಾಸಿನ ಪರೀಕ್ಷೆಗಳಿಗೊಂದಿಷ್ಟು ಬೈದು ಜೊತೆಯಾಗಿದ್ದೆ ನಾ ಎಲ್ಲರನೂ...ಅಕ್ಕನಲ್ಲಿ ಮಾಡಿದ್ದ ಕೀಟಲೆಗಳಿಗೆ ಲೆಕ್ಕವಿರಲಿಲ್ಲ ..ಅವಳ ಈ ರಾಜಕುಮಾರನ ಬಗೆಗೆ ತುಸು ಜಾಸ್ತಿ ಅನ್ನೋ ಅಷ್ಟು ಕಾಲೆಳೆದಿದ್ವಿ ನಾವುಗಳು.
ಇಡೀ ಮನೆಯಲ್ಲಿ ಗಲಾಟೆ,ಮಾತು,ಹರಟೆ,ಒಂದಿಷ್ಟು ಭರದ ಕೆಲಸಗಳು..

ಅಜ್ಜ ಅಜ್ಜಿಗೆ ಮೊಮ್ಮಗಳ ಮದುವೆ ಗಡಿಬಿಡಿ,ಅಪ್ಪ ದೊಡ್ಡಪ್ಪಂಗೆ ಇನ್ನೂ ಪುಟ್ಟಿಯಾಗಿರೋ ಈ ಹುಡುಗಿ ಇಷ್ಟು ಬೇಗ ಮದುವೆಗೆ ಬಂದ್ಲಾ ಅನ್ನೋ ಆಶ್ಚರ್ಯ ಆದ್ರೆ ನನ್ನಮ್ಮ ,ದೊಡ್ದಮ್ಮಂಗೆ ಮುದ್ದು ಮಗಳಿಗೆ ನಾಳೆಯಿಂದ ಈ ಮನೆ ತವರು ಮನೆಯಾಗಿ ಬಿಡುತ್ತಲ್ಲ ಅನ್ನೋ ಬೇಸರ..ಇನ್ನು ನಂಗೆ, ಎರಡನೇ ಅಕ್ಕಂಗೆ ಈ ಅಕ್ಕ ಜೊತೆ ಇರಲ್ವಲ್ಲಾ ಇನ್ನು ಯಾವಾಗ್ಲೂ ಬಾವನ ಜೊತೆ ಇರ್ತಾಳಲ್ವಾ ಅಂತ ನಿನ್ನ ಮೇಲೊಂದು ಸಣ್ಣ ಹೊಟ್ಟೆಕಿಚ್ಚಾದ್ರೆ ಮೊದಲ ಬಾರಿ ಸೀರೆ ಉಡೋ ಖುಷಿ ಇನ್ನೊಂದು ಕಡೆ..ತಮ್ಮನಿಗೇನೋ ಸಂಭ್ರಮ ಎಲ್ಲರೂ ಅವನನ್ನಪ್ಪಿ ಮುದ್ದು ಮಾಡಿ ಮಾತಾಡ್ತಾರಲ್ಲಾ ಅಂತಾ. ಇನ್ನು ನಿನ್ನೀ ಹೆಂಡತಿಯದು ಒಂದಿಷ್ಟು ಟೆನ್ಷನ್ಸ್ !

ಕೊನೆಗೂ ಜೊತೆಯಾದೆ ಮಾರಾಯ ನೀ ನನ್ನಕ್ಕನಿಗೆ ಅವತ್ತಿದೆ ದಿನ..ಬೇರೆ ಯಾವ ಹುಡುಗನನ್ನೂ ನೋಡೋಕೆ ಬಿಡದೆ ಮೊದಲ ಹುಡುಗನೇ ಸರಿಯಾಗಿ ಪಾಪ ನನ್ನಕ್ಕ ಕೊನೆಗೂ ಸಿಕ್ಕಿದ್ಲು ನೋಡು ನಿಂಗೆ ..ಪುಣ್ಯ ಮಾಡಿದ್ದೆ ನೀ :ಫ್ ;)

ನಂತರದ್ದೆಲ್ಲಾ ಬಿಡು ಶಬ್ಧಕ್ಕೆ ದಕ್ಕದ ಭಾವ.
ಹೀಗೊಬ್ಬ ಬಾವ ಇರ್ತಾನೆ ಅನ್ನೋದರ ಸಣ್ಣ ಕಲ್ಪನೆಯೂ ಇರಲಿಲ್ಲ ನಮ್ಮಗಳಿಗೆ.ಬರಿಯ ಅಕ್ಕನ ಗಂಡನಾಗಿರದೇ ಈ ಮನೆಯ ಮುದ್ದು ಮೊಮ್ಮಕ್ಕಳ ಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆದೆ(ಹೊಟ್ಟೆಕಿಚ್ಚಿದೆ..ಪ್ರೀತಿಯಲ್ಲಿ ನಿಂಗೂ ಒಂದು ದೊಡ್ಡ ಪಾಲು ಇದೆಯಲ್ಲಾ ಅಂತಾ :ಫ್ ) .

ಅದೆಷ್ಟು ಚಂದದ ಭಾವಗಳ ಕಟ್ಟಿಕೊಟ್ಟು ಬಿಟ್ಟೆ ಅಲ್ವಾ ನೀ ? ಇರದಿದ್ದ ಅಣ್ಣನ ಕೊರತೆ ನೀಗಿಸಿದೆ ನಮ್ಮಗಳಿಗೆ.ಜೊತೆಗೆ ಆಡೋಕೆ ಯಾರೂ ಇಲ್ಲ ನಂಗೆ ಅಂತ ಮುಖ ಊದಿಸಿ ಕೂರೋ ತಮ್ಮನಿಗೆ ಚಂದದ ಗೆಳೆಯನಾದೆ.ಅಜ್ಜನಲ್ಲಿ ಹಠ ಮಾಡಿ ಕ್ರಿಕೆಟ್ ಆಡೋ ತಮ್ಮನಿಗೆ ನೀ ಬಂದ ಮೇಲೆ ಅಜ್ಜನ ಜೊತೆ ಕ್ರಿಕೆಟ್ ಆಡಿದ ನೆನಪಿಲ್ವಂತೆ ! ಅಜ್ಜನದೊಂದು ಮುದ್ದು ಆರೋಪ ಇದೆ ನೋಡು ,ನೀ ಬಂದ ಮೇಲೆ ಅಜ್ಜನಿಗೆ ಕೆಲಸವಿಲ್ವಂತೆ.ಯಾಕಂದ್ರೆ ತಮ್ಮ ರಜಾದಲ್ಲರ್ಧ ದಿನ ನಿನ್ನೊಟ್ಟಿಗೆ ಇರ್ತಾನಂತೆ:)

ಅಜ್ಜಿಯ ಮಾತಿಗೆ ಕೂರಿಸಿ ಅಜ್ಜ ಅಜ್ಜಿಯ ಆ ದಿನಗಳ ನೆನಪಿಸಿ ಕಾಲೆಳೆದು ಅವರಿಬ್ಬರೂ ಮನ ಬಿಚ್ಚಿ ನಗೋ ತರ ಮಾಡೋಕಾಗೋದು ತಮ್ಮನ ಬಿಟ್ರೆ ಬಹುಶಃ ನಿನ್ನಿಂದ ಮಾತ್ರ ಸಾಧ್ಯವೇನೋ(ಮೊಮ್ಮಗಂದಿರಿಬ್ಬರಿಗೆ).
ಇನ್ನು ದೊಡ್ಡಪ್ಪ -ದೊಡ್ಡಮ್ಮ, ಅಪ್ಪ-ಅಮ್ಮಂಗೆ ನೀ ದೊಡ್ದ ಮಗನಾಗಿಬಿಟ್ಟಿದ್ದೀಯ ನೋಡು!
ಈ ಮನೆಯಲ್ಲೂ ಪ್ರೀತಿಯ ದೊಡ್ಡ ಪಾಲು ..ಆ ಮನೆಯ ಪ್ರೀತಿಗೆಲ್ಲ ವಾರಸುದಾರ ನೀನೊಬ್ಬನೆ ..ಸಿಗಬೇಕಾದುದ್ದೇ ನಿಂಗೀ ಪ್ರೀತಿ.ಎಲ್ಲರನೂ ಅಷ್ಟು ಇಷ್ಟ ಪಡೋ,ಬಂಧಗಳನಷ್ಟು ಚಂದದಿ ಸಲಹೋ ನಿಂಗೆ ಎರಡೂ ಕಡೆಯ ಚಂದದ ಮುದ್ದು ಭಾವವ ಕೊಡೋ ಮೊಮ್ಮಗನ ಪಾತ್ರ ಸಿಕ್ಕಿದೆಯಲ್ಲೋ ಬಾವಯ್ಯ ..

ನಿನ್ನ ಪ್ರೀತಿ ಮಾಡೋ ಭರದಲ್ಲಿ ಮನೆ ಮಗಳೇ ಇಲ್ಲಿ ಸ್ವಲ್ಪ ಕಡಿಮೆ ಪ್ರೀತಿ ಮಾಡಿಸಿಕೊಳ್ತಾಳಲ್ಲೋ ..ಎಲ್ಲರೂ ಮೊದಲು ಕೇಳೋದು ನಿನ್ನ ಬಗೆಗೆ..ಅಮೇಲವಳನ್ನ ವಿಚಾರಿಸಿಕೊಳ್ಳೋದು! ಈ ಬಗ್ಗೆ ನನ್ನಕ್ಕನೂ ಮಧುರ ಆರೋಪ ಮಾಡ್ತಾಳೆ ಅಳಿಯನೇ ಮೊದಲು ನೆನಪಾಗೋದು ನಿಮ್ಮಗಳಿಗೆ ಅಂತಾ ..ನಾನೂ ಅದೆಷ್ಟೋ ಸಾರಿ ಬೈಸಿಕೊಂಡಿದ್ದೀನಿ ಬಾವ ಮಾತ್ರ ನೆನಪಾಗೋದಲ್ವಾ ಅಂತಾ!(ಈಗಲೂ ಸಹ ವಿಷ್ ಮಾಡೋಕಂತ ನಿನ್ನ ನಂಬರ್ ಗೆ ಫೋನ್ ಮಾಡಿದ್ದಕ್ಕೊಂದು ರೆಡಿ ಇದ್ದ ಅದೇ ಡೈಲಾಗ್ ಬಿತ್ತು ನಂಗೆ)

 

ನಿಜ ಕಣೋ ಬಾವ...ಅದೆಷ್ಟು ಪ್ರೀತಿಯ ಮನೆ(ಮನ) ಅಲ್ವಾ ನಿಂದು ..ನನ್ನಕ್ಕ ಅಲ್ಲಿ ತುಂಬಾ ಖುಷಿಯಾಗಿದ್ದಾಳೆ ಅನ್ನೋದರ ಅರಿವು ಸಿಕ್ಕಾಗಲೆಲ್ಲಾ ನಮ್ಮಗಳ ಮನವೂ ಖುಷಿಸುತ್ತೆ.
ಜೊತೆಗೆ ಈ ಖುಷಿಗೆ ಮತ್ತೊಂದು ಕಾರಣ ಅನ್ನೋ ತರಹ ಮುದ್ದು ಪುಟ್ಟಿ ಕೂಡಾ ಜೊತೆಯಾಗಿ ಎರಡು ವರ್ಷಗಳಾದ್ವು.ನಿನ್ನೆ ಮೊನ್ನೆ ಅವಳ ಬರುವಿಕೆಯ ಎಲ್ಲರೂ ಕಾದ ನೆನಪು!ಅದೆಷ್ಟು ಬೇಗ ವರ್ಷಗಳಾಗಿ ಬಿಟ್ವು ..ಬಹುಶಃ ನಿಮ್ಮಗಳ ಈ ಪ್ರೀತಿ,ಜೊತೆಯಾಗಿರೋ ಭಾವ,ಜೊತೆಗೆ ಈ ಮುದ್ದು ಪುಟ್ಟಿಯ ಮುದ್ದು ಮುದ್ದು ನಡೆ,ಮಾತುಗಳಲ್ಲಿ ನಮಗೆ ವರ್ಷ ಕಳೆದುಹೋಗ್ತಿರೋದರ ಅರಿವು ಸಿಗ್ತಿಲ್ವೇನೊ!ಈ ಪುಟ್ಟಿಯೂ ನಿಮ್ಮಿಬ್ಬರಂತೇ ಎರಡೂ ಮನೆಯ ,ಎಲ್ಲರ ಮನಸ್ಸುಗಳ ಏಕೈಕ ರಾಜಕುಮಾರಿ :)

ಇನ್ನು ಈ ಪ್ರೀತಿ ಸ್ನೇಹದ ಹೊರತು ನೀನಂದ್ರೆ ನನ್ನಲ್ಲೊಂದಿಷ್ಟು ಬದುಕಿದೆ..
ನನ್ನ ಅದೆಷ್ಟೋ ಪ್ರಶ್ನೆಗಳ ಉತ್ತರ (my searching machine ...you can name as my google ) :ಫ್ .ನಂಗೆ ಬಗೆಹರಿಯದ ಅದೆಷ್ಟೋ ಸಾಫ್ಟ್ ವೇರ್ ಗಳ ಬಗೆಗೆ ಮಾಹಿತಿ ಕೊಡೋ ,ಏನೂ ತಿಳಿಯದಿದ್ದ ಆ ದಿನಗಳಲ್ಲಿ ಒಂದಿಷ್ಟು Apps ಗಳ ಪರಿಚಯಿಸಿ ,ಹೇಳಿಕೊಟ್ಟು ಇವತ್ತೊಂದು ವೆಬ್ ಡಿಸೈನ್ ಮಾಡೋವಷ್ಟು ಕಾನ್ಫಿಡೆನ್ಸ್ ಮೂಡಿಸಿರೋ,ಮಾತಂದ್ರೆ ಅಲರ್ಜಿ ಅಂತಿದ್ದವಳಿಗೆ ಬೈದು ಮಾತಾಡೋದನ್ನ, ಇವತ್ತು ಮಾತಿಲ್ಲದಿದ್ದರೇನೋ ಬೇಜಾರು ಅನ್ನೋ ಅಷ್ಟು ಬದಲಾಯಿಸಿರೋ ,
ತೀರಾ ಅನ್ನಿಸೋ ಬೇಸರಗಳಿಗೆ ಕಿವಿಯಾಗೋ , ಯಾವಾಗಲೂ ನಗಿಸೋ ,ಮಾಡಿದ ತಪ್ಪುಗಳಿಗೆ ಕಿವಿ ಹಿಂಡಿ ಸರಿ ಮಾಡೋ,ಸಣ್ಣ ಸಣ್ಣ ವಿಷಯಕ್ಕೂ ತೀರಾ ಅನ್ನೋ ಅಷ್ಟು ಜಗಳವಾಡೋ ,ನಿಮ್ಮನೆಗೆ ಬರದಿದ್ದರೆ ದೊಡ್ಡ ದೊಡ್ದ ಮಾತುಗಳಲ್ಲಿ "ನಾವ್ಯಾರು ನಿಂಗೆ ನೆನಪಿರಲ್ಲ ಅಲ್ವಾ..ಮರೆತುಬಿಟ್ಟೆ ಅಲ್ವಾ ,ಚಿಕ್ಕಮಗಳೂರ ನೆನಪಲ್ಲಿ ನಾವೆಲ್ಲಾ ಮರೆವು " ಅಂತ ಹೇಳೋ,ಕಾಳಜಿಸೋ ,ಬೇಸರಿಸೋ,ಕೋಪಮಾಡಿಕೊಳ್ಳೋ,ಸಣ್ಣ ಗೆಲುವಿಗೂ ಬೆನ್ನು ತಟ್ಟೋ ,ದೊಡ್ಡದೊಂದು ಅಭಿನಂದನೆ ಹೇಳೋ ..ಇನ್ನೂ ಅದೆಷ್ಟೋ ಭಾವಗಳ ಜೊತೆ ಇರೋ,ಕನಸುಗಳಿಗೆ ನೀರೆರೆದು ಪೋಷಿಸೋ ,ಸೋತಾಗ ಧೈರ್ಯ ತುಂಬೋ,ಬೀಗೋವಾಗ ಗುದ್ದಿ ಬೀಗೋ ಗುಣಗಳ ಕಡಿಮೆಯಾಗಿಸೋ..... ಅಣ್ಣ,ಗೆಳೆಯ,ಆತ್ಮೀಯ ,ಮುದ್ದಕ್ಕನ ಮುದ್ದು ಗಂಡ ಈ ಬಾವ :)

ಇರಲಿ ಹೀಗೊಂದು ಚಂದದ ಭಾವ ಬಂಧ ಈ ಬಾವನೊಡನೆ,ಮನಸ್ವಿಯ ಜೊತೆ ಯಾವಾಗಲೂ.

ನಿನ್ನೊಟ್ಟಿಗೆ ಮಾಡಿದ್ದ ಅದೆಷ್ಟೋ ಕಿಲಾಡಿತನಗಳಿವೆ ..ನೀನೂ ನಮ್ಮೊಟ್ಟಿಗೆ ಸೇರಿದಾಗ ನಮ್ಮಗಳ ತರಹವೇ ಆಡೋ ಒಂದಿಷ್ಟು ತರಲೆಗಳಿವೆ...ಅಕ್ಕ ಬಂದು ಜೋರು ಮಾಡಿ ಪುಟ್ಟಿ ಮಲಗಿದ್ದಾಳೆ ಅನ್ನೋ ತನಕವೂ ನಮ್ಮಗಳ ಮನೆ ಹಂಚು ಹಾರಿಸೋ ಕೆಲಸ ಸಾಗ್ತಾನೆ ಇರುತ್ತೆ ಜೊತೆ ಸೇರಿದ್ದಾಗ...ಅಕ್ಕನಿಗೆ ಕಾಲೆಳೆದು ,ಗೋಳು ಹೊಯ್ಯೋ ನಿನ್ನಲ್ಲಿ ಕಳಿಸಿಕೊಡೋ ಅವಳನ್ನ ಮನೆಗೆ ಅಂದ್ರೆ ಮಾತ್ರ "ನೀನೇ ಬಾ ನಮ್ಮನೆಗೆ ,ನಿನ್ನಕ್ಕನ ಕಳಿಸಿದ್ರೂ ನನ್ನ ಮಗಳನ್ನಂತೂ ಕಳಿಸಲ್ಲ "ಅನ್ನೋ ಸಿದ್ಧ ಉತ್ತರವೊಂದು ಯಾವಾಗ್ಲೂ ರೆಡಿ ಇರುತ್ತೆ !! ಹಾಗಾಗಿ ನಿಮಗಿಬ್ಬರಿಗಲ್ಲದಿದ್ರೂ ಮಗಳಿಗೆ ಸೋತು ನಾವುಗಳೂ ಅರ್ಧ ರಜೆಯನ್ನ ನಿಮ್ಮನೆಯಲ್ಲಿ ಕಳೆಯಲೇ ಬೇಕಿರುತ್ತೆ.ಮತ್ತೆ ನಿಂದದೇ ಆರೋಪದ ಪಟ್ಟಿ ಸಿದ್ದವಿರುತ್ತೆ ಮತ್ತೊಮ್ಮೆ ನಾ ಮನೆಗೆ ಬರೋ ಹೊತ್ತಿಗೆ "ಈ ಹುಡುಗಿ ದೊಡ್ಡೋಳಾಗಿದಾಳೆ ,ಇವಳಿಗೆ ನಾವುಗಳು ನೆನಪೂ ಇರಲ್ಲ" ಅಂತಿನ್ನೇನೇನೋ ಬ್ಲಾ ಬ್ಲಾ ಮಾತುಗಳು ಮತ್ತೆ ನಿಮ್ಮನೆ ಕಡೆಗೆ ಎಳೆದುಕೊಂಡು ಹೋಗುತ್ತೆ ನನ್ನನ್ನ
(ಈ ಮಾತುಗಳಿಗೆ ನೀ ಅಜ್ಜ ಅಜ್ಜಿಯಲ್ಲಿ ಬೈಸಿಕೊಳ್ತೀಯ ಯಾವಾಗ್ಲೂ ...ಅರ್ಧ ರಜೆ ನಿಮ್ಮನೆಯಲ್ಲೇ ಇರ್ತಾಳೆ ಅವ್ಳು ..ನಮ್ಮಗಳಿಗೂ ಬಿಡೋ ಸ್ವಲ್ಪ ಮಾತುಗಳಾಡೋಕೆ ಅವಳೊಟ್ಟಿಗೆ ಅನ್ನೋ ಅವರ ಬೇಸರಕ್ಕೆ).

ಏನೇ ಆಗಲಿ ಬಾವ...ಒಂದಿಷ್ಟು ಹುಸಿ ಮುನಿಸು ,ನೀ ಕಾಲೆಳೆಯೋ ನನ್ನ ಚಂದದ ಕನಸ ಹುಡುಗ,ಒಂದಿಷ್ಟು ಆತ್ಮೀಯತೆ,ತೀರಾ ಆಗೋ ಸಲುಗೆ ಕೊನೆಗೆ ನನ್ನ ಆ ಕನಸ ಹುಡುಗನನ್ನ ನೀ ಪಾಪ ಅಂದು ಒಂದಿಷ್ಟು ಆಡಿಕೊಂಡ ಮೇಲೆ ನನ್ನ ಸಿಟ್ಟಲ್ಲಿ ಮುಗಿದು ,ಅಕ್ಕನ ಮುದ್ದಲ್ಲಿ ಮತ್ತೆ ಶುರುವಾಗಿ ಮತ್ತದೇ ದಿನಚರಿ ಮುಂದುವರೆಯೋವಾಗ ಏನೋ ಒಂದಿಷ್ಟು ಖುಷಿಗಳು ನನ್ನೊಳಹೊಕ್ಕ ಅನುಭವ.

ನಂಗತೀ ಇಷ್ಟ ನಿಮ್ಮಗಳ ಪ್ರೀತಿ...

ಮುದ್ದಿಸೋ ಅಕ್ಕ,ಪ್ರತಿಯ ಹೆಜ್ಜೆಯಲ್ಲೂ ಬದುಕ ಹೇಳಿಕೊಡೋ ಬಾವ,ಅಲ್ಲಿಂದಲೇ ನನ್ನೆಲ್ಲಾ ಭಾವಗಳಿಗೂ ಸಾಥ್ ನೀಡೋ ಇದೇ ಅಕ್ಕನ ಪಡಿಯಚ್ಚು ಇನ್ನೊಂದು ಅಕ್ಕ,ಪ್ರೀತಿ ಮಾಡೋ ಅಣ್ಣನಾಗೋ ತಮ್ಮ , ಪ್ರೀತಿಯ ಅರಮನೆಯ ಈ ಮುದ್ದು ದೊಡ್ದಕ್ಕ -ಬಾವಂಗೆ ಇಲ್ಲಿಂದೊಂದು ಶುಭಾಶಯ ಹೇಳ ಬಂದೆ ನಾನಿವತ್ತು ಈ ಅಕ್ಕನ ತವರು ಮನೆಯ ಕಡೆಯಿಂದ :)

ಚಂದದ ದಾಂಪತ್ಯದ ಒಲವಲ್ಲಿ,
ಸ್ನೇಹದ ಸಲುಗೆಯ ಸೆಲೆಯಲ್ಲಿ,
ಪ್ರೀತಿಸೋ ಜೀವಗಳ ಆಶಯಗಳಲ್ಲಿ,
ಮುದ್ದು ಪುಟ್ಟಿಯ ನಗುವಲ್ಲಿ,
ಅಜ್ಜಾ ಅಜ್ಜಿಯ ಕಣ್ರೆಪ್ಪೆಯ ಜೋಪಡಿಯಲ್ಲಿ,
ಅಪ್ಪ ಅಮ್ಮನ ಬದುಕ ಕನಸುಗಳಲ್ಲಿ,
ಇರಲಿರಲಿ ಈ ಒಲವ ಪ್ರೀತಿ ಚಿರಕಾಲ ಹೀಗೇ .
ನಗುತಿರಿ ಯಾವತ್ತೂ ...ತಬ್ಬಿರೋ ಈ ಬಂಧಗಳ ಜೊತೆ.....

ಪ್ರೀತಿಯಿಂದ ,
ನಿಮ್ಮನ್ನ ಪ್ರೀತಿಸೋ ಮನೆ ಮಂದಿ

Monday, November 11, 2013

ಹೀಗೊಂದು ಧನ್ಯತೆಯ ಭಾವ...



ಇವತ್ತಿಲ್ಲಿ ನಿರುಪಾಯದ ಐವತ್ತು ಭಾವಗಳ ಒಡತಿಯಾಗಿ ಹೀಗೊಂದು ಬ್ಲಾಗ್ ಮುಖಪುಟದ ಖುಷಿಯ ಹಂಚಿಕೊಳ್ಳೋಕೆ ನಾ ಬಂದೆ ತುಂಬಾ ದಿನದ ನಂತರ ಮತ್ತೆ ಭಾವಗಳ ಅರಮನೆಗೆ..

(ನೀವು ತೀರಾ ಇಷ್ಟಪಟ್ಟಿದ್ದ ೭ ನಿರುಪಾಯದ ಭಾವಗಳ ಬದಿಗಿರಿಸೋಕೆ ಹೋಗಿ ಆ ಭಾವಗಳು ಬ್ಲಾಗ್ ಇಂದಾನೇ ಕಾಣೆಯಾದುದ್ದಕ್ಕೆ ಕ್ಷಮೆ ಕೇಳ್ತಾ )

ಕುಳಿತು ಮಾತಾಡಿದ್ದಿಲ್ಲ ...ಅಲ್ಲೆಲ್ಲೋ ಫೇಸ್ಬುಕ್ ಮೇಸೇಜ್ ಗಳಲ್ಲಿ ಅಪರೂಪಕ್ಕೆ ಮಾತಾಡಿದ್ದು ಬಿಟ್ಟರೆ ನಂಗ್ಯಾವ ಪರಿಚಯಗಳೂ ಇಲ್ಲ .ಬ್ಲಾಗ್ ಓದಿ ಕಾಮೆಂಟಿಸಿ ಸುಮ್ಮನಾಗೋ ಅಷ್ಟೇ ಪರಿಚಯ ಅವತ್ತು ನಂಗಿದ್ದಿದ್ದು..ಮಾತಾಡೋದು ಕಡಿಮೆ .ಸುಮ್ಮನೆ ಕುಳಿತು ಮಾತು ಕೇಳೋದೇ ಇಷ್ಟ ...ಹೀಗೋರಾವಾಗ ಬ್ಲಾಗ್ ನಲ್ಲಿ ಸಿಕ್ಕಿದ್ದ ಅಣ್ಣ ಪ್ರೀತಿಯಿಂದ ನನ್ನೆಲ್ಲಾ ಭಾವಗಳನೂ ಓದಿ ,ಮೆಚ್ಚಿ, ಬೆನ್ನು ತಟ್ಟಿ ಪ್ರೋತ್ಸಾಹಿಸಿ ಕರೆದು ಮಾತಿಗೆ ಕೂರಿಸಿದ್ರು. ನನ್ನ ಮಾತು ಶುರುವಾಗಿದ್ದು ಇವತ್ತಿಲ್ಲಿ ಸುಮ್ಮನೆ ಕೂರೋಕೆ ಆಗದಷ್ಟು ಮಾತಾಡೋಕೆ ಬಂದಿದ್ದು ಅಲ್ಲಿಂದಲೇ ಏನೋ .

ವಾರದ ಹಿಂದಿನ ಭಾವವಿದು ...ನನಗಷ್ಟಾಗಿ ಪರಿಚಯವಿಲ್ಲದಿದ್ದರೂ ,ಅದೆಷ್ಟೋ ಬ್ಲಾಗ್ ಗಳ ನೋಡದಿದ್ದರೂ ಬ್ಲಾಗಿಗರ ಬಳಗದಲ್ಲಿ ನಾ ಪುಟ್ಟ ತಂಗಿ ಅನ್ನೋದರ ಅರಿವಿತ್ತು .ಆದರೆ ಒಮ್ಮೆಯೂ ಮಾತಾಡದೇ ಎದುರು ಬಂದಾಗ "ನೀವು ಅವರಲ್ವಾ?" ಅಂತ ನೀವೆಲ್ಲಾ ಗುರುತಿಸುತ್ತೀರ ಅನ್ನೋದು ಖಂಡಿತ ಗೊತ್ತಿರಲಿಲ್ಲ .ನಾನವತ್ತೂ ಹೇಳಿದ್ದೆ ..ನಂಗ್ಯಾರೂ ಗೊತ್ತಿಲ್ಲ .ಅಲ್ಲಿ ಬಂದು ಸುಮ್ಮನೇ ಮುಖ ಮುಖ ನೋಡೋದಾಗುತ್ತೆ ಅಂತ .ಆದರೆ ನಾನಂದುಕೊಂಡಿದ್ದು ತಲೆಕೆಳಗಾಗಿತ್ತು. ನಗುಮೊಗದಿ ಸ್ವಾಗತಿಸೋ ಅಣ್ಣಂದಿರು ..ಕೂಸೆ ಅಂತಾನೆ ಮಾತಾಡಿಸೋ ದೊಡ್ಡಣ್ಣ , ಅಕ್ಕಾ ಹೆಚ್ಚೋ ಅಣ್ಣ ಹೆಚ್ಚೋ ಅಂತ ಮುಖ ಊದಿಸಿ ಪ್ರೀತಿಯಿಂದ ಮನೆಗೆ ಆಮಂತ್ರಿಸೋ ಈ ಅಣ್ಣ ಅತ್ತಿಗೆ ,ಎಷ್ಟು ಹೊತ್ತಿಗೆ ಬರ್ತೀಯ, ಗೊತ್ತಾಗುತ್ತಾ ಬರೋಕೆ ಅಂತ ಕಾಳಜಿಸೋ ನಾ ಕಾಡಿ ಬೇಡಿ ಅಲ್ಲಿಯೇ ಉಳಿಸಿಕೊಂಡಿದ್ದ ಗೆಳೆಯ,ನೀನಲ್ಲಿಂದ ಬಂದಿದ್ದು ಖುಷಿ ಆಯ್ತು ಅಂತ ಪೂರ್ತಿಯಾಗಿ ಮಾತಿನಲ್ಲೇ ಕಟ್ಟಿ ಹಾಕೋ ಇವರುಗಳ ಜೊತೆಗಿನ ಆ ದಿನ ನಾನಂದುಕೊಂಡಿದ್ದು ನಾನಿಲ್ಲಿಗೆ ಬರದಿದ್ರೆ ಏನನ್ನೋ ಕಳಕೊಳ್ತಿದ್ದೆ ಅಂತ .

ಇಲ್ಲೊಂದಿಷ್ಟು ಸಂಭ್ರಮವಿತ್ತು ..ಎಲ್ಲರ ಮುಖದಲ್ಲೂ ಏನೋ ಒಂದು ಲವಲವಿಕೆಯಿತ್ತು...ತೀರಾ ಅನ್ನೋ ಖುಷಿಗಳಿದ್ವು ...ಹರಟೆಯಿತ್ತು,ಮಾತಿತ್ತು,ನಗುವಿತ್ತು,ಕಲರವವಿತ್ತು ....

ಮನೆಯಲ್ಲಿನ ಹಬ್ಬಕ್ಕಿಂತಲೂ ಇಲ್ಲಿಯ ಹಬ್ಬವೇ ತೀರಾ ಚಂದವಾಗಿತ್ತು ...

ಎಲ್ಲರೂ ಅವರ ಪುಸ್ತಕ ಬಿಡುಗಡೆಯಾಗ್ತಿದ್ದ ಖುಷಿಗಿಂತ ತುಸು ಜಾಸ್ತಿ ಖುಷಿಯಲ್ಲಿದ್ದರು..ಬ್ಲಾಗ್ ಮುಖ ಪುಟದ ಸ್ನೇಹದ ಅಲೆಯಲ್ಲಿ ಎಲ್ಲರದೂ ಮಿಂದೆದ್ದ ಚಂದದ ಭಾವ.ಪ್ರೀತಿ ಒಲವಲ್ಲಿ ಭಾವ ತೀವ್ರತೆಯಲ್ಲಿ ತೇಲುತ್ತಿದ್ದ ಈ ಭಾವ ವಾರದ ಹಿಂದೆ ನಯನ ಸಭಾಂಗಣದಲ್ಲಿ ಸೇರಿದ್ದ ಎಲ್ಲರಿಗೂ ದಕ್ಕಿತ್ತು ಅಂದರೆ ಅತಿಶಯೋಕ್ತಿ ಆಗಲಾರದು ..

ನಂಗಿಲ್ಲಿ ದಕ್ಕಿದ್ದು ಒಂದಿಷ್ಟು ಹೇಳಲಾಗದ ಖುಷಿಗಳು ..ನಾನ್ಯಾರಿಗೂ ಪರಿಚಯವಿಲ್ಲ ಅಂತ ಹಿಂದಿನ ದಿನವಷ್ಟೇ ತಮಾಷೆ ಮಾಡಿದ್ದಾಗ "ನನ್ನ ಕ್ಯಾಮರಾಕ್ಕಂತೂ ನೀ ಚಿರಪರಿಚಿತೆ" ಅಂತ ಕಾಲೆಳೆದಿದ್ದ ಅಣ್ಣ ಪ್ರೀತಿಯಿಂದ ಎಲ್ಲರಿಗೂ ಇವಳು ನನ್ನ ಎರಡನೇ ಮಗಳು ಅನ್ನೋವಾಗ ಮಾತಿರಲಿಲ್ಲ ನನ್ನಲ್ಲಿ. ಮನ ತುಂಬಿತ್ತು .ಎಲ್ಲರೂ ಕಾಕಾ ಅಂತಿದ್ದ ಈ ಹಿರಿಯರ ನೋಡಿ ,ಮಾತಾಡಿದಾದ ಅವರು ನಕ್ಕು ಚಂದದ ಶುಭಾಶಯವೊಂದ ಹೇಳಿದಾಗ ಸಿಕ್ಕ ಧನ್ಯತೆಯ ಭಾವಕ್ಕೆ ನೀವು ಕಾರಣರು ಅಣ್ಣಾ...ಮೊದಲ ಭೇಟಿಯ ಈ ಸಂಭ್ರಮದಲ್ಲಿ ಪ್ರೀತಿಯಾಯ್ತು ನನ್ನ ಮೇಲೆ ನಂಗೇ :ಫ್

ಇಲ್ಲೊಂದು ಚಂದದ ಗೆಳೆಯರ ಬಳಗವಿದೆ.ಎಲ್ಲರನೂ ಕಾಲೆಳೀತಾ ,ಎಲ್ಲರನೂ ನಗು ಮೊಗದಿ ಮೋಡಿ ಮಾಡೋ ಇವರುಗಳ ಜೊತೆ ಒಂದೆರಡು ಗಂಟೆ ಕುಳಿತು ಈ ಚಂದದ ಕಾರ್ಯಕ್ರಮದ ಖುಷಿಯ ದಕ್ಕಿಸಿಕೊಂಡಿದ್ದಾಗಿದೆ.ಈ ಪ್ರೀತಿಗೆ ,ಇವರೆಲ್ಲರ ಈ ಆತ್ಮೀಯತೆಗೆ ಹೇಳ ಬೇಕಿರೋ ಮಾತುಗಳೆಲ್ಲಾ ಇಲ್ಲೆಯೇ ಉಳಿದಿದೆ.ನಿಮ್ಮ ಈ ಪ್ರೀತಿ ಆ ದೇಶದಲ್ಲಿರೋ ಅಣ್ಣನನ್ನ ಇದೊಂದು ದಿನಕ್ಕಾಗಿ ಇಲ್ಲಿಯ ತನಕ ಎಳೆದುಕೊಂಡು ಬಂದಿದೆ ಅಂತಾದ್ರೆ ನಿಜಕ್ಕೂ ಹೆಮ್ಮೆಯಾಗುತ್ತೆ ನಿಮ್ಮೆಲ್ಲರ ಮೇಲೆ ..ಬ್ಲಾಗ್ ಪ್ರೀತಿಯೇ ಅಂತಹುದ್ದೇನೋ ..ಎಲ್ಲರನೂ ಕಾಡುತ್ತೆ ,ಎಲ್ಲರನೂ ಅಪ್ಪುತ್ತೆ ,ಎಲ್ಲರಿಗೂ ದಕ್ಕುತ್ತೆ ಕೂಡಾ....

ಸಿಕ್ಕ ಒಂದಿಷ್ಟು ಡೈರಿಮಿಲ್ಕ್ ನಲ್ಲಿ ಸಧ್ಯ ಲಾಲಿಪಾಪ್ ಪುಟ್ಟಿಯನ್ನಾಗಿ ಮಾಡಲಿಲ್ಲ ಇವರೆನ್ನ ಅಂದುಕೊಳ್ಳುತ್ತಿದ್ದಾಗಲೇ ಅಲ್ಲೆಲ್ಲೋ ಸಿಕ್ಕ ಲಾಲಿಪಾಪ್ ! ಮುಖ ಊದಿಸಿ ಪುಟ್ಟಿಯಲ್ಲ ನಾ ಅಂದ್ರೆ ನಿಂಗೆ ಅಂತಾನೆ ಅಲ್ಲಿಂದ ತಂದಿದ್ದು ಕಣೇ ನೀ ಇಲ್ಲಿ ಎಲ್ಲರಿಗೂ ಪುಟ್ಟಿನೇ ಅಂತ ಎಲ್ಲರೂ ನಗೋ ತರ ಮಾಡೋ ಬ್ಲಾಗಿನಿಂದಲೇ ಪರಿಚಿತನಾಗಿರೋ ಆತ್ಮೀಯ.ಖುಷಿಯಿದೆ ನಿಮ್ಮಗಳ ಎದುರು ಪುಟ್ಟ ಪುಟ್ಟಿಯಾಗಿರೋಕೂ...

ನಿಮ್ಮೆಲ್ಲರ ಜೊತೆ ಮಾತಾಡಿ ನಕ್ಕ ಆ ಚಂದದ ಬೆಳಗು ...ಕಲೆತು ,ಕುಳಿತು ,ಹರಟಿ ,ಜಗಳವಾಡಿ ಎಲ್ಲರೊಟ್ಟಿಗೆ ಊಟ ಮಾಡಿದ ಆ ಚಂದದ ಮಧ್ಯಾಹ್ನ .....ಅಣ್ಣ ಅತ್ತಿಗೆ ಪುಟ್ಟ ತಂಗಿಯ ಜೊತೆಗೆ ಮಗಳಾಗಿ, ತಂಗಿಯಾಗಿ,ಅಕ್ಕನೂ ಆಗಿ ಮಾತಾಡಿ , ರಾತ್ರಿಯನೂ ಬಿಡದೆ ಇಡೀ ದಿನ ನಕ್ಕ ಆ ದಿನ...

ಹೌದು...ಇಲ್ಲೊಂದು ಚಂದದ ಮನೆಯಿದೆ..ಭಾವಗಳ ಜೋಪಾನ ಮಾಡೋ ಆತ್ಮೀಯ ಮನೆಮಂದಿಯಿದ್ದಾರೆ.ಅಣ್ಣಂದಿರ ಪ್ರೀತಿ,ಅಕ್ಕಂದಿರ ಮುದ್ದು ,ತಂಗಿಯ ಕೀಟಲೆ,ಕಾಲೆಳೆಯೋ ,ನಗಿಸೋ ಗೆಳೆಯರ ದೊಡ್ಡ ಬಳಗ ಎಲ್ಲವೂ ಇದೆ ಈ ಕುಟುಂಬದಲ್ಲಿ.ಬರೆದಿದ್ದು ಬರಿಯ ೫೦ ಸಾದಾ ಸೀದಾ ಭಾವಗಳು ..ಪಡೆದಿದ್ದು ಒಂದು ದೊಡ್ಡ ಪ್ರೀತಿಯ ಪರಿವಾರ ಅನ್ನೋದರ ಅರಿವು ಸಿಕ್ಕಿದ್ದು ಮಾತ್ರ ಈಚೆಗೆ !!...ಮೊಗೆ ಮೊಗೆದು ಕೊಡೋ ನಿಮ್ಮ ಪ್ರೀತಿಗಳ ಹಾಗೆಯೇ ಜೋಪಾನ ಮಾಡ್ತೀನಿ ನಾ.

ಹೀಗೊಂದು ಚಂದದ ಮನೆಯ ಮುದ್ದಿನ ಪುಟ್ಟಿ ಅನ್ನೋ ಕೋಡಿನ ಜೊತೆಗೆ -

ಬರೆದಿರೋ ಐವತ್ತೂ ಭಾವಗಳ ಪ್ರೀತಿಯಿಂದ ಓದಿ ಪ್ರೋತ್ಸಾಹಿಸಿದ್ದೀರ..ತಪ್ಪುಗಳನ್ನೂ ಚಂದವಾಗೇ ತಿಳಿಸಿಕೊಟ್ಟಿದ್ದೀರ ..ಅಲ್ಲಿ ಮೊದಲ ಭೇಟಿಯಲ್ಲಿ ಆತ್ಮೀಯರಾಗಿದ್ದೀರ..

ಇರಲಿರಲಿ ಈ ಪ್ರೀತಿ ಚಿರಕಾಲ ಹೀಗೆ...

ಪ್ರೀತಿಯಿಂದ,

ನಿರುಪಾಯಿ  ನಾ
  
 

Saturday, October 5, 2013

so much to say ...


     

ಬರಿಯ ಭಾವಗಳ ತೇರಲ್ಲಿ ಜೊತೆಯಾದವರು..ಭಾವಗಳ ಸಂತೆಯಲ್ಲಿ ಎಲ್ಲೋ ಒಂದೆರಡು ಭಾವಗಳ ಕೊಂಡುಕೊಳ್ಳೋಕೆ ಬಂದವರು ಹರಾಜಿನಲ್ಲಿ ಸಿಕ್ಕಿದ ಭಾವಗಳನ್ನೆಲ್ಲಾ ಬಿಡದೇ ಜೋಪಾನ ಮಾಡೋರು...ಒಂದಿಷ್ಟು ಭಾವಗಳಿಗೆ ಮೂಲವಾಗಿ ಇನ್ನೊಂದಿಷ್ಟು ಭಾವಗಳಲ್ಲಿ ಕೊನೆಯಾಗೋರು.
ನಿಜ, ಅದೆಷ್ಟೋ ಭಾವಗಳಿಗೆ ಸಾಥ್ ಕೊಟ್ಟು,ಗೊಂದಲಗಳಿಗೆ ಮಾತಾಗಿ,ಬೇಸರಗಳಿಗೆ ಕಿವಿಯಾಗಿ,ಪ್ರತಿ ಸಲವೂ ಮನವ ಸಮಾಧಾನಿಸ ಬರೋ ಚಂದದ ಸ್ನೇಹ ಬಳಗವಿದು .

ಯಾವತ್ತೂ ಶಾಶ್ವತತೆಯ ಮಾತಾಡದ ಗೆಳೆಯ ಎದುರು ನಿಂತು ಹೀಗೊಂದು ಸ್ನೇಹವನ್ನ ಕೊನೆಯ ತನಕ ಜತನ ಮಾಡ್ತೀನಿ ಪುಟಾಣಿ ಅಂತಾನೆ !

ತನ್ನ ಯಾವ ಭಾವಗಳನ್ನೂ ಹಂಚಿಕೊಂಡಿರದ ,ಆದರೂ ಅತೀ ಆತ್ಮೀಯ ಅನ್ನಿಸೋ ಹುಡುಗ ಮಧ್ಯ ರಾತ್ರಿ ಮನ ಬಿಕ್ಕೋ ಚಳಿಗೆ ಬೆಚ್ಚಗಿನ ಸಾಂತ್ವಾನ ಆಗ್ತಾನೆ .

ಅಷ್ಟಾಗಿ ಭಾವಗಳ ಹಂಚಿಕೊಂಡಿರದಿದ್ದರೂ ಅಲ್ಲೊಬ್ಬ ಹುಡುಗ ಜೀವದ ಗೆಳೆಯ ಅನಿಸಿಬಿಡ್ತಾನೆ .ಗೆಳೆತನಕ್ಕೊಂದು ಮಧುರ ನಾಮಕರಣ ಮಾಡ್ತಾನೆ.

ಮುಖವನ್ನೇ ನೋಡಿರದಿದ್ದರೂ ತೀರಾ ಪರಿಚಿತರಂತೆ ಅನಿಸಿಬಿಡ್ತಾರೆ ಕೆಲ ಮಂದಿ ...ಕಾಲೆಳೆದು ,ತಮಾಷೆ ಮಾಡಿ ,ಪೂರ್ತಿಯಾಗಿ ನಗಿಸಿ ಕೊನೆಗೆ ಹೊರಡೋವಾಗ ಈಗಷ್ಟೇ ಪರಿಚಿತರಾದ್ವಿ ಆಗ್ಲೇ ಹೊರಟುಬಿಟ್ಯಲ್ಲೆ ಹುಡುಗಿ ಅಂತ ಭಾವುಕರಾಗ್ತಾರೆ.

ತೀವ್ರತೆಯ ಅರಿವಿಲ್ಲದವರಿಗೆ ಇದೊಂದು ಸಾಮಾನ್ಯ ಭಾವವಾದೀತು ..ಆದರಿದ ದಕ್ಕಿಸಕೊಂಡವರಿಗೆ ಬದುಕ ಪೂರ್ತಿ ಜೊತೆಯಿರೋ ಮಧುರ ನೆನಪಾದೀತು.

ಯಾವತ್ತಿಗೂ ಜೊತೆ ಇರಬೇಕಿದ್ದ ನನ್ನದೆಂದ ಮನೆ ಯಾಕೋ ಮೌನದಿ ಬಿಕ್ಕುತ್ತಿದ್ದ ದಿನಗಳವು .ಮನೆಯ ಬಗೆಗೆ ಮನೆಯವರ ಬಗೆಗೆ ನನಗಿಂತ ಜಾಸ್ತಿ ಪ್ರೀತಿ ಇದ್ದ ನನ್ನಲ್ಲಿ ಕಳೆದು ಹೋದ ಆ ಪ್ರೀತಿಯನ್ನ ಅರಗಿಸಿಕೊಳ್ಳೋದು ಸಹ್ಯವಲ್ಲದ ಭಾವ ಎನಿಸಿತ್ತು.ದಿನಕ್ಕೊಮ್ಮೆ ಮಾತಾಡೋ ನನ್ನವರು ಅವರವರ ಭಾವಗಳ ಹೊಡೆದಾಟದಲ್ಲಿ ನನ್ನನ್ನ ಪೂರ್ತಿಯಾಗಿ ಮರೆತು ಹೋಗಿದ್ದರು (ಮರೆತಂತೆ ನಟಿಸುತ್ತಿದ್ದರೇನೋ).
ಹೀಗಿರೋವಾಗ ತಂಗಿ ಮುದ್ದು ಮುದ್ದು ರಗಳೆ ಮಾಡ್ತಿದಾಳೆ ..ಪುಟಾಣಿ ನೀ ನೆನಪಾದೆಹೀಗೊಂದು ಮೇಸೆಜ್ ಸರಿ ರಾತ್ರಿಗೆ ಎಚ್ಚರಿಸಿದಾಗ ಮನ ಮೂಕ ಮೂಕ .ಪ್ರೀತಿ ಅಂದ್ರೆ ಇದಾ ,ಆತ್ಮೀಯರಂದ್ರೆ ಇವರಾ? ಕಳಕೊಂಡ ಬಂಧಗಳೆದುರು ಈ ಬಂಧವ್ಯಾಕೋ ದೂರಾದ ಮನೆಯನ್ನ ಮರೆಸೋವಷ್ಟು ಹತ್ತಿರ ಅನಿಸಿದೆ ನಂಗಿಲ್ಲಿ ...ಎಲ್ಲೋ ಒಂದು ಸಣ್ಣ ಪರಿಚಯ ನನ್ನನ್ನಿಷ್ಟರ ಮಟ್ಟಿಗೆ ಹಚ್ಚಿಕೊಳ್ಳೋಕೆ ಬಂದಾಗ ನಿಜಕ್ಕೂ ನನ್ನ ಬಗೆಗೆ ನಂಗೂ ಪ್ರೀತಿಯಾಗುತ್ತೆ..ಬದುಕು ಖುಷಿ ಪಡೋಕೆ ಇನ್ನೇನು ಬೇಕು ...ವಾರಗಳಿಂದ ರಾಡಿಯಾಗಿದ್ದ ಮನ ನೀವೇನೂ ಮಾತಾಡದಿದ್ರೂ ಹಗುರಾಗಿತ್ತು ...ಕೊನೆಗೂ ಕಣ್ಣಂಚು ಸಾಂತ್ವಾನಿಸಬಂತು ನಿನ್ನೆದುರು ನನ್ನ.
ಕ್ಷಮೆ ಕೇಳ್ತೀನಿ ಗೆಳೆಯ ನಾ ನಿನ್ನ ....ಉಸಿರಗಟ್ಟಿಸುತ್ತಿದ್ದ ಭಾವವೊಂದ ನಿನ್ನೆದುರು ಹರವಿ ನಾನೇನೋ ಉಸಿರಾಡಿದೆ.ಆದರೆ ನಿನ್ನುಸಿರು ಕಷ್ಟಪಡ್ತೇನೋ ಅರಗಿಸಿಕೊಳ್ಳೋಕೆ ...
ನೀನೇನೂ ಮಾತಾಡದಿದ್ರೂ ನನ್ನ ಮನ ಹಗುರಾಯ್ತೆಂದು ಪ್ರಾಮಾಣಿಕವಾಗಿ ಹೇಳ್ತೀನಿ ನಾ ....ಈ ಅಪರೂಪದ ಗೆಳೆತನವ ಯಾವತ್ತಿಗೂ ಜೋಪಾನ ಮಾಡ್ತೀನಿ ,ನೋವುಗಳ ದಹಿಸೋ ಶಕ್ತಿ ಸಿಗಲಿ ನಿಂಗೆ ಅಂತ ಮನ ತುಂಬಿ ಅಂದ್ಯಲ್ವಾ ಇದಕ್ಕಿಂತ ಇನ್ನೇನು ಬೇಕು ನಂಗೆ ..

ಸಂತೆಯ ಮಧ್ಯೆಯೂ ಒಂಟಿ ಅನಿಸೋ ಭಾವವ ಬದಿಗಿರಿಸಿ ನಗಬೇಕಿದೆ ನಾನಾಗಿ ...ನೀ ಸಿಕ್ಕ, ನಾ ದಕ್ಕಿಸಿಕೊಂಡ ಬದುಕಿಗಾಗಿ....ವಾಸ್ತವಗಳ ಅನಾವರಣಕ್ಕಾಗಿ.
ಜೊತೆಯಿರು ಗೆಳೆಯನಾಗಿ ಯಾವತ್ತೂ... ನಿನ್ನಾ ಚಂದದ ನಗುವ ಹಂಚೋಕೆ .ಮನದ ಭಾವಗಳ ಹರವಿಕೊಳ್ಳೋಕೆ....

ಈ ಅಣ್ಣ ಜೊತೆಯಾಗಿದ್ದೂ ಭಾವಗಳ ಹರಾಜಲ್ಲೇ .... ಆದರೀಗ ನನ್ನಮ್ಮನಿಗೆ ಮಗನಾಗಿ ,ಮುದ್ದು ಅಣ್ಣನಾಗಿ ,ಕಾಲೆಳೆಯೋ ,ಕಿಚಾಯಿಸೋ ಗೆಳೆಯನಾಗಿ ,ನನ್ನೀಡಿ ಮನೆಗೆ ಪರಿಚಿತನಾಗಿ(ಒಮ್ಮೆಯೂ ಮನೆಗೆ ಬಾರದೆಯೂ)....ಶಬ್ಧಗಳಿಗೆ ಸಿಗದ ಈ ಭಾವಗಳಿಗೆ ,ಈ ಪ್ರೀತಿಗಳಿಗೆ ಮನ ಹಿಗ್ಗುತ್ತೆ ಪ್ರತಿ ಬಾರಿ ...ಯಾರೋ ಅಂದಿದ್ದ ಈ ಪ್ರೀತಿಗಳ ಬಗೆಗೆ ನಕ್ಕುಬಿಟ್ಟಿದ್ದೆ ನಾ ಒಮ್ಮೆ ..ಎಲ್ಲೋ ಮಾತಾಡೋ ,ಮಾತಲ್ಲಿ ಮನೆ ಕಟ್ಟೋ ,ಒಮ್ಮೆಯೂ ಎದುರು ನೋಡದ ಜನಗಳ ಬಗೆಗೆ ಇಷ್ಟು ಭಾವಗಳನ್ನಿಟ್ಟು ಕೊಂಡಿರೋ ನಿನ್ನ ನೋಡಿದ್ರೆ ಪಾಪ ಅನಿಸುತ್ತೆ ಅಂತಂದು ...ಆದರಿವತ್ತೀ ಭಾವ ನನ್ನ ಸೋಕಿದಾಗ ಮಾತ್ರ ಅರಿವಾಯ್ತು ನಂಗೆ ...ಮುಖ ನೋಡದೆಯೂ ಎಷ್ಟು ಚಂದದ ಬಂಧ ಬೆಸೆದಿದೆಯಲ್ಲ ಅಂತ.

ಡುಮ್ಮಕ್ಕ ಅಂತ ನೀ ನನ್ನ ರೇಗಿಸೋವಾಗೆಲ್ಲ ಮನದಲ್ಲಿರೋ ಕಲ್ಪನೆಯ ನನ್ನಣ್ಣ ನೆನಪಾಗ್ತಾನೆ ನಂಗೆ .ನನ್ನದೇ ಅಣ್ಣ ಇದ್ರೂ ನನ್ನನ್ನಿಷ್ಟು ಪ್ರೀತಿಸಲಾರನೇನೋ ...ನಡುಗೋ ಚಳಿಯಲ್ಲಿ ಅಮ್ಮನ ಕಂಡೆ ನಾ ನಿನ್ನಲ್ಲಿ ...ಗೆಳತಿಯಲ್ಲಿ ಕಣ್ಣೀರಾದೆ ನಡು ರಾತ್ರಿಲೀ ..ಕಾರಣ ಇಷ್ಟೇ ..ನಿನ್ನೀ ಕಾಳಜಿ ಕಟ್ಟಿ ಹಾಕಿತ್ತು ನನ್ನ ಕಣ್ಣಂಚಲ್ಲಿ ...ಪ್ರೀತಿಯಿಂದ ಅಳಬೇಕನಿಸೋವಾಗಲೆಲ್ಲಾ ನೆನಪಾಗೋದು ಅವಳೇ...ನಿನ್ನ ಪ್ರೀತಿಯ ಅವಳೆದುರು ಹೇಳಿದ್ದಷ್ಟೇ ...ಬೇಸರಿಸದಿರು ನೀ ಇಡೀ ರಾತ್ರಿ ನನ್ನ ಚಳಿಯಲ್ಲಿ ಕಳೆಯೋ ತರ ಮಾಡಿದೆ ಅಂತ ...ಹೀಗೊಂದು ಅಣ್ಣನ ಪ್ರೀತಿಯ ತೋರಿಸಿದ್ದಕ್ಕೆ ಬರಿಯ ಥಾಂಕ್ಸ್ ಅಂದ್ರೆ ಎಲ್ಲೀ ಭಾವವ ಕೊನೆಯಾಗಿಸಿಬಿಟ್ನೇನೋ ಅಂತನಿಸುತ್ತೆ .
ಮಾತಿಲ್ಲ ನನ್ನಲ್ಲಿ ...ಉಳಿದಿದ್ದು ಸಂತೃಪ್ತ ಮೌನ ಮಾತ್ರ ...

ಕಲಿಯಬೇಕಿದೆ ನಾನೂ ....ಸ್ನೇಹವ ಸಲಹೋಕೆ ....ಬಂಧಗಳ ಪ್ರೀತಿಸೋಕೆ .

ಇಲ್ಲೊಂದಿಷ್ಟು ಬ್ರಾಂಡೆಡ್ ಮಾತುಗಳಿವೆ ,ಒಂದಿಷ್ಟು ತಮಾಷೆಗಳಿವೆ , ಬ್ಯಾಚುಲರ್ಸ್ ಟಾಕ್ ಗಳಿವೆ....ತುಂಬಾ ದಿನಗಳ ನಂತರ ಪೂರ್ತಿಯಾಗಿ ನಕ್ಕ ಖುಷಿ ಇದೆ ... ,ಹಳೆಯ ಪ್ರೀತಿಯ ಬಗೆಗೆ ಕಣ್ಣೀರಾದ ಭಾವುಕ ಗೆಳೆಯನಿದ್ದಾನೆ ,ಸಣ್ಣದೊಂದು ಪೊಸೆಸ್ಸಿವ್ ನೆಸ್ ಇದೆ.ಹಸಿರ ಹಾದಿಯಲ್ಲಿ ಕೈ ಹಿಡಿದು ನಡೆಯೋ ಒಲವಿದೆ, ಜೊತೆಯಿರ್ತೀನಿ ಯಾವತ್ತೂ ಅನ್ನೋ ಭರವಸೆಯಿದೆ.ತೀರಾ ಅನಿಸಿದ ಕೀಟಲೆಗಳಿವೆ....ಸಣ್ಣದೊಂದು ಹುಸಿಮುನಿಸಿದೆ...ಕಣ್ಣಂಚ ಭಾವಗಳ ಅರ್ಥೈಸಿಕೊಳೋ ಮನಗಳಿವೆ,ಅರ್ಥವಾಗದ ಮೌನವಿದೆ ,ಮನ ನಲುಗಿಸೋ ಶೂನ್ಯತೆಯಿದೆ....
ಎಲ್ಲವುಗಳ ಹೊರತಾಗಿಯೂ ನಾನವರಿಗೆ ಏನೂ ಅಲ್ಲದಿದ್ದರೂ ಮೊದಲ ಭೇಟಿಯ ಖುಷಿ ಕೊನೆಯಾದಾಗ ಚಿಕ್ಕದಾದ ,ಹತ್ತಿರ ಅನಿಸಿದ ಎರಡು ಮುಖಗಳಿವೆ ...!!!

ತಿಳಿಯದ ಭಾವವೊಂದಕೆ ,ಅರಿಯದ ಸ್ನೇಹವೊಂದಕೆ,ಖುಷಿಯ ಪ್ರೀತಿಗಳಿಗೆ ,ಮನವ ಮುದ್ದಿಸೋ ಒಲವಿಗೆ ಏನೆಂದು ಹೆಸರಿಡಲಿ ?

ಕಲೆತು,ಕುಳಿತು,ಹತ್ತಿ,ಹಾರಿ,ಹರಟಿ,ಅತ್ತು,ಬೇಸರಿಸಿ,ಸಮ್ಮೋಹಿಸಿ,ಕೊನೆಗೊಮ್ಮೆ ನಕ್ಕು ....ಚಂದದ ಎಲ್ಲಾ ಭಾವಗಳು ದಿನವೊಂದರಲ್ಲಿ ಎಲ್ಲರನೂ ಒಳಹೊಕ್ಕು ,ಕಾಡಿಸಿ ,ಕಾಯಿಸಿ ,ಕೊನೆಗೂ ಸೋಲಿಸಿಯೇ ಹೊರ ಹೋದ ಈ ಭಾವಕ್ಕೆ ಏನೆಂದು ಹೆಸರಿಡಲಿ ...ನಾಮಕರಿಸಿಬಿಡಿ ನೀವೆ ...ಸಲಹ್ತೀನಿ ಕೊನೆಯ ತನಕ ನಾನದನ.

ಸಾಕಿಷ್ಟು ಪ್ರೀತಿ ಬದುಕ ಖುಷಿಸೋಕೆ...

ದಕ್ಕಲಿ ಎಲ್ಲರಿಗೂ ಇಂತದ್ದೇ ಸ್ನೇಹ ಬಳಗ .

Friday, September 27, 2013

ಪ್ರೀತಿಯಿಂದ

ಅಜ್ಜಾ ,ಅಜ್ಜಿಯ ಕಣ್ರೆಪ್ಪೆಯ ಪ್ರೀತಿ ...ಅಪ್ಪಾ ಅಮ್ಮನ ಬದುಕ ಕನಸು ...ದೊಡ್ಡಪ್ಪ ದೊಡ್ದಮ್ಮನ ಸ್ವಂತ ಮಗನಂತಿರೋ ಮಗ ...
ಪ್ರೀತಿಯ ಮನೆಯ ಮುದ್ದಿನ ಪುಟ್ಟು ....ಅಜ್ಜನ ಮನೆಯಲ್ಲಿ ಯದ್ವಾ ತದ್ವಾ ಕಿಲಾಡಿ ಮಾಡೋ ಎಲ್ಲರನೂ ಸುಸ್ತಾಗಿಸೋ ,ಆಮೇಲಿನ ಒಂದೇ ಮಾತಿಂದ ಎಲ್ಲರೂ ನಗೋ ತರ ಮಾಡೋ ಮುದ್ದು ಮೊಮ್ಮಗ .

ನಂಗೆ ಈ ಕ್ಷಣಕ್ಕೆ ಪಾಪು ...ಮತ್ತೊಂದು ನಿಮಿಷಕ್ಕೆ ಕಾಟ ಕೊಡೋಕಂತಾನೇ ಇರೋನು .....ಎಲ್ಲಾ ವಿಷಯಗಳನೂ ಬಿಡದೇ ರಿಪೋರ್ಟ್ ಮಾಡ್ತಾ ....ಮುದ್ದು ಜಾಸ್ತಿಯಾದಾಗ ಗುದ್ತಾ ,ನಾ ಬೇಸರಿಸೋವಾಗ ದೊಡ್ಡೋರ ತರ ಸಮಾಧಾನಿಸ್ತಾ,
ತೀರಾ ಅನಿಸೋವಷ್ಟು ತಲೆ ತಿಂದು ಆಮೇಲೊಮ್ಮೆ ನನ್ನ ಸಿಟ್ಟಿಗೆ ಬೈಸಿಕೊಳ್ತಾ ...ಅವಾಗಾವಾಗ ಅಪ್ಪನ ಹತ್ರ ನನ್ನ ಬಗ್ಗೆ ದೂರು ಹೇಳ್ತಾ ...ನನ್ನೆಲ್ಲಾ ಡೈರಿಮಿಲ್ಕ್ ನಲ್ಲೂ ಒಂದೊಂದು ಬೈಟ್ ತಗೋಳ್ತಾ ,ನಿನ್ನ ಸಿಲ್ಕ್ ನಲ್ಲಿ ನಾ ಕೇಳಿದ್ರೂ ಒಂದೂ ಬೈಟ್ ಕೊಡ್ದೇ ಮುಖ ತಿರ್ಗಿಸ್ತಾ.....

ಎಲ್ಲಾ ಭಾವಗಳಿಗೂ ಜೊತೆಯಾಗಿರೋ ಗೆಳೆಯ, ನಗುವಿಗೆ ನಗುವ ಸೇರಿಸಿ ,ಅಳುವಲ್ಲೂ ನಗುವ ತರಿಸೋ ಆತ್ಮೀಯಾ , ಜೊತೆಗೆ ನಾನೂ ಇದ್ದೀನಿ ಅಂತಂದು ಅವಾಗಾವಾಗ ತೀರಾ ಅನ್ನೋ ಅಷ್ಟು ಕಾಲೆಳೆಯೋ ಅಣ್ಣಾ ,

ಒಟ್ನಲ್ಲಿ ನಾನು ನನ್ನಲ್ಲಿದ್ದೀನಾ ಅಥವಾ ನಿನ್ನೊಟ್ಟಿಗೆ ನಾ ಇದ್ದೀನಾ ಅನ್ನೋವಷ್ಟು ಗೊಂದಲ ಮೂಡೋ ತರ ಮಾಡೋ ಮುದ್ದು ತಮ್ಮಾ ...

ನಂಗೆ ಅಣ್ಣ ಬೇಕಿತ್ತಮ್ಮಾ ಅಂತ ಪ್ರತಿ ಬಾರಿ ತಮ್ಮನ ರೇಗಿಸೋ ನಾನು ..ನಂಗೂ ಅಕ್ಕ ಬೇಕಿರ್ಲಿಲ್ಲ ಅಮ್ಮಾ ತುಂಬಾ ಕಾಟ ಕೊಡ್ತಾಳೆ ಇವ್ಳು ಅಂತ ಮತ್ತೆ ನನ್ನನ್ನೇ ಕೆಣಕೋಕೆ ಬರೋ ತಮ್ಮಾ...ಇಬ್ಬರೂ ಜೊತೆಯಾಗಿದ್ದಿದ್ದು ತೀರಾ ಕಡಿಮೆ .
ಜೊತೆಯಿದ್ದಾಗ ಮಾಡಿಕೊಂಡ ಜಗಳಗಳೆಷ್ಟೋ ...ತೋರಿದ ಸಿಟ್ಟುಗಳೆಷ್ಟೋ ..ಇವತ್ತು ಮನೆಯಲ್ಲಿ ಎಲ್ಲರೂ ನಮ್ಮಿಬ್ಬರ ಆ ದಿನಗಳ ಜಗಳಗಳ ಹೇಳೋವಾಗ ತಡೆಯದಷ್ಟು ನಗು ಬರುತ್ತಲ್ಲೋ ಪುಟ್ಟಾ ....

ಅಪ್ಪ ನಂಗೆ ಕೊಡಿಸೋ ಎಲ್ಲದ್ದಕ್ಕೂ ನಿನ್ನಿಂದೊಂದು ಡೈಲಾಗ್ ರೆಡಿ ಆಗಿರುತ್ತೆ ...."ಎಲ್ಲಾನೂ ನನ್ನಪ್ಪನೇ ಕೊಡಿಸ್ಬೇಕು ನಿಂಗೆ ..ಇರು ನಿನ್ನ ಹುಡ್ಗ ಸಿಗ್ಲಿ ಎಲ್ಲಾ ವಸೂಲಿ ಮಾಡ್ತೀನಿ" ಅಂತ ತೀರಾ ಗಂಭೀರವಾಗಿ ಹೇಳೋ ನಿನ್ನ ಮಾತುಗಳಿಗೆ ಇಡಿಯ ಮನೆ ಮಂದಿ ಮನ ಬಿಚ್ಚಿ ನಗ್ತಾರಲ್ಲೋ !...


Live to annoy me, pick on me, drive me nuts, but loves me to the core! Yes..... dats my Bro...!!!
You are my world of love .

ಎಲ್ಲರಲ್ಲೂ ನಗುವ ತರೋ ನೀನಂದ್ರೆ ಮುದ್ದು,ನೀನಂದ್ರೆ ನಗು ,ನೀನಂದ್ರೆ ಪ್ರೀತಿ ,ನೀನಂದ್ರೆ ಇಡೀ ಮನೆಯ ಉತ್ಸಾಹದ ಚಂದಿರನಲ್ಲೋ ಹುಡುಗ .

 

ಮನೆಯಲ್ಲಿ ಜಾಗ ಇಲ್ಲದಷ್ಟು ಪ್ರಶಸ್ತಿಗಳಿವೆ ನಿನಗಿಲ್ಲಿಯ ತನಕ ಸಿಕ್ಕಿರೋದು! ಆದರೂ ನೀ ನಂಗೆ ಸಿಕ್ಕಿದ್ದ ಯಾವುದೋ ಸಣ್ಣದೊಂದನ್ನೇ ಎಲ್ಲರಿಗೂ ತೋರಿಸಿ ಇದು ನನ್ನ ಅಕ್ಕಂದಂತ ಖುಷಿಪಡೋದ ನೋಡಿದ್ರೆ ನಂಗೆ ಹೇಳೋಕೆ ಮಾತೇ ಬರಲ್ಲ .

ನೀ ನನ್ನ ತಮ್ಮ ಅನ್ನೋ ಕಾರಣಕ್ಕೆ ಹೇಳಿದ್ದಲ್ವೋ ಪುಟ್ಟಾ ...ನೀನಂದ್ರೆ ನಿಜಕ್ಕೂ ಹೆಮ್ಮೆ ನಂಗೆ ...

ನಂಗೇ ಗೊತ್ತಿರದ ಅದೆಷ್ಟೋ Apps ಗಳು ನಿಂಗೊತ್ತು..ನಾನರಿಯದ ಅದೆಷ್ಟೋ ಪುಸ್ತಕಗಳ ನೀ ಪಟ ಪಟ ಅಂತಾ ಹೇಳೋವಾಗ ಆಶ್ಚರ್ಯದಿಂದ ನಿನ್ನ ನೋಡೋದು ಮಾತ್ರ ನಂಗೆ ಗೊತ್ತು ...ಇವ ಯಾವಾಗಿದನ್ನೆಲ್ಲಾ ಕಲಿತ ,ಯಾವಾಗ ಇವುಗಳ ಓದಿದ ಅಂತ ತಲೆನಲ್ಲಿ ಹುಳ ಬಿಟ್ಕೊಂಡ್ರೂ ನೀ ಹೇಳಲ್ಲ .
ನಿನ್ನಲ್ಲೊಂದಿಷ್ಟು ಚಂದದ ಕನಸುಗಳಿವೆ ...ಆ ಕನಸುಗಳಿಗೆ ಜೊತೆಯಾಗಿ ನಾವೂ ಇದ್ದೀವಿ .

ನಂಗೆ " ಅಕ್ಕಾ " ಅನ್ನೊ ಪದವಿ ಕೊಟ್ಟಿರೋ, ನಾ ನನಗಿಂತ ಜಾಸ್ತಿ ಪ್ರೀತಿಸೋ ತಮ್ಮನ ಹ್ಯಾಪಿ ಬರ್ತ್ ಡೇ ಇವತ್ತು .....
ಜನುಮ ದಿನದ ಪ್ರೀತಿಯ ಶುಭಾಶಯಗಳು ಪುಟ್ಟಾ ..
ಖುಷಿಗಳಿರಲಿ ಬದುಕ ತುಂಬಾ ...

ಕನಸುಗಳಿಗೆ ಜೀವ ತುಂಬೋಕೆ ,ಕೈ ಹಿಡಿದು ನಡೆಸೋಕೆ ,ನಿನ್ನೊಟ್ಟಿಗೆ ನಾನೂ ನಡೆಯೋಕೆ ,ಪ್ರೀತಿಯ ಜಗಳವಾಡೋಕೆ, ಗೆಳತಿಯಾಗಿ,ಅಕ್ಕನಾಗಿ ಜೊತೆಯಿರ್ತೀನಿ ಯಾವತ್ತೂ :)

ಅಗೈನ್ ,ಹ್ಯಾಪಿ ಹ್ಯಾಪಿ ಬರ್ತ್ ಡೇ ...

ಪ್ರೀತಿಯಿಂದ ,
ಅಕ್ಕಾ.

 


 

Tuesday, September 24, 2013

ಮಂಜು ಸರಿದ ಮನದಿಂದ

ಕನಸ ಒಲವ ಜಾರಗೊಡದೆ ,ಕಣ್ಣ ರೆಪ್ಪೆಯ ಒದ್ದೆಯಾಗಿಸದೇ, ಒಂಟಿ ನಡಿಗೆಯ ಹಾದಿಯಲಿ,ಒಂಟಿ ಬೆಂಚಿನ ಮಧ್ಯದಲಿ ಕುಳಿತು ಮಂಜು ಮುಸುಕಿರೋ ಇದೇ ಜಾಗದಿ ,
ಮಂಜು ಸರಿದ ಮನಸ್ಸಿಂದ ಜೋಪಾನ ಮಾಡಬೇಕಿದೆ ನಾ ನಿನ್ನ....
ಕಟ್ಟಿಕೊಂಡ ಕಣ್ಣೀರ ಕಟ್ಟೆ ಒಡೆಯೋಕೂ ಮುನ್ನ...
ಯಾರದೋ ಬೇಸರಕೆ ಇನ್ಯಾರದೋ ಕಾಣಿಕೆ...
ಬೇಸರಿಸದಿರು ಗೆಳತಿ ಅನ್ನೋ ಅವನ ಕೋರಿಕೆ.!

      


 
ಒಂದೆ ಮನಸ ಒಂದೇ ಕನಸ
        ಪಡೆಯುತಿದೆ ಸಮಯ...
ಒಂದೆ ದಾರಿ ಒಂದೇ ಪ್ರೀತಿ
       ಎಣಿಸುತಿದೆ ನಯನ..

ಒಂಟಿ ನಡೆಗೆ ಜೊತೆಯಾಗಿ
          ಬರುವೆ ಎಂದೆ ನೀ...
ಭಾವಗಳ ತುಸು ಜಗಳದಿ
        ಮರೆತು ಹೋದೆ ನಾ...

ಅಂದು ನಿನ್ನ ಮನವ ಮುರಿದು
      ಕಟ್ಟಿಕೊಂಡೆ ಮನದ ಗೋಡೆ.
ಇಂದೆನ್ನ ಮನದ ಆಕ್ರಂದನಕೆ
      ಬಿಕ್ಕುತಿದೆ ಮೌನ ಕಣಿವೆ!

ಒಂಟಿ ಬೆಂಚೂ ಕಾಯುತಿದೆ
     ಹೃದಯ ಭಾರ ಇಳಿಸಲೆಂದು..
ಕಣ್ಣ ಅಂಚೂ ಮುಷ್ಕರಿಸಿದೆ
     ಭಾವ ಹನಿಯ ಧಿಕ್ಕರಿಸೆಂದು!
ಕಣ್ಣ ರೆಪ್ಪೆ ತೋಯದಿರಲಿ
     ಕನಸ ಒಲವ ಜಾರಗೊಡದೆ.

ಮೌನಿಯಾದೆ ನೀನು...
ಸುಮ್ಮನಾದೆ ನಾನು!.


 
(ಫೋಟೋ ಕ್ರೆಡಿಟ್ಸ್: ಶ್ರೀವತ್ಸ ಕಂಚೀಮನೆ.

ನನ್ನದೇ ಮನದೊಂದಿಗೆ ಸ್ಪರ್ಧೆಗೆ ನಿಂತಂತೆ ಭಾಸವಾಯ್ತು ಈ ಚಿತ್ರವ ನೋಡಿ ...ತುಂಬಾ ಭಾವಗಳ ಹಿಡಿದಿಟ್ಟಿರೋ ಚಿತ್ರಕ್ಕೊಂದು ಶರಣು...ಹಾಗೆಯೇ ಅದ ನನ್ನ ಬ್ಲಾಗಿಗೆ ಕೊಟ್ಟಿದ್ದಕ್ಕೂ ಧನ್ಯವಾದ ಜಿ)

  

Friday, September 13, 2013

ಮಾತು ಮುರಿದೇ.... ಮಾತಾಡಿದೆ ....

ಮತ್ತಷ್ಟು ಗೊಂದಲಗಳನ್ನೇ ಬಿಟ್ಟು ಹೋಗೋ ಅಂತರಂಗವ ಪ್ರತಿನಿಧಿಸೋ ಮನದ ಭಾವಗಳನಾಲಿಸು​ತ್ತಾ...


ಕ್ಯಾಂಪಸ್ಸಿಗೆ ಬರೋಕೂ ಮುಂಚೆ ಫ಼ೇಸ್ಬುಕ್ಕ್ಕಿನ ಸಾವಿರ ಸ್ನೇಹಿತರ ಮಧ್ಯ ನೀನೂ ಒಬ್ಬನಾಗಿದ್ದೆ ನಂಗೆ ಅಷ್ಟೇ ! ಯಾಕೋ ನನ್ನೂರ ಸೀನಿಯರ್ಸ್ ನಾ ಹುಡುಕೋವಾಗ ಸಿಕ್ಕಿದ್ದೆ ನೀ..ಆದರೂ ನಾನಾಗೀ ಯಾವತ್ತೂ ಮಾತಾಡಿಸಿರಲಿಲ್ಲ ನಿನ್ನ .ಅದ್ಯಾವತ್ತೋ  ಮಾತಾಡಿ ಆಮೇಲೆ ದಿನ ಪೂರ್ತಿ ಕಾಲೇಜಿನ ವಿಷಯಗಳ ಹೇಳಿ ,ಕಾಲೇಜಿಗೆ ಬರೋಕೂ ಮುಂಚೆ ಕಾಲೇಜಿನ ಸ್ಪಷ್ಟ ಅರಿವು ನೀಡಿದ್ದೆ...ಕಾಲೇಜಿನ ಜೊತೆಗೆ ನೀನೂ ಆತ್ಮೀಯನಾಗಿದ್ದೆ ಆವಾಗ್ಲೆ !

ಆದರೂ ಗೆಳೆಯ ಎಲ್ಲರೊಟ್ಟಿಗೆ ತೀರಾ ಕಾಲೆಳೆದು ಮಾತಾಡೋ ತರಾನೆ ನಾ ನಿನ್ನೊಟ್ಟಿಗೂ ಮಾತು ಶುರುವಿಡ್ತಿದ್ದಿದ್ದು .ತೀರಾ ಹರವದ ಮನದ ಭಾವಗಳ ಬಗೆಗೆ ಯಾವತ್ತೋ ಒತ್ತಾಯ ಮಾಡಿ ಕೇಳಿದ್ದೆ ನೀನು .ನಾ ನಿನ್ನೆದುರು ಕಣ್ಣಂಚ ಹನಿಯ ಜೊತೆ ಮಾತಾಡಿ ಅಮ್ಮ ಬೇಕೆಂದು ಆ ದಿನಗಳಲ್ಲಿ ಬಿಕ್ಕಿದ್ದು ,ನೀ ತೀರಾ ಆತ್ಮೀಯನಾಗಿ ಸಾಂತ್ವಾನಿಸಿದ್ದು ಎಲ್ಲಾ ಕಳೆದು ವರ್ಷವೊಂದಯ್ತಲ್ಲೋ ಹುಡುಗ .

ಚಂದದ ಗೆಳೆತನವಿತ್ತು ಅಲ್ಲಿ ....

ಸ್ವಲ್ಪವೇ ಆತ್ಮೀಯತೆ ತೋರಿದರೂ ಪೂರ್ತಿಯಾಗಿ ಹಚ್ಚಿಕೊಳೋ ನಾನು ನಿನ್ನ ತೀರಾ ಆತ್ಮೀಯತೆಗೆ,ಎಲ್ಲವನೂ ಅರ್ಥಮಾಡಿಕೊಳೋ ಮನಕ್ಕೆ ಅದ್ಯಾವತ್ತೋ ಸೋತಿದ್ದೆ ಅಲ್ಲಿ.ಎಲ್ಲದ್ದಕ್ಕೂ ರೇಗೋ ,ಸಿಡುಕೋ ಹೊಸ ಪ್ರಪಂಚದಲ್ಲಿ ನಿನ್ನೊಬ್ಬನೇ ಜೊತೆಯಲ್ಲಿದ್ದೆ ನಂಗವತ್ತಲ್ಲಿ...ಉಸಿರುಗಟ್ಟಿಸೋ ಊರಲ್ಲಿ, ಪ್ರೀತಿಯ ಮುಖವಾಡವನೂ ಧರಿಸದವರ ಮಧ್ಯ ನೀ ತೀರಾ ವಿಭಿನ್ನವಾಗಿ ಕಂಡಿದ್ದೆ .ಚಿಕ್ಕ ಚಿಕ್ಕ ಬೇಸರಗಳನೂ ಬಿಡದೇ ಸಾಂತ್ವಾನಿಸೋ ಸರಿ ಸುಮಾರು ನನ್ನದೆ ವಯಸ್ಸಿನ ಈ ಹುಡುಗನ ನೋಡಿ ಅದೆಷ್ಟೋ ಬಾರಿ ಅಂದುಕೊಂಡಿದ್ದೆ ನಂಗೂ ನಿನ್ನರ್ಧದಷ್ಟಾದ್ರೂ ಮ್ಯಾಚುರಿಟಿ ಇರ್ಬೇಕಿತ್ತು ಅಂತಾ .!!

ಅತ್ತರೆ ಸಮಾಧಾನಿಸಿ ,ಮನೆಯ ನೆನಪ ಪೂರ್ತಿಯಾಗಿ ಮರೆಸಿ , ಇಡಿ ದಿನ ಮಾತಾಡಿ,ಮುಖ ಊದಿಸಿಕೊಂಡಿದ್ರೂ ಕೊನೆಗೂ ನಗಿಸಿಯೇ ತೀರೋ ನೀನು ಬರಿಯ ಒಬ್ಬ ಫ಼ೇಸ್ಬುಕ್ ಗೆಳೆಯ ಆಗಿರಲಿಲ್ಲ ನಂಗೆ.ಅದಕ್ಕೂ ಮೀರಿದ ಸ್ನೇಹದ ಭಾವವೊಂದ  ನೀ ನಂಗೆ ನೀಡಿದ್ದೆ ಅನ್ನೋದ ನಾ ಪ್ರಾಮಾಣಿಕವಾಗಿ ಒಪ್ಪಿಕೊಳ್ತೀನಿ.

ಆದರೂ ನಿನ್ನ attitude,ego ಗಳ ಮೇಲೆ ನಾ ಅವತ್ತೂ ಬೈದಿದ್ದೆ ...ಯಾವತ್ತೂ ಬೈತೀನೇನೋ ಬಹುಶಃ.

ಮಾಡಿದ ತರಲೆ,ಕ್ಯಾಂಪಸ್ ನಲ್ಲಿ ತಮಾಷೆಗೆ ಮಾಡಿದ ರಾಗಿಂಗ್ ಗೆ ನಿನ್ನಮ್ಮ ನನ್ನ ಸಾರಿ ಕೇಳಿದ್ದು ,ಅಸೈನ್ಮೆಂಟ್ ,ರೆಕಾರ್ಡ್ ಬರ್ಯೋಕೆ ಸಹಾಯ ಮಾಡಿದ್ದು,ನೀ ಕೊಟ್ಟ ಸಿಲ್ಕ್ ನಾ ನಿರಾಕರಿಸಿ  ಎದ್ದು ಬಂದಿದ್ದು ,ಸ್ವಲ್ಪ ನಕ್ಕಿದ್ದು,ಜಾಸ್ತಿ ಅತ್ತಿದ್ದು.ಎಲ್ಲಾ ಹಳೆ ಕಥೆ ..ಯಾವುದೋ ಹೊಸ ಕಥೆ ಶುರುವಾಗೋದ್ರಲ್ಲಿತ್ತೇನೊ .ಮನವ ಕೇಳ ಬೇಕಂತ ಅಂದುಕೊಂಡಿದ್ದು ಸುಳ್ಳಲ್ಲ ..ಆದರೆ ನೀ ಅದಕ್ಕೂ ಅವಕಾಶವ ಕೊಡದ ರೀತಿ ಮಾಡಿಬಿಟ್ಟೆ ಕಣೋ ...

ಪ್ರೀತಿ ಪ್ರೇಮದ ಬಗೆಗೆ ಅಷ್ಟಾಗಿ ತಲೆ ಕೆಡಿಸಿಕೊಳ್ಳದ ಹುಡುಗಿಗೂ ಒಂದು ಸಣ್ಣ ಒಲವಾಗಿತ್ತು ನಿನ್ನಲ್ಲಿ !ಆದರೆ ತೀರಾ ಕಟ್ಟಿಕೊಂಡಿರೋ ನನ್ನದೇ ಮನದ ಬದುಕಲ್ಲಿ ಅದಕ್ಕೂ ಮೀರಿದ ಬದುಕು ಸಾಧಿಸೋದೊಂದಿತ್ತು .ಹಾಗಾಗಿ ಪ್ರತಿ ಬಾರಿ ಬರೋ ವಯೋಸಹಜ ಯೋಚನೆಗಳ ಬದಿಗೊತ್ತಿ ಕೂರೋವಾಗ ಕಷ್ಟ ಅನ್ನಿಸೋದು ..ಆದರೂ ಮಾಡೋ ಅನಿವಾರ್ಯತೆ ನಂದಿತ್ತು(ಇದೆ ಕೂಡಾ).

ಪೂರ್ತಿಯಾಗಿ ದೂರಾಗಿಸಲಾಗದ ನೀನು ಒಂದಿಷ್ಟು ದಿನ ತೀರಾ ಅನಿಸೋ ಅಷ್ಟು ಕಾಡಿದ್ದೆ ಕೂಡಾ.. ತಲೆದಿಂಬ ಒದ್ದೆಯಾಗಿಸಿ ಅತ್ತಿದ್ದೆ  ಕೂಡಾ ....ತೀರಾ ಆತ್ಮೀಯ ಅನ್ನಿಸೋ ಗೆಳತಿಯ ಬಳಿ ಮನದ ದ್ವಂದ್ವಗಳ ಹೇಳಿಕೊಂಡು ಬಿಕ್ಕಿದ್ದೆ ನಾ ...ಆದ್ರೂ ಅವಳ್ಯಾಕೋ ಭಾವಗಳ ಹೊಡೆದಾಟ ನಿಲ್ಲಿಸೋವಲ್ಲಿ ಸೋತು ಹೋಗಿದ್ಲು... ಅವಳ ಭಾವಗಳನ್ನೇ ಎದುರಿಸಲಾರದೆ ಕಂಗಾಲಾಗಿದ್ದ ಅವಳಿಗೆ ನನ್ನ ದ್ವಂದ್ವಗಳ ಹರವಿ ಮತ್ತೆ ಬೇಸರಿಸಿದ್ದೆ ನಾ  .ಆದರೂ ಎದುರು ತೋರುಕೊಡದೇ ನನ್ನ ಪಾಡಿಗೆ ನಾನಿದ್ದೆ.

ಯಾವತ್ತೋ ಸೂಕ್ಷ್ಮವಾಗಿ ಹರವಿದ್ದ ನಾಜೂಕು ಭಾವಕ್ಕೆ ಇವತ್ತಿಷ್ಟರ ಮಟ್ಟಿನ ಪೆನಾಲ್ಟಿ ಕಟ್ಟಬೇಕೆಂಬ ಸಣ್ಣ ಕಲ್ಪನೆ ಕೂಡಾ ನಂದಿರಲಿಲ್ಲ.ಯಾವುದೋ ಬೇಸರದಲ್ಲಿ ನಿನ್ನ ತೋಳಲ್ಲಿ ಕಣ್ಣೀರಾಗಿದ್ದು ಬರಿಯ ಗೆಳತಿಯಾಗಿ ಮಾತ್ರಾ ಅಂದಾಗ "ಹುಚ್ಚಿ ನಿನ್ನಲ್ಲೂ ಒಲವಿದೆ ಅನ್ನೋದು ಗೊತ್ತು ಕಣೇ ,ಯಾಕೆ ಗೊಂದಲಗಳ ಜೊತೆ ದಿನ ದೂಡ್ತೀಯ"ಅಂತಾ ತೀರಾ ಭಾವುಕನಾಗಿ ಸ್ನೇಹಕ್ಕೊಂದು ನಾಮಕರಣ ಮಾಡಿಬಿಟ್ಟಿದ್ದೆ ನೀ..

ಅವತ್ತಿಂದ ಶುರುವಾದ ಗೊಂದಲಗಳು  ನನ್ನನ್ನಿವತ್ತೂ ಕಾಡ್ತಿವೆ ಕಣೋ ...ಯಾಕೋ ಗೆಳೆಯ ಪ್ರೀತಿಯ ವಿಷಯದಲ್ಲಿ ಇಷ್ಟು ದೊಡ್ದ ಗೋಜಲುಗಳು ಉಳಿದುಬಿಡ್ತು ನನ್ನಲ್ಲಿ .

ನನ್ನಲ್ಲೂ ಪ್ರೀತಿಯಿತ್ತ? ಸ್ನೇಹದ ಒಲವು ಪ್ರೀತಿಯ ಕಡಲಾಗಿ ಹರಿದಿತ್ತಾ ?ನಾನ್ಯಾವತ್ತಾದ್ರೂ ನಿನ್ನಲ್ಲಿ ಪ್ರೀತಿಯಿದೆ ಕಣೋ ಅನ್ನೊ ತರಾ ವರ್ತಿಸಿದ್ನಾ? ಅಥವಾ ನನ್ನರಿವಿಗೂ ಬಾರದೇ ನನ್ನ ಮನ ನಿನ್ನೆಡೆಗೆ ವಾಲಿತ್ತಾ ?
ಉತ್ತರವ ಹುಡುಕ ಹೊರಟೆ ನನ್ನಲ್ಲಿರೋ ನೀನು ಕತ್ತಲಾಗಬಾರದು ಅನ್ನೋ ಕಾರಣಕ್ಕೆ . ಸಿಕ್ಕಿದ್ದು ಮಾತ್ರಾ ನನ್ನನ್ನೇ ಧಿಕ್ಕರಿಸಿ ಎದ್ದು ಹೊರಡಲನುವಾಗಿರೊ ನನ್ನದೇ ಮನ !!.
ನಾ ಮನದ ಮಾತನ್ನ ಕೇಳೋಕೆ ಬೇಸರಿಸೋದೂ ಇದೆ ಕಾರಣಕ್ಕೆ .

ಬರಿಯ ಗೋಜಲುಗಳೇ ಕಣ್ಣ ಮುಂದೆ...

ಆದ್ರೂ ಹೇಳ್ತೀನಿ ಗೆಳೆಯ ,ಪ್ರೀತಿಗಿಂತ ನಂಗೆ ಮಧುರ ಭಾವ ನೀಡೋದು ಸ್ನೇಹವೇ ...ನೀ ನಂಗೆ ಒಳ್ಳೆಯ ಗೆಳೆಯನಾಗಿದ್ದೆ .ಅದಕ್ಕೂ ಮೀರಿದ ಭಾವವ ನಾ ಯಾವುದೋ ಸಂದಿಗ್ಧದಲ್ಲಿ,ನನ್ನರಿವಿಗೆ ಬಾರದ ಮನದ ತೊಳಲಾಟಗಳ ಜೊತೆ ತೋರಿಸಿದ್ದರೆ ಮಂಡಿಯೂರಿ ಕ್ಷಮೆ ಕೇಳ್ತೀನಿ ನಾ ನಿನ್ನ...ನಿನ್ನ ಭಾವಗಳ ಪ್ರೋತ್ಸಾಹಿಸೋಕೆ ನಾ ಇನ್ಯಾವತ್ತೂ ಬರಲ್ಲ .
ಪ್ರೀತಿಯ ಹೆಸರಿಗೆ ಮನ ನೋಯೋ ,ಮನ ನೋಯಿಸೋ ಭಾವವ ಎದುರು ನೋಡೋದು ನನಗ್ಯಾಕೋ ಸರಿ ಬೀಳಲ್ಲ .

ಪ್ರೀತಿ ಅಂದ್ರೆ ನನ್ನಲ್ಲಿ ಒಂದಿಷ್ಟು ಬೇರೆಯದೇ ಭಾವಗಳಿವೆ.ಪ್ರೀತಿ ಅಂದ್ರೆ ಬದುಕ ಪೂರ್ತಿ ಕಣ್ರೆಪ್ಪೆಯಲಿಟ್ಟು ಜೋಪಾನ ಮಾಡೋ ಹುಡುಗ,ನಾ ಹೇಳದ ಭಾವಗಳನ್ನೂ ಅರ್ಥೈಸಿಕೊಂಡು ಸಾಂತ್ವಾನಿಸೋ ಮುದ್ದಿಸೋ ಕನಸ ರಾಜಕುಮಾರನ ಬಗೆಗೆ ನಂದೊಂದಿಷ್ಟು ಕನಸುಗಳಿವೆ ....ನಿನ್ನಲ್ಲಿರೋ ಪ್ರೀತಿಯ ಬಗೆಗಿನ ಭಾವಗಳ ಕೇಳಿ ನಾ ದಂಗುಬಡೆದಿದ್ದೆ ...ಇವತ್ತೂ ನಂಗವುಗಳ ಅರಗಿಸಿಕೊಳ್ಳೋ ಶಕ್ತಿ ಇಲ್ಲ..ಆದ್ರೂ ಹಾಳು ಮನ ಯಾಕೇ ನನ್ನಲ್ಲೂ ಒಂದು ಸಣ್ಣ ಒಲವನ್ನ ಬಿತ್ತಿಹೋಯ್ತೊ ನಾ ಕಾಣೆ.

ನನ್ನ ಪ್ರೀತಿಯ ಬಗೆಗಿನ ಚಂದದ  ಭಾವಗಳ ಕೇಳಿ ನಕ್ಕುಬಿಟ್ಟಿದ್ದೆ ನೀ..ಆದರೂ   ಬೇರೆಯವರ ಭಾವಗಳಿಗೆ ಸ್ವಲ್ಪ ಆದ್ರೂ ಗೌರವಿಸೋ ಮನ ನಿನ್ನದಾಗಲಿ ಅಂತಷ್ಟೇ ನಾ ಹೇಳೋದು.ತಪ್ಪು ನಿಂದಲ್ಲ .ತಪ್ಪು ನನ್ನದೇ ಆದೀತು . ಗೆಳೆತನದ ಆ ದಿನಗಳಲ್ಲಿ ನನ್ನನ್ನಷ್ಟು ಇಷ್ಟ ಪಟ್ಟ ನಿನ್ನ ಮನವನ್ನ ತಪ್ಪು ಅಂತ ಹೇಳೋಕೆ ನಂಗೂ ಕಷ್ಟವಾದೀತು . 

ನಾ ಕಟ್ಟಿಕೊಂಡ ಬದುಕೇ ಹೀಗೆ..ನಿಂಗಾಗಿ ನಾ ಬದಲಾಗಲಾರೆ...ಅವತ್ತು ಬದಲಾಗೋಕೆ ನೀ ನನ್ನ ಗೆಳೆಯನಾಗಿ ಆದ್ರೂ ಉಳಿದಿದ್ದೆ ..ಆದರಿವತ್ತು ಪ್ರೀತಿಯ ಹೆಸರಲ್ಲಿ ಮನ ಹೊಕ್ಕು ಎಲ್ಲರೂ ಇಷ್ಟಪಡೋ ಗೆಳೆತನವನ್ನೂ ಕೊಂದು ಎದ್ದು ಹೋದೆ ಅನ್ನೋದೆ ನನ್ನ ಬೆಸರ.

ಎಲ್ಲಾ ಭಾವಗಳನೂ ಚಂದದಿ ಸಲುಹೊ ನಂಗೂ ನೀ ಎದ್ದು ಹೋದುದ್ದು ನೆಮ್ಮದಿ ಆಯ್ತೆಂದು ಅನ್ನಿಸೋವಾಗ ಅರಿವಿಗೆ ಬರುತ್ತೆ ನೀ ನನ್ನನ್ನೆಷ್ಟು ಬದಲಿಸಿಬಿಟ್ಟಿದ್ದೆ ಅಂತಾ...

ಆದ್ರೂ ಗೆಳೆಯ ....ಗೆಳೆಯನಾಗಿದ್ದಾಗ ಇದ್ದ ಆ ನಿನ್ನ ಮುದ್ದು ಮನವ ನಾ ಇವತ್ತೂ ಹುಡ್ಕ್ತಿದೀನಿ..


 
ನಿನ್ನೊಟ್ಟಿಗೆ ಮಾತಾಡಿದ್ದಕ್ಕಿಂತ ಮಾತು ಮುರಿದು ಎದ್ದು ಬಂದಿದ್ದೆ ಜಾಸ್ತಿ. ಇಲ್ಲಿ ನಾ ನಾನಾಗಿರಲೇ ಇಲ್ಲ..ಪೂರ್ತಿಯಾಗಿ ಮಾತಾಡೋ ನೀ ಮೌನಿಯಾಗಿ ಕೇಳುತ್ತಿದ್ದೆ...ಮೌನಿಯಾಗುಳಿಯಬೇಕಿದ್ದ ನಾ ಅದೇನೋ ಕಾಣದ ಕಾರಣಕ್ಕೆ ಮಾತಾಡಿ ಮನ ನೋಯಿಸಿದ್ದೆ...

ಯಾರೊಟ್ಟಿಗೂ ಜಗಳ ಮಾಡದ ನಾ ಅದ್ಯಾಕೇ ನಿನ್ನ ಪ್ರತಿ ಮಾತಿಗೂ ಕೆಂಡ ಕಾರ್ತಿದ್ನೋ ನಂಗಿವತ್ತೂ ಗೊತ್ತಿಲ್ಲ.

ನಿನ್ನಲ್ಲಿರೋ ಪ್ರೀತಿಯ ಮನವ ಮತ್ತೂ ನೋಯಿಸೋ ಇರಾದೆ ನಂಗಿಲ್ಲ ಕಣೋ .ಭಾವಗಳೇ ಇಲ್ಲದ ಗೆಳತಿಯೂ ನಿನ್ನ ಬಗೆಗೆ ಒಂದಿಷ್ಟು ಸಣ್ಣ ,ಸೂಕ್ಷ್ಮ ಭಾವಗಳ ಇಟ್ಟುಕೊಂಡುಬಿಟ್ಟಿದ್ಲು ನೋಡು.

ಎಲ್ಲರ ಜೊತೆ ಸಲಿಗೆಯಿಂದ ಮಾತಾಡೋ ನನ್ನದೇ ಸ್ವಭಾವಗಳ ಬಗೆಗೆ ಬೇಸರವಾಗೋ ಅಷ್ಟರ ಮಟ್ಟಿಗೆ ಮನ ಮುರಿದೆ ನೀ.ಪ್ರೀತಿ,ಸ್ನೇಹದ ಗೊಂದಲದಲ್ಲಿ ನಾನೂ ಸ್ವಲ್ಪ ನಲುಗಿದ್ದೆ ..ಆದರೂ ಇವತ್ತು ಹೇಳ್ತೀನಿ ..ತೀರಾ ತದ್ವಿರುದ್ದ ಇರೋ ನನ್ನ ನಿನ್ನ ಭಾವಗಳಲ್ಲಿ ಪ್ರೀತಿಯ ಕಲ್ಪನೆಯೂ ವಿಚಿತ್ರ ಅನ್ನಿಸ್ತಿದೆ ನಂಗೆ .ಆದರೂ ನೀ ನನ್ನ ಮೊದಲ ಒಲವು ಅನ್ನೋದು ನನ್ನ ಮನಕ್ಯಾಕೋ ಸಹ್ಯವಾಗ್ತಿಲ್ಲ ಇವತ್ತು.ಸಣ್ಣದಾಗಿದ್ದ ಒಲವ ಚಿವುಟಿ ನಂಗೆ ನಾ ನೋವು ಮಾಡಿಕೊಂಡ್ರೂ ಆ ನೋವ್ಯಾಕೋ ನನ್ನ ಕಾಡ್ತಿಲ್ಲ ಇವತ್ತು...ಮಾಸೋ ಗಾಯದ ತರಹ .

ಭಾವಗಳ ಜೊತೆ ಬದುಕು ಕಟ್ಟಿಕೊಂಡ ಭಾವಗಳೇ ಇಲ್ಲದ ತರಹ ನಿನ್ನ ಧಿಕ್ಕರಿಸಿ ಎದ್ದು ಬಂದ ಗೆಳತಿಯನ್ನೊಮ್ಮೆ ಕ್ಷಮಿಸಿ ಬಿಡು.

ಖುಷಿ ಪಟ್ಟೀತು ನನ್ನೀ ಮನ.

ತೀರಾ ಹರವಲಾಗದ ಖಾಸಗಿ ಭಾವಗಳ ನನ್ನಲ್ಲೇ ಇರಿಸಿಕೊಂಡು ,ನನಗೇ ಅರ್ಥವಾಗದಿರೋ ನನ್ನದೇ ಮನದ ತೊಳಲಾಟಗಳ ಆಶ್ಚರ್ಯದಿಂದ ದಿಟ್ಟಿಸಿ ನಿಟ್ಟುಸಿರಿನೊಂದಿಗೆ ವರ್ಷದ ಹಿಂದಿನ ಅದೇ ಹುಡುಗಿಯಾಗಿ .....



 
ಕಣ್ಣಂಚ ಹನಿಯಲ್ಲಿ ಬೀಳ್ಕೊಟ್ಟಿದ್ದು ವರ್ಷವೊಂದರ ಮಟ್ಟೀಗಾದ್ರೂ ತೀರಾ ಹಚ್ಚಿಕೊಂಡ ಗೆಳೆಯನಾಗಿದ್ದೆ..ಮಧುರ ಪ್ರೀತಿಯಾಚೆಗೂ ಗೆಳೆತನದ ಒಲವ ಹುಡುಗನಾಗಿದ್ದೆ ಅಂತ ಮಾತ್ರ .ಹುಶಾರಿಲ್ಲದಾಗ ಮಾತಾಡಿದ್ದೂ ಇದೇ ಕಾರಣಕ್ಕೆ .ಆದರೂ ತಪ್ಪು ನಂದೆ ,ನಾ ನಿನ್ನಲ್ಲಿ ಪ್ರೀತಿಯಾಗೋ ತರ ನಡಕೊಂಡೆ ಅಂತ ನನ್ನದೇ ಮನ ನನ್ನ ಬೆರಳು ಮಾಡಿ ತೋರೋವಾಗ ಬಿಕ್ಕಿ ಬಿಕ್ಕಿ ಅಳಬೇಕಂದುಕೊಳ್ತೇನೆ..ಆದ್ರೂ ಪಾಪಿ ಕಣ್ಣೀರಿಗೂ ನನ್ನ ಮೇಲೆ ಬೇಸರವಾದಂತಿದೆ..

ಸಲುಹಿಕೊಂಡಿದ್ದ ಗೆಳೆತನಕ್ಕೆ ನನ್ನದೊಂದು ಋಣದ ನಮನ ..

ನೆನಪಾಗಿಯೂ ನಾ ನಿನ್ನ ಪ್ರೀತಿಸಲಾರೆ ಇನ್ನು .


 
ಬದುಕ ಪೂರ್ತಿ ಗೆಳತಿಯಾಗಿ ಪ್ರೀತಿಯ ಮಧುರ ಭಾವಗಳ ಮಾತ್ರ ನಿನ್ನಿಷ್ಟದಂತೆ ಹೊತ್ತು ತರೋ ಹುಡುಗಿ ಸಿಗಲಿ ಅಂತಾ ಮನ ಪೂರ್ತಿ ಹಾರೈಸಿ ಕಣ್ಣಂಚ ಹನಿಗಳ ಜೊತೆ ಬೀಳ್ಕೊಡ್ತಾ...

ನಿಂಗೆ ಬೆನ್ನು ಮಾಡಿ ನಡೆದು ಬಂದಾಗಿದೆ..ಮತ್ಯಾವತ್ತೂ ಬದುಕಿಗೆ ಎದುರಾಗಿ ನಿಂತು ಮತ್ತೇ ಬೇಡದಿರು ನೀ ಎನ್ನ...ನನ್ನ ಬದುಕಲ್ಲೇ ಕೊನೆಯಾದೀತು ಅಥವಾ ನಿನ್ನಿರುವಿಕೆಯ ಪೂರ್ತಿಯಾಗಿ ಅಲಕ್ಷಿಸಿ ನೀ ಇಷ್ಟಪಡದ ಭಾವಗಳೇ ಇಲ್ಲದ ಗೆಳತಿ ಧಿಕ್ಕರಿಸಿ ಹೊರಟಾಳು .

Saturday, September 7, 2013

ಪಾರ್ಟ್ ಟೈಮ್ ಸ್ಟೂಡೆಂಟ್ ...ಫ಼ುಲ್ ಟೈಮ್ ನಿರುದ್ಯೋಗಿಯಾಗಿ ...

ಹಂಗೆ ಸುಮ್ನೆ ....

ಓದೋಕೂ ಮೊದ್ಲೇ ಹೇಳ್ತಿದೀನಿ ..ಓದ್ಕೊಂಡು ತೀರಾ ಕಾಲ್ ಎಳ್ಯೋ ಹಂಗಿಲ್ಲ ...ಕಾಲ್ ಎಳ್ಸ್ಕೊಂಡು ಎಳ್ಸ್ಕೊಂಡು ಉದ್ದ ಆಗ್ಬಿಟ್ಟಿದೆ ಅನ್ನೋ ಸಣ್ಣ ಅನುಮಾನ.

ಹೈಕ್ಲಾಸ್ ನೆಟ್ ಸ್ಪೀಡ್ ಗೊಂದು ಉದ್ದುದ್ದ ನಮಸ್ಕಾರ ಮಾಡಿ ....

ಅರ್ಪಣೆ,

ಯಾಕೆ ಹುಡ್ಗಿ ತುಂಬಾ ಫೀಲಿಂಗ್ ಸ್ಟೋರಿ ಬರೀತಿಯಾ ಅನ್ನೋ ಭಯಂಕರ ತರ್ಲೆಗಳಿಗಾಗಿ....

ಹೆಂಗಿದ್ರೂ ಪಿಟೀಲು ಬಾರ್ಸೋದ್ ಇದ್ದಿದ್ದೆ ಅಲ್ವಾ ?ಮತ್ಯಾಕೇ ಮುನ್ನುಡಿ .

ಮುನ್ನುಡಿ ,ಪೀಠಿಕೆ ಇಲ್ದೇ ಶುರು ಮಾಡೋಣ ..(ಸ್ವಲ್ಪ ಆದ್ರೂ ಕಣ್ಣು ,ಕಿವಿ ಉಳ್ಕೊಳ್ಳಿ ನಿಮ್ದು )

ಫೇಸ್ಬುಕ್,ವಾಟ್ಸ್ ಅಪ್ ,ಚಾಟ್ ಹಿಸ್ಟರಿ,ಕ್ಲಾಸ್ ರೂಮ್ ಸ್ಲೀಪ್, ಕ್ಯಾಂಪಸ್ ಗಾಸಿಪ್ಸ್,ಕಾಫಿ ಡೇ ,ರೈಡ್ಸ್ ಎಲ್ಲಾ ಮುಗ್ದು ಯಾಕೋ ತುಂಬಾ ಪ್ರೀ ಇದೀನಿ ಅನ್ಸೋಕ್ ಶುರುವಾದಾಗ ಮಾತ್ರ ಇಲ್ಲೊಂದು ಅಟೆಂಡೆನ್ಸ್ ಹಾಕೋದು ...ತುಂಬಾ ದಿನ ಆಯ್ತು ಕ್ಲಾಸ್ ಅಟೆಂಡ್ ಮಾಡಿ ಅಂತ ಈಗಷ್ಟೇ ಜೋರು ಮಾಡಿದ ಅಣ್ಣಂಗೆ ಒಂದು ಚಿಕ್ಕ ಗೆಸ್ಟ್ ಅಪಿಯರನ್ಸ್ ಕೊಟ್ಟು ಸಮಾಧಾನ ಮಾಡ್ಬಿಟ್ಟು ಹೋಗೋಕೆ ಬಂದೆ ....ಇಷ್ಟಕ್ಕೆ ನಿಮ್ಗೂ ಸುಸ್ತ್ ಆದ್ರೆ ನನ್ ಪುಣ್ಯ ..ಮತ್ತೆ ರೆಗ್ಯುಲರ್ ಕ್ಲಾಸ್ ಅಟೆಂಡ್ ಮಾಡು ಅನ್ನಲ್ವಲ್ಲಾ :ಫ್

ಪಾರ್ಟ್ ಟೈಮ್ ಸ್ಟುಡೆಂಟ್ (ಫುಲ್ ಟೈಮ್ ನಿರುದ್ಯೋಗಿ) ಆಗಿ ತುಂಬಾ ದಿನ ಆಗಿರೋದ್ರಿಂದಾನೇ ಇರ್ಬೇಕು ಹಿಂಗೆ ಸೋ ಕಾಲ್ಡ್ ಫೀಲಿಂಗ್ ಸ್ಟೋರಿಯ ಹಿಂದಿರೋ ಇನ್ಸ್ಪಿರೇಷನ್ .

ಯಾಕೋ ಜನ ಚೆಂಜ್ ಕೇಳ್ತಿದಾರೆ ...

ಅದ್ಕಾಗಿ ಇದು :ಫ್

ಯಾಕೋ ಗೊತ್ತಿಲ್ಲಪ್ಪ ..ಮೊದಲ್ ನೆನಪಿಗೆ ಬರೋದೆ ಆ ಹುಡ್ಗ (ಯಾವ್ ಹುಡ್ಗ ಅಂತ ಕೇಳೋ ಹಂಗಿಲ್ಲ .....ಹೆವೀ ಕನ್ಪ್ಯೂಷನ್ ಆಗುತ್ತೆ ಈ ಪ್ರಶ್ನೆ)

ಅವನ್ ನೆನ್ಪಾದ್ರೆ ಮುಗೀತು ಬಿಡಿ ...ಸಾಲು ಸಾಲು ಬ್ರೇಕಪ್ ಸ್ಟೋರೀಸ್ ಎದುರು ಬಂದಂಗೆ (ಹುಡ್ಗ ತುಂಬಾ ಬೋರಿಂಗ್ ಅಂದ್ಕೊಂಡ್ರಾ ...ಎಕ್ಸಾಟ್ಲೀ )

ಕಷ್ಟ ಪಟ್ಟು ಅವ್ನಾ ನೆನಪ್ ಮಾಡ್ಕೊಳ್ದೇ ಇದ್ದಾಗ ಹಿಂಗೆ ನಿಮ್ಮ ತಲೆ ತಿನ್ನೋಕೆ ಬರ್ತೀನಿ :ಫ್( ಆ ಹುಡ್ಗಾನೇ ಯಾವಾಗ್ಲೂ ನೆನಪಾಗ್ತಾ ಇರ್ಲಿ ಅಂದ್ರಾ ? ಏನೋ ...ಕೇಳ್ಸಿಲ್ಲಪ್ಪ ನಂಗೆ )

ಬದ್ಕಿದೀಯ ಅಂತ ಕೇಳ್ದ್ರೆ ತಕ್ಷಣಕ್ಕೊಂದು ಮೇಸೇಜ್ ಬರುತ್ತೆ ...ನೀವೇ ಇನ್ನೂ ಬದ್ಕಿರೋವಾಗ ನಾವ್ ಬದ್ಕಿರೋದು ಹೆಚ್ಚಲ್ಲ ಬಿಡಿ ಅಂತ ...!

ತುಂಬಾ ದಿನದಿಂದ ನಾಪತ್ತೆಯಾಗಿದ್ದ ಗೆಳತಿ ಕೂಡಾ ಮಧ್ಯ ರಾತ್ರಿ ಡೈಲಾಗ್ ಹೇಳಿ ಅಂತೂ ತಾನೂ ಬದ್ಕಿದೀನಿ ಅಂತ ತೋರ್ಸ್ತಾಳೆ .ಮಿಸ್ ಕಾಲ್ ಗೂ ದುಡ್ಡು ಹೋಗುತ್ತೆ ಅನ್ನೋ ತರ ಆಡಿ ಆಮೇಲೊಮ್ಮೆ ನಂಗ್ಯಾಕೋ ಮಿಸ್ ಕಾಲ್ ಕೊಡೋಕೂ ಮೂಡ್ ಇರ್ಲಿಲ್ಲ ಅಂತ ಭಯಂಕರ ಡೈಲಾಗ್ ಹೇಳಿ ರಾತ್ರಿ ಪೂರ್ತಿ ಯಾಕಪ್ಪ ಈ ಹುಡ್ಗಿ ಹೀಗೆ ಮಾತಾಡಿದ್ಲು ಅಂತ ಯೋಚ್ನೆ ಮಾಡಿ (ಯಾವ್ ಹುಡ್ಗನ ಜೊತೆ ಬ್ರೇಕ್ ಅಪ್ ಆಯ್ತಪ್ಪ ಇವ್ಳದ್ದು ಅಂತ),ಬೆಳಿಗ್ಗೆ ಕ್ಲಾಸ್ ಅಟೆಂಡ್ ಮಾಡೋದು ಲೇಟ್ ಆಗಿ ...ಉಫ಼್ ...ಯಾರೀಗ್ ಹೇಳೋಣಾ ನಮ್ಮ ಪ್ರಾಬ್ಲಮ್ಮು ....

 

ಅದೇ ಕಿತ್ತೊಗಿರೋ ಲೈಫ಼ು ,ಅದೇ ಕ್ಯಾಂಪಸ್,ತಾವೇ ಹುಡ್ಕಿದ್ದೇನೋ ಸಬ್ಜೆಕ್ಟ್ ಗಳನ್ನ ಅನ್ನೋ ತರ ಪೋಸ್ ಕೊಡೋ ಜುನಿಯರ್ ಲೆಕ್ಚರ್ಸ್ ,೨೪ ಗಂಟೆ ಕಡ್ಮೆ ಆಯ್ತೇನೋ ಅನ್ನೋ ಭಾವ ಕೊಡೋ ಅಸೈನ್ ಮೆಂಟ್ಸ್, ಕ್ಯಾಂಟೀನಿನಲ್ಲಿ ನಾವೇ ಊಹಿಸಿಕೊಳೋ ತಿಳಿಯದ ರೆಸಿಪಿ ,ತೀರಾ ರೆಗ್ಯುಲರ್(?) ಆಗಿ ಅಟೆಂಡ್ ಮಾಡೋ ಕ್ಲಾಸಸ್ ,ಲೇಟ್ ಎಂಟ್ರಿ ಕೊಡೋ ಹುಡುಗಂಗೆ ಗೋಳು ಹೊಯ್ಕೊಳೋ "ಓಊಊ" ಸೌಂಡ್ ,ಡೈಯಾಸ್ ನಲ್ಲಿ ಪೋಸ್ ಕೊಡೋ ಲೆಕ್ಚರ್ಸ್ ಇಂಗ್ಲೀಷ್ ನಲ್ಲಿ ಸರಿಯಾದ ವಾಕ್ಯ ಹುಡುಕೋಕೆ ಹೋಗಿ ಕಂಟ್ರೋಲ್ ಆಗದ ನಗು, ಆಮೇಲಿನ ಅರ್ಧ ಗಂಟೆ heart touching ಕೊರೆತ ಅಬೌಟ್ how to behave in the class,

ಮೊಸ್ಟ್ imp :ಇಂಟರ್ನಲ್ ಹಿಂದಿನ ದಿನ ಎದ್ದು ಬಿದ್ದು ಜೆರಾ಼ಕ್ಸ್ ಹುಡುಕೋ ಗೋಳು.

ಲೈಫ಼್ ನಲ್ಲಿ ನಾವೂ ಬ್ಯುಸಿ ಆಗ್ತೀವಿ ಅಂತ ಗೊತ್ತೇ ಇರ್ಲಿಲ್ಲ !!

feeling proud :P

ಗ್ಯಾಪ್ ನಲ್ಲೇ ಹೆವೀ ಚೇಂಜ್ ಆಗ್ಬಿಡ್ತು ಅಂದ್ರೆ ನಂಬ್ಲೇ ಬೇಕು ....

ಕ್ಲಾಸ್ ಅಂದ್ರೆನೇ ಗೊತ್ತಿರ್ಲಿಲ್ಲ ..ಈಗ ಬಂಕ್ ಅನ್ನೋ ಶಬ್ಧವ ಎಲ್ಲೋ ಕೇಳಿದಂಗೆ ಅನ್ನಿಸ್ತಿದೆ .

ಅಸೈನ್ ಮೆಂಟ್ಸ್, ರೆಗ್ಯುಲಾರಿಟಿ ಗೆ ಇನ್ನೊಂದು ಹೆಸ್ರು ನಾವೇ ಏನೋ ಅಂತನಿಸ್ತಿದೆ .

ಸ್ಪೈಕ್ಸ್, ಲೊ waist ಹುಡ್ಗನ ಎದ್ರು ತೀರಾ ಡೀಸೆಂಟ್ ಆಗಿ ಫ಼ಾರ್ಮಲ್ಸ್ ಹಾಕೋ ಹುಡ್ಗನೇ ಲೈಟ್ ಆಗಿ ಇಷ್ಟ ಆಗ್ತಿದಾನೆ ...

ಪರ್ಫ಼್ಯೂಮ್ ಹಾಕೋ ಹುಡುಗ್ರನ್ನ ನೋಡಿದ್ರೆ ಹೊಟ್ಟೆ ತೊಳ್ಸುತ್ತೆ ಈಗೀಗ !

ಜೂನಿಯರ್ಸ್ ನಾ ಇಂಪ್ರೆಸ್ ಮಾಡೋಕಂತಾ ಬ್ರೇಕ್ ನಲ್ಲಿ ಸರ್ಕಸ್ ನಡೆಸೋ ಡಬ್ಬಾ ಸೀನಿಯರ್ಸ್ ನಾ ನೋಡಿ ಕರುಳು ಹಿಂಡುತ್ತೆ ಕಣ್ರೀ ಅಂದ್ರೇ ಯಾವ್ ರೇಂಜ್ ಗೆ ತಪ್ ತಿಳೀತೀರಾ ....

ತೀರಾ ಸೆಂಟಿಯಾಗಿ ಪ್ರಪೋಸ್ ಮಾಡೋ ಹುಡ್ಗನ್ನ ನೋಡಿ ಜೋರಾಗಿ ನಗ್ಬೇಕು ಅನ್ಸುತ್ತೆ ..ಪಾಪ ಹುಡ್ಗಂಗೆ ಒಳ್ಳೆದಾಗ್ಲಿ ಅಂದ್ರಾ ?

ಇನ್ನು ನಾವಂತೂ ಬಿಡಿ ....fully ಡೀಸೆಂಟ್ ಆಗ್ಬಿಟ್ವಿ ....ಹತ್ತು ಕ್ರಶ್ ಆಗ್ತಿದ್ದ ಜಾಗದಲ್ಲಿ ಒಂದೂ ಕ್ರಶ್ ಆಗ್ತಿಲ್ಲ ..ಯಾವ್ ಹುಡ್ಗನ್ ಮೂತಿನೂ ಸೆಟ್ ಆಗಲ್ಲ ...ಕ್ಯಾಂಪಸ್ಸೇ ನಮ್ದು ಅನ್ನೋ ಭಾವವ ಬಿಟ್ಟು ಯಾರದ್ದೋ ಕ್ಯಾಂಪಸ್ ಅಂತ ಬರೀ ಗೇಟ್ ತನ್ಕ ಮಾತ್ರ ಕೇಳೋ ಅಷ್ಟೇ ದೊಡ್ಡದಾಗಿ ಮಾತಾಡ್ತೀವಿ ....ಕ್ಯಾಂಟೀನ್ ನಡೀತಿರೋದು ನಮ್ದೇ ದುಡ್ದಲ್ಲೇನೋ ಅನ್ನೋ ಸಣ್ಣ ದೌಟ್ ಬೇರೇ ಇದೆ..

ಮನೆಯಲ್ಲೂ ಅಷ್ಟೇ ...ವಾಟ್ಸ್ ಅಪ್ ಬಿಟ್ಟು ಬೇರೇ ಏನನ್ನೂ ಕಣ್ಣೆತ್ತೂ ನೋಡಲ್ಲ(ಇನ್ನೇನ್ ಕೈ ಎತ್ತಿ ನೋಡಕ್ ಆಗುತ್ತಾ)...ತುಂಬಾ ಒಳ್ಳೆವ್ರಾಗಿದೀವಿ ಅನ್ಕೊಂಡ್ರಾ ...ಹಂಗೇನೂ ಇಲ್ಲ ..ವಾಟ್ಸ್ ಅಪ್ ಚಾಟ್ನಲ್ಲೇ ಟೈಮ್ ಮುಗ್ದಿರುತ್ತೆ ಅಷ್ಟೇ !..ಒಂದಿಷ್ಟು ಸೀಕ್ರೆಟ್ ಗ್ರುಪ್ ಗಳಲ್ಲಿ ಬೇಜಾನ್ ಕಾಲ್ ಎಳ್ಕೊಂಡು ,ದೇಶದ ಎಲ್ರದ್ದೂ ಕಾಲ್ ಎಳ್ದು ,ಬ್ಯಾಟರಿ ಲೋ ತೋರ‍್ಸಿ ಅದೇ ಸ್ವಿಚ್ ಆಫ಼್ ಆದ್ಮೇಲೆ ಮಲ್ಗಿದ್ರೆ ಅವತ್ತಿನ ದಿನ ಸಾರ್ಥಕ....

ಆದ್ರೂ ಸ್ವಲ್ಪ ಒಳ್ಳೆವ್ರಾಗ್ಬೇಕು ಇನ್ನಾದ್ರೂ (ಬ್ರಾಂಚ್ ಎಂಟರ್ ಆಗಿದೀವಿ ಅಂತಾನಾ ಕೇಳಿದ್ರೆ ನಿಮ್ಗೂ ನಮ್ ಲೆಕ್ಚರ್ಸ್ ಗೂ ಏನೂ ವ್ಯತ್ಯಾಸ ಇಲ್ಲ ಅಂತ ಘಂಟಾನುಘಂಟವಾಗಿ ಹೇಳ್ಬಿಡ್ತೀನಿ ಅಷ್ಟೇ ).

ಹಳೆ ಹುಡುಗರಿಗೆಲ್ಲಾ ಒಂದು ಸೈಲೆಂಟ್ ಬಾಯ್ ಹೇಳಿ ತೀರಾ ಉಲ್ಟಾ ಆದ ನಮ್ಮದೇ ಟೇಸ್ಟ್ ಗಳ್ನಾ ಟ್ರಾಕ್ ಗೆ ತರೋ ಶತ ಪ್ರಯತ್ನವ ಮಾಡ್ಲೇ ಬೇಕು ಇನ್ನು ....

ವಾಟ್ಸ್ ಅಪ್ ಗೆ ಬಾ,ಸ್ಕೈಪ್ ಗೆ ಬಾ, ಅಲ್ ಬಾ ಇಲ್ ಬಾ ಅಂತ ಬ್ಲಾ ಬ್ಲಾ ಮಾಡಿದ್ರೆ ಒದೆ ಬೀಳುತ್ತೆ ಅಷ್ಟೇ ....

ಒಂದ್ ರೌಂಡ್ ಅಜ್ನಾಥ ವಾಸ ಮುಗಿದ್ಮೇಲೆ ಸಿಗ್ತೀನಿ ಮತ್ತೆ ತಲೆ ತಿನ್ನೋಕೆ ..ಅಲ್ಲಿ ತನ್ಕ ಆ ತಲೆಗಳ್ನಾ ಜೋಪಾನ ಮಾಡ್ಕೊಳಿ.

ಗ್ಯಾಪಲ್ಲಿ ಟೈಮ್ ಇದ್ರೆ ...ಮೊಬೈಲ್ ನಲ್ಲಿ ಬಿಟ್ಟಿ ಕರೆನ್ಸಿ ಇದ್ರೆ ಅವಾಗಾವಾಗ ನೀವೂ ಬದ್ಕಿದೀರ ಅಂತ ಹೇಳ್ತಿರಿ ...ಇಲ್ಲಾ ಫೋಟೋಕ್ಕೆ ಹಾರ ಹಾಕಿ ಕೈ ಮುಗ್ಯೋಕೆ ಗೊತ್ತಾಗಲ್ಲ ಅಂತಷ್ಟೇ.

* * *

ಹಳೆ ಹುಡ್ಗ ಯಾರಂತ ಕೇಳೋ ಹಂಗಿಲ್ಲ ....ಹೊಸ ಹುಡ್ಗನ್ ಹೆಸ್ರೂ ಕೇಳೋ ಹಂಗಿಲ್ಲ ....ಏನ್ ಹುಡ್ಗೀರಪ್ಪ ಅಂತ ಬೈಯ್ಯೋ ಹಂಗಿಲ್ಲ ...ಎಷ್ಟ್ ನೀಟ್ ಆಗಿ ಕೊರಿತಾಳೆ ಅಂತಾನೂ ಉಗ್ಯೋ ಹಂಗಿಲ್ಲ .....

ಟೊಟಲ್ಲಿ ..... ಉಫ಼್ .

(ಬ್ಲಾಗ್ ಅನ್ನೋದು ರಾಗಿ ಮುದ್ದೆ ಹೋಟೆಲ್ ಆಗ್ಬಾರ್ದು ...ಆವಾಗಾವಾಗ ಮಸಾಲ್ ಪುರಿನೂ ಮಾಡ್ತಿರ್ಬೇಕು ಅಂತ ನೀಟ್ ಆಗಿ ಡೈಲಾಗ್ ಹೇಳಿದ್ದ ಗೆಳೆಯಂಗೆ ......ಮಸಾಲ್ ಪುರಿನಲ್ಲಿ ಸ್ವಲ್ಪ ಪುರಿ ಕಡ್ಮೆ ಇದೆ ಅನ್ಸುತ್ತೆ ,,ಅಥ್ವಾ ಪಾನಿ ಪುರಿ  ಆಯ್ತು ಅನ್ಸುತ್ತೆ ಕಣೋ ಸ್ವಲ್ಪ ಅಡ್ಜಸ್ಟ್ ಮಾಡ್ಕೋ :ಫ್ )

Sunday, August 25, 2013

ಪೂರ್ತಿ ಮೌನಿಯಾಗಿ ....



ಅವತ್ತದು "ಡಬಲ್ ಎಸ್ " ನಿಲಯ .....ಬರಿಯ ಸಂತೋಷವೇ ಆ ಮನೆಯ ಸಂಪತ್ತು .ಯಾವತ್ತೂ ನಗೋ ,ಎಲ್ಲರನೂ ನಗಿಸೋ ,ಬದುಕ ಬಗೆಗೆ ತೀರಾ ವ್ಯಾಮೋಹ ಹೊಂದಿರೋ ಹುಡುಗಿ ಅವಳು!
ಬದುಕ ಪ್ರೀತಿಯ ಕಲಿಸಿಕೊಟ್ಟ ಇದೇ ಗೆಳತಿ ಕಾರಣ ಹೇಳದೇ ಬದುಕಿಂದಲೇ ಎದ್ದು ಹೋದುದರ ಬಗೆಗೆ ಕಾರಣ ಹುಡುಕ ಹೊರಟು ವಾರಗಳೇ ಸಂದವು ...ಸಿಗದಿದ್ದ ಕಾರಣಕ್ಕೆ ಕಣ್ಣ ಹನಿ ತನ್ನಿರುವ ತೋರಿಸ ಬಂದು ,ಅದ್ಯಾಕೋ ಹೇಳಲಾಗದ ಭಾವದೊಂದಿಗೆ ನೆಲ ತಲುಪಿದ್ದೂ ಆಗಿದೆ .

ಮನೆಯ ಪ್ರೀತಿ,ಮನೆಯವರ ನಡುವಿನ ಆತ್ಮೀಯತೆಯ ಕುರುಹನ್ನೂ ಅರಿಯದ ನಂಗೆ ಈ ಬಂಧಗಳ ಮೊದಲ ಅನುಭವವಾದುದ್ದೂ ನಿನ್ನಿಂದಲೇ !ಬದುಕಂದ್ರೆ ಹಾಸ್ಟೆಲ್ ,ಓದು ಮತ್ತು ನನ್ನಲ್ಲೇ ಮಾತಾಡಿಕೊಳ್ಳೋ ನಾನು ಅಂತಿದ್ದ ನಂಗೆ ಬದುಕಂದ್ರೆ ಪ್ರೀತಿ,ಬದುಕಂದ್ರೆ ಅಪ್ಪ,ಪ್ರೀತಿ ಅಂದ್ರೆ ಅಣ್ಣ ಅಂತೆಲ್ಲಾ ಏನೇನೋ ಭಾವಗಳ ತುಂಬಿದ್ದ ಹುಡುಗಿ ನೀನು .
 "ಡಬಲ್ ಎಸ್" ನಿಲಯಕ್ಕೆ ಪ್ರೀತಿಯಿಂದ ಆಹ್ವಾನಿಸಿದ್ದ ಗೆಳತಿ ನಿನ್ನ ಸುಂದರ ಮನೆಯ ಮನಸ್ಸುಗಳಿಗೂ ಅಷ್ಟೇ ಪ್ರೀತಿಯ ಆಹ್ವಾನವ ನೀಡಿದ್ದೆಯಲ್ಲೇ .
ನಿನ್ನ ,ಅಣ್ಣನ ಹೆಸರುಗಳು ಎಸ್ ಇಂದ ಶುರುವಾದಾಗಲೇ ಇರಬೇಕು ನಿಮ್ಮನೆಯಲ್ಲಿ ಸಂತಸದ ವಾತಾವರಣ ಇರೋಕೆ ...ನನ್ನ ಹೆಸರೂ """"ಎಸ್" ಇಂದ ಬರೋದಕ್ಕೇ ಇರಬೇಕೇನೋ ಮತ್ತೆ ನಿನ್ನ ಆ ಖುಷಿಯ ಅರಮನೆ "ತ್ರಿಬಲ್ ಎಸ್" ಆಗಿದ್ದು !

ಗೆಳತಿಯಾಗಿದ್ದು ಬರಿಯ ಮುಗುಳ್ನಗೆಯಿಂದ ..ದಿನವೂ ಎದುರು ಸಿಕ್ಕಾಗ ಪರಿಚಯದ ನಗುವ ಬಿಟ್ಟರೆ ಅದರಾಚೆಗಿನ ಒಂದು ಮಾತು ಆಡಿರಲಿಲ್ಲ ನಾ ನಿನ್ನೊಟ್ಟಿಗೆ .ಅದ್ಯಾಕೋ ಮಾತಾಡದೇ ನೀ ನನಗೆ ಆಪ್ತಳಾಗಿದ್ದೆ ..ನನ್ನೊಂದಿಷ್ಟು ನೋವುಗಳ ನಾ ನಿನ್ನೊಂದಿಗೆ ಕಣ್ಣಿನಲ್ಲೇ ಹೇಳಿಕೊಂಡಿದ್ದೆ ..ನೀನೂ ಅದಕ್ಕೆ ಕಣ್ಣಿನಲೇ ಸಾಂತ್ವಾನಿಸಿದ್ದೆ ಕೂಡಾ ...ಬರಿಯ ನಗು ಜೀವದ ಗೆಳತಿಯನ್ನಾಗಿಸಿದ್ದು ಮಾತ್ರ ವರ್ಷಗಳ ಈಚೆಗೆ .ದಿನಕ್ಕೊಂದು ತಾಸು ಮಾತಾಡಿಲ್ಲ ಅಂದ್ರೆ ಏನೋ ಕಳೆದುಹೋದ ಭಾವವಿತ್ತು ..ಅದೆಷ್ಟು ಸಲ ನಾ ನಿನ್ನ ಮನೆಗೆ ಬಂದಿದ್ದೆ ಅನ್ನೋಕೆ ಲೆಕ್ಕವಿಲ್ಲ ...ನಿನ್ನನ್ನು ಇಷ್ಟ ಪಡೋ ಅಷ್ಟೇ ನನ್ನನ್ನೂ ಪ್ರೀತಿ ಮಾಡ್ತಿದ್ರು ನಿನ್ನಪ್ಪ ಅಮ್ಮ ,ನಿನ್ನಲ್ಲಿ ತರ್ಲೆ ಮಾಡೋ ಅಷ್ಟೇ ಸಲುಗೆಯ ನಂಗೂ ಕೊಟ್ಟಿದ್ದ ಅಣ್ಣ ..ಅಂತೂ ನಿಮ್ಮನೆಯ ಸದಸ್ಯರಲ್ಲಿ ನಾನೂ ಒಬ್ಬಳಾಗಿ ಹೋದೆ ಅನ್ನೋದು ನನ್ನ ಜೀವಮಾನದ ಖುಷಿ .

ನಿನ್ನಿಂದ ನಾ ಕಲಿತುಕೊಂಡಿದ್ದು ನನ್ನಿಡೀ ಬದುಕ ನಡೆಸೋ ಅಷ್ಟಿದೆ ..ಕೆಲವೊಮ್ಮೆ ಅರ್ಥವಾಗದ ನನ್ನದೇ ಮೂಡ್ ಗಳ ಬದಲಿಸಿದ್ದು ನೀ...ಯಾವತ್ತೂ ಮಾಸದ ಮುಗುಳ್ನಗು ನಿನ್ನ ಸ್ಥಿಗ್ದ ಮುಖದಲ್ಲಿ ನೋಡೋದೇ ನಂಗೆ ಖುಷಿ ...ಇರೋ ಬೇಸರಗಳೆಲ್ಲಾ ನಿನ್ನ ನೋಡಿದ ತಕ್ಷಣ ಮಾಯವಾಗುತ್ತಿದ್ದವಲ್ಲೇ ಗೆಳತಿ...ಒಂದಿನಿತೂ ಬೇಸರಿಸದೇ ಎಲ್ಲರ ಬೇಸರಗಳ ಕಿವಿಯಾಗಿ ತೀರಾ ಫ್ರೌಡೆಯಾಗಿ ಮಾತಾಡೋ ಈ ಮುದ್ದು ಗೆಳತಿ ನನ್ನ ಜೀವದ ಗೆಳತಿ ಅನ್ನೋ ಹೆಮ್ಮೆ ನಂದಾಗಿತ್ತು ..
ಅಕ್ಕನಾಗಿ ,ಗೆಳತಿಯಾಗಿ,ಒಮ್ಮೊಮ್ಮೆ ಅಮ್ಮನಾಗಿ ಎದುರು ಕೂತು ಪ್ರೀತಿಸೋ ಆಸ್ಥೆವಹಿಸೋ ,ಬದುಕ ಪ್ರೀತಿಯ ಬೆಳೆಸಿಕೊಟ್ಟ ಇದೇ ಗೆಳತಿ ಇವತ್ಯಾಕೋ ತೀರಾ ಮೌನಿಯಾಗಿ ಬಿಕ್ಕುತ್ತಿದ್ದಂತನಿಸಿದೆ ನಂಗೆ .
ನಿನ್ನ ಇಲ್ಲದಿರುವಿಕೆಯ ಕ್ಷಣವನ್ನೂ ಊಹಿಸದ ನಾನಿವತ್ತು ಇದೇ ಸತ್ಯವ ಅರಗಿಸಿಕೊಳ್ಳಬೇಡವೇ ಹುಡುಗಿ ?...

ಬದುಕಿಂದ ಎದ್ದು ಹೋಗೋ ಅಷ್ಟು ಜರೂರತ್ತೇನಿತ್ತು ನನ್ನ ಗೆಳತಿಗೆ ?....ನನ್ನೀ ಪ್ರಶ್ನೆಗೆ ಉತ್ತರಿಸಲೇ ಬೇಕಿದೆ ನೀನು .

ನಿನ್ನೆದುರು ಕೂತು ಮಾತಾಡಿ ವಾರವಾದವು ! ಮನೆ ತೀರಾ ಸೊರಗಿದೆ ..ಅಪ್ಪ ಅಮ್ಮ ಕಣ್ಣಂಚಲ್ಲಿ ಮಾತ್ರಾ ಮಾತಾಡುತ್ತಿದ್ದಾರೆ ....ನಗುವೇ ತಾನು ಅಂತಿಪ್ಪ ಅಣ್ಣ ಕೂಡಾ  ಕೈ ಹಿಡಿದು ಬಿಕ್ಕಿ ಬಿಕ್ಕಿ ಅತ್ತಾಗ ಮಾತ್ರ ನಿನ್ನೆಡೆಗೆ ತೀರಾ ಕೋಪ ಬಂದಿತ್ತು
 ನೀ ಯಾವುದೋ ಅರಿಯದ ಕಾರಣಕ್ಕೆ ಬದುಕಿಂದಲೇ ಎದ್ದು ಹೋದೆ ಅನ್ನೋದ ನೋಡಿ ಅರಗಿಸಿಕೊಳ್ಳಲಾಗದೇ  ಕಣ್ಣೀರ ಕಟ್ಟೆ ಒಡೆದುಹೋಗಿದೆ. ಕ್ಯಾಂಪಸ್ ನಲ್ಲಿ ಎಲ್ಲರೂ ಮುಖದ ತುಂಬಾ ಪ್ರಶ್ನೆಗಳ ತೋರೋ ಭಾವ ಭಯ ಆಗುತ್ತೆ ಕಣೇ.... ಅವರಂದುಕೊಂಡಂತೆ ನೀನಿಲ್ಲ ಅನ್ನೋದು ತೀರಾ ಹತ್ತಿರದಿಂದ ನಿನ್ನ ನೋಡಿರೋ ನಮಗೆಲ್ಲಾ ಗೊತ್ತು ..ಪ್ರೀತಿ ಪ್ರೇಮದ ಗೋಜಿಗೆ ಹೋಗದ ಹುಡುಗಿಯನ್ನ ಪ್ರೀತಿಯಲ್ಲಿ ಕೈ ಸುಟ್ಟುಕೊಂಡ್ಲು ಅನ್ನಿಸುತ್ತೆ ಅಂತ ಆಡಿಕೊಳ್ಳೋ ಮಾತುಗಳ ಕೇಳಿದಾಗಲ್ಲೆಲ್ಲಾ ಮನ ಭಾರವಾಗುತ್ತೆ ಹುಡುಗಿ ...

ನಿನ್ನ ಮನದ ದ್ವಂದ್ವಗಳೇನು ಅನ್ನೋದನ್ನ ಅರಿಯೋ ಪ್ರಯತ್ನವ ನಾ ಇನಿತೂ ಮಾಡಲಿಲ್ಲವೇ ಅನ್ನೋ ಒಂದೆ ಪ್ರಶ್ನೆಯ ವಾರದಿಂದ ಕೇಳಿ ಕೇಳಿ ಮನ ನಡುಗುತ್ತಿದೆ .....ನೀ ನನ್ನ ತೀರಾ ತಪ್ಪಿತಸ್ಥಳಂತೆ ಮಾಡಿದ್ದಂತೂ ಸುಳ್ಳಲ್ಲ .....ಸ್ವಲ್ಪವೆ ಬೇಸರವಿದ್ರೂ ಗುರುತಿಸಿ ಸರಿಪಡಿಸೋ ತನಕ ಸುಮ್ಮನಿರದ ಮನೆತುಂಬಾ ಓಡಾಡಿಕೊಂಡು ಗೋಳುಹೊಯ್ಕೊಳೋ ಈ ಮುದ್ದು ಗೌರಿಯ ಇಷ್ಟು ದೊಡ್ಡ ಗೊಂದಲಗಳು ನಂಗೆ ಅಣ್ಣಂಗೆ ಅರ್ಥವಾಗಲೇ ಇಲ್ವಲ್ಲೆ .

ಯಾಕೇ ಹುಡುಗಿ ಮನದ ಭಾರವ ಹರವದೇ ,ಯಾರಲ್ಲೂ ಹೇಳದೇ ಹತ್ತು ಪ್ರಶ್ನೆಗಳ ಹಾಗೆಯೇ ಉಳಿಸಿ ಹೊರಟುಹೋದೆ ನೀ ?....




ಬದುಕ ಬಗೆಗೆ ತೀರಾ ವ್ಯಾಮೋಹ ಒಳ್ಳೆಯದಲ್ಲ ಅಂತ ಅದ್ಯಾವತ್ತೋ ಹೇಳಿದ್ದ ನಂಗೆ ಗಂಟೆಗಳ ಕಾಲ ವ್ಯಾಮೋಹ ಮತ್ತು ಪ್ರೀತಿಯ ನಡುವಿನ ಅಂತರವ ಬಿಡಿಸಿಟ್ಟಿದ್ದ ಹುಡುಗಿ ನೀನೇನಾ ಅನ್ನೋದು ಗೋಜಲು ...ತೀರಾ ವಿಭಿನ್ನವಾಗಿ ,ಫ್ರೌಡವಾಗಿ ಎದುರು ನಿಲ್ಲೋ ಗೆಳತಿ ಇನ್ಯಾವತ್ತೂ ಎದುರು ಬರಲಾರಳು ಅನ್ನೊ ವಾಸ್ತವವ ಅರಿಗಿಸಿಕೊಳ್ಳೋ ಶಕ್ತಿ ನಂಗಿಲ್ಲ ಕಣೆ ...

ನೀನಿಲ್ಲದೇ ನಾನಿರಲ್ಲ ಅನ್ನೋ ಸ್ಪಷ್ಟ ಅರಿವಿದ್ದೂ ನನ್ನನ್ನಿಲ್ಲಿ ಬಿಟ್ಟು ಎದ್ದುಹೋದೆಯಲ್ಲ ..
ನಿಜ ಹೇಳು...ಹೋಗೋವಾಗ ಒಮ್ಮೆಯೂ ನನ್ನ ನೆನಪಾಗಲಿಲ್ವಾ ನಿಂಗೆ ? ನೆನಪಾಗಿದ್ದರೆ ನೀ ಖಂಡಿತ ಹೀಗೆ ಮಾಡ್ತಿರಲಿಲ್ಲ ..ಯಾಕಂದ್ರೆ ನನ್ನ ಗೆಳತಿ ಯಾವತ್ತೂ ನನ್ನ ಒಂಟಿತನಗಳ,ಒಬ್ಬಂಟಿ ಭಾವಗಳ ಜೊತೆಗಾರ್ತಿ.
ವಿಷಯ ಏನೇ ಇರಲಿ .....ನೀನದ ಹೇಳೋ ಸಣ್ಣ ಪ್ರಯತ್ನವ ಮಾಡದೇ ಬದುಕಿಗೆ ಸೋತಿದ್ದು ಮಾತ್ರ ವಿಷಾದ !

ನೀನೇನೋ ಕಾರಣ ಹೇಳದೇ (ಇಲ್ಲದೇ) ಹೊರನಡೆದೆ ..ಆದರೆ ಶಾಶ್ವತ ನೋವೊಂದ ನನ್ನಲ್ಲಿ ಬಿಟ್ಟು ಎದ್ದುಹೋದೆಯಲ್ಲೇ ....ಜೊತೆಗೊಂದಿಷ್ಟು ಜವಾಬ್ದಾರಿಗಳ ಹೊರಿಸಿ ...
ನಾನಿನ್ನು ಅಪ್ಪ ಅಮ್ಮಂಗೆ ಅದೇ ಪುಟ್ಟ ,ಫ್ರೌಡ ಮಗಳಾಗಬೇಕಿದೆ ..ಅಣ್ಣಂಗೆ ಮುದ್ದಿನ ಪುಟ್ಟಿಯಾಗಬೇಕಿದೆ ..ಕ್ಯಾಂಪಸ್ನಲ್ಲಿ ನಗುಮೊಗದ ,ಸ್ನೇಹದ ಹುಡುಗಿಯಾಗಬೇಕಿದೆ..
ಜೊತೆಗೆ ನನ್ನೆಲ್ಲಾ ಮನದ ಭಾವಗಳ ನನಗಿಂತ ಜಾಸ್ತಿ ಅರ್ಥೈಸಿಕೊಳೋ ನನ್ನ ಗೆಳತಿಯೂ ಆಗಬೇಕಿದೆ ...

ಮತ್ತೇ ಈ "ತ್ರಿಬಲ್ ಎಸ್" ನಿಲಯವ "ಡಬಲ್ ಎಸ್" ಮಾಡೋ ಇರಾದೇ ನಂಗಂತೂ ಇಲ್ಲ ...ಯಾಕಂದ್ರೆ ನೀನಿಲ್ಲದೆಯೂ ನಿನ್ನ ನೆನಪುಗಳು ಜೋಪಾನವಾಗಿದೆ ಇಲ್ಲಿ ...
ಕಟ್ಟಿಕೊಂಡ ಕಣ್ಣೀರ ಕಟ್ಟೆ ಒಡೆಯೋಕೂ ಮುನ್ನ ಜೋಪಾನ ಮಾಡಬೇಕಿದೆ ನಾನದನ್ನ ...ಯಾಕಂದ್ರೆ I love my sad tears too !!

ಬದುಕಿಗೊಂದು ಬದುಕ ಪ್ರೀತಿ ಕಲಿಸಿದಿ ಗೆಳತಿ ತನ್ನದೇ ಬದುಕಿಂದ ತಾನಾಗೇ ಎದ್ದು ಹೋದುದ್ದರ ಕಾರಣ ಮಾತ್ರ ಕಾರಣವಾಗೇ ಉಳಿದು ಹೋಯ್ತು ...
ಸಾಧ್ಯವಾದರೆ ಪ್ರಶ್ನೆಗಳಿಗೆ ಉತ್ತರಿಸಿ ಹೋಗು ..
ಜೊತೆಗೆ ....
ಬದುಕೇ ಇಲ್ಲದ ಬದುಕ ಪ್ರೀತಿಯ ಸಾಧ್ಯತೆಯ ಕೂಡಾ ...